ຜູ້ນຳເກົາຫຼີເໜືອ ທ່ານ Kim Jong Un ກ່າວວ່າ ທ່ານເປີດ
ກວ້າງຕໍ່ການຂະຫຍາຍ “ການສົນທະນາຫາລື ແລະ
ການຮ່ວມໄມ້ຮ່ວມມື” ກັບ ປະເທດ ທີ່ເປັນຄູ່ປໍລະປັກ
ຄືເກົາຫຼີໃຕ້ນັ້ນ.
ໃນລະຫວ່າງການກ່າວຄຳປາໄສ ໃນວັນປີໃໝ່ ຕາມປະເພນີ
ທ່ານ Kim ກ່າວວ່າ ທ່ານຈະພິຈາລະນາ ຟື້ນຟູ “ການປະຊຸມ
ລະດັບສູງ ທີ່ໄດ້ຢຸດສະງັກມານັ້ນ” ກັບໂຊລ.
ທ່ານ Kim ເວົ້າວ່າ “ຖ້າຫາກ ບັນຍາກາດ ແລະ ສະພາບແວດລ້ອມ ຫາກອຳນວຍໃຫ້ ມັນກໍບໍ່ມີເຫດຜົນໃດທີ່ຈະບໍ່
ຈັດກອງປະຊຸມສຸດຍອດ ລະດັບສູງກັບເກົາຫຼີໃຕ້. ພວກເຮົາ ຈະພະຍາຍາມທຳທຸກໆຢ່າງ ເພື່ອເຮັດໃຫ້ການປຶກສາຫາລື ແລະ ການຮ່ວມໄມ້ຮ່ວມມື ມີຄວາມກ້າວໜ້າ.”
ມັນຍັງບໍ່ຈະແຈ້ງເທື່ອວ່າ ການເຈລະຈາທີ່ທ່ານ Kim ໄດ້ສະເໜີໄປນັ້ນ ແມ່ນຈະຢູ່ໃນລະດັບໃດ ແລະ ຈະມີຂຶ້ນໃນເມື່ອໃດ.
ຂໍ້ສະເໜີດັ່ງກ່າວ ມີຂຶ້ນຫຼັງຈາກ ທີ່ເກົາຫຼີໃຕ້ ໃນອາທິດນີ້ ໄດ້ສະເໜີທີ່ຈະຈັດກອງປະຊຸມ
ລະດັບສູງ ກັບເກົາຫຼີເໜືອ ໃນເດືອນມັງກອນນີ້.
ທ່ານ Ryoo Kihl-jae ລັດຖະມົນຕີກະຊວງທ້ອນໂຮມຊາດ ຂອງເກົາຫລີໃຕ້ ໃນວັນພະຫັດ ມື້ນີ້ ໄດ້ສະແດງຄວາມປິຕິຍິນດີ ຕໍ່ຄຳຖະແຫລງ ຂອງທ່ານ Kim ໂດຍກ່າວວ່າ ຖ້າຜູ້ນຳເກົາຫຼີເໜືອ ຫາກ “ຈິງໃຈ” ແທ້ ທ່ານກໍຄວນທີ່ຈະຮັບເອົາຂໍ້ສະເໜີໃຫ້ເປີດ ການເຈລະຈາ ຂອງເກົາຫລີໃຕ້.
ກອງປະຊຸມທີ່ສຳຄັນຫຼ້າສຸດ ລະຫວ່າງສອງເກົາຫຼີ ໄດ້ມີຂຶ້ນໃນເດືອນກຸມພາປີກາຍນີ້.
ທັງສອງເກົາຫຼີ ໄດ້ຕົກລົງກັນ ໃນເດືອນຕຸລາຜ່ານມາ ທີ່ຈະເປີດການສົນທະນາຫາລືກັນ
ຄືນອີກ ແຕ່ກໍບໍ່ໄດ້ປະຕິບັດຕາມ.
ການເຈລະຈາ ຊຶ່ງຕາມປົກກະຕິແລ້ວ ຈະກວມເຖິງຂົງເຂດການຮ່ວມໄມ້ຮ່ວມມື ເຊັ່ນວ່າ
ຟື້ນຟູຄືນ ການເຕົ້າໂຮມ ລະຫວ່າງບັນດາຄອບທີ່ພັດພາກຈາກກັນ ໂດຍສົງຄາມເກົາຫຼີ
ໃນຊຸມປີ 1950 ນັ້ນ.
