ຄະນະກຳມາທິການດ້ານສິດທິມະນຸດຂອງອົງການສະຫະປະຊາຊາດ ໄດ້ໃຫ້ການຕີລາຄາຢ່າງບໍ່ແຈ່ມແຈ້ງກ່ຽວກັບສະຖານະການຢູ່ ເກົາຫຼີເໜືອ ໃນວັນພຸດວານນີ້, ເຊິ່ງເປັນເວລານຶ່ງທົດສະວັດ ລຸນຫຼັງລາຍງານທີ່ເລິກເຊິ່ງກ່ຽວກັບການລ່ວງລະເມີດທີ່ຮ້າຍແຮງນັ້ນ ໄດ້ຖືກເປີດເຜີຍອອກມາ ແລະແຜ່ລາມອອກໄປໃນທົ່ວປະເທດ.
ທ່ານໂວລເກີ ເຕີກ (Volker Türk) ກ່າວຕໍ່ກອງປະຊຸມພິເສດສະຫຼຸບໂດຍຫຍໍ້ກ່ຽວກັບສະພາຄວາມໝັ້ນຄົງ ສປຊ ວ່າ ເອກອັກຄະລັດຖະທູດຂອງເກົາຫຼີເໜືອບໍ່ໄດ້ເຂົ້າຮ່ວມ ເຊິ່ງທ່ານກ່າວວ່າ “ມື້ນີ, ສປປ ເກົາຫຼີ ເປັນປະເທດທີ່ປິດກັ້ນຕົນເອງຈາກໂລກພາຍນອກ, ມີສະພາບແວດລ້ອມທີ່ເຂັ້ມງວດ, ແລະອຶດອັດ, ອັນເປັນບ່ອນທີ່ຊີວິດ ແມ່ນການຕໍ່ສູ້ປະຈໍາວັນໂດຍປາສະຈາກຄວາມຫວັງ."
DPRK ແມ່ນໂຕຫຍໍ້ຂອງຊື່ທາງການຂອງເກົາຫຼີເໜືອ ໂດຍມີຄວາມໝາຍວ່າສາທາລະນະລັດ ປະຊາທິປະໄຕ ປະຊາຊົນ ເກົາຫຼີ.
ທ່ານ ເຕີກ ໄດ້ສະແດງຄວາມເປັນຫ່ວງກ່ຽວກັບການຄວບຄຸມທີ່ເຄັ່ງຄັດຂອງລະບອບຜະເດັດການ ຕໍ່ການເຄື່ອນໄຫວຕ່າງໆຂອງພົນລະເມືອງ, ລວມທັງຄວາມສາມາດທີ່ຈະໜີອອກນອກປະເທດ. ຊາວເກົາຫຼີເໜືອສ່ວນໃຫຍ່ ບໍ່ສາມາດໄດ້ຮັບການອະນຸຍາດຈາກລັດຖະບານເພື່ອອອກນອກປະເທດ, ແລະຜູ້ໃດກໍຕາມທີ່ພະຍາຍາມໂຕນໜີ ຈະຕ້ອງປະເຊີນກັບການທໍລະມານ, ປະເຊີນກັບຄ້າຍແຮງງານ ຫຼື ປະເຊີນກັບຄວາມຕາຍ ຖ້າການລົບໜີຂອງພວກເຂົາເຈົ້າ ບໍ່ປະສົບຜົນສໍາເລັດ.
ທ່ານ ເຕີກ ກ່າວຜ່ານວີດີໂອຈາກສໍານັກງານຂອງທ່ານໃນນະຄອນຫຼວງເຈເນວາ ວ່າ “ການອອກຈາກປະເທດຂອງພວກເຈົ້າ ບໍ່ແມ່ນອາຊະຍາກໍາ. ໃນທາງກົງກັນຂ້າມ, ມັນເປັນສິດທິມະນຸດ, ເຊິ່ງຖືກຮັບຮູ້ໂດຍກົດຫມາຍສາກົນ.”
ຟໍຣັມສະແດງຄວາມຄິດເຫັນ