ບັນດາສະມາຊິກສະພາເກົາຫລີໃຕ້ ໄດ້ປະທະກັບນັກການທູດເກົາຫລີເໜືອຄົນນຶ່ງໃນ
ວັນຈັນ ຢູ່ນອກກອງປະຊຸມສະພາສິດທິມະນຸດອົງການສະຫະປະຊາຊາດ ທີ່ປະເທດ
ສະວິດເຊີແລນ.
ການຕໍ່ສູ້ກັນຢ່າງອົນລະວົນໄດ້ເກີດຂື້ນໃນເວລາພວກນັກການເມືອງເກົາຫລີໃຕ້ ຍ່າງເຂົ້າ
ໄປຫາເອກອັກຄະລັດຖະທູດເກົາຫລີເໜືອປະຈໍາ ນະຄອນເຈນີວາ ທ່ານ So Se-pyong
ຫລັງຈາກທ່ານໄດ້ປະຕິເສດຕໍ່ຂໍ້ຄວາມໃນລາຍງານຂອງສະຫະປະຊາຊາດ ກ່ຽວກັບການ
ລ່ວງລະເມີດສິດທິມະນຸດຂອງ Pyongyang.
ເຈົ້າໜ້າທີ່ຮັກສາຄວາມປອດໄພໄດ້ເຂົ້າໄປແຍກການຕໍ່ສູ້ກັນດັ່ງກ່າວ ແລະຢ່າງນ້ອຍມີເຈົ້າ
ໜ້າທີ່ຄົນນື່ງໄດ້ຖືກກັກຕົວໄວ້ຊົ່ວໄລຍະນຶ່ງ.
ຄະນະຜູ້ຕາງໜ້າເກົາຫລີໃຕ້ ໄດ້ຮ້ອງຄຳຂວັນສະໜັບສະໜູນພວກຊາວເກົາຫລີເໜືອທີ່
ໂຕນໜີ ຊື່ງກໍາລັງປະເຊີນກັບການຖືກເນລະເທດຈາກ ເຈົ້າໜ້າທີ່ຈີນ ຫລັງຈາກໄດ້ຫລົບ
ໜີຈາກປະເທດຄອມມີວນິສທີ່ທຸກຍາກລໍາບາກດັ່ງກ່າວນັ້ນ.
ຈີນກ່າວວ່າ ຕົນມີສິດທີ່ຈະສົ່ງຜູ້ໂຕນໜີກັບຄືນໄປຍັງເກົາຫລີເໜືອແລະຮ້ອງເຂົາເຈົ້າວ່າ
“ຜູ້ຫລົບໜີໄພເສດຖະກິດ” ແຕ່ພວກເຄື່ອນໄຫວດ້ານສິດທິມະນຸດກ່າວວ່າ ຜູ້ຖືກກັກຂັງ
ເຫຼົ່ານີ້ອາດຈະປະເຊີນກັບການຖືກທໍລະມານ ຫລືການປະຫານຊີວິດ ຖ້າຫາກຖືກສົ່ງກັບ
ຄືນປະເທດ.
ຢູ່ທີ່ກຸງໂຊລ ບັນດາຜູ້ປະທ້ວງຫລາຍຮ້ອບຄົນ ພາກັນເຕົ້າໂຮມຢູ່ຕໍ່ໜ້າສະຖານທູດຈີນ
ໃນວັນອັງຄານມື້ນີ້ເພື່ອຮ້ອງຂໍໃຫ້ປ່ອຍພວກທີ່ໂຕນໜີ ຫຼັງຈາກມີລາຍງານວ່າໄດ້ມີການໃຊ້
ກຳລັງບັງຄັບໃຫ້ປະມານ 30 ຄົນ ຖືກສົ່ງຄືນປະເທດໄປແລ້ວ.
ໂຄສົກກະຊວງການຕ່າງປະເທດເກົາຫລີໃຕ້ ທ່ານ Cho Byung-jae ກ່າວວ່າໃນວັນອັງ
ຄານມື້ນີ້ວ່າ ທ່ານຈະສືບຕໍ່ດໍາເນີນການເພື່ອໃຫ້ມີການ ປ່ອຍຕົວພວກທີ່ຖືກເຈົ້າໜ້າທີ່ຈີນ
ກັກຂັງໄວ້ນັ້ນ.
