ຜູ້ຊາຍຊາວເກົາຫລີເໜືອ ອາຍຸ 18 ປີ ໄດ້ເດີນທາງໄປຮົງກົງ ເພື່ອແຂ່ງຂັນກິລາໂອລິມປິກ ຄະນິດສາດສາກົນ ໄດ້ຂໍລີ້ໄພຢູ່ໃນກົງສຸນເກົາຫລີໃຕ້ຢູ່ທີ່ນັ້ນໃນວັນພຸດທີ່ຜ່ານມາ ອີງຕາມລາຍງານຂ່າວທ້ອງຖິ່ນ.
ເພື່ອເປັນການລະມັດລະວັງ ກົງສຸນໃຫຍ່ເກົາຫລີໃຕ້ ທີ່ຕັ້ງຢູ່ສູນກາງການເງິນ Far East ໄດ້ “ຮຽກຮ້ອງໃຫ້ພວກເຈົ້າໜ້າທີ່ຮົງກົງ ເພີ້ມການຮັກສາຄວາມປອດໄພ. ຕຳຫລວດໄດ້ສົ່ງເຈົ້າໜ້າທີ່ຢ່າງຫລວງຫລາຍໄປທີ່ນັ້ນ ຮວມທັງໜ່ວຍຕໍ່ຕ້ານການກໍ່ການຮ້າຍຂອງຕຳຫຼວດ.
ລາຍລະອຽດຍັງບໍ່ແຈ້ງຂາວເທື່ອ ແຕ່ວ່າໃນຕອນບ່າຍວັນພະຫັດວານນີ້ກ່ອນ 5 ໂມງແລງ ບັນດານັກຂ່າວ VOA ໄດ້ຂີ່ລິບຂຶ້ນໄປຊັ້ນທີຫ້າຂອງຫ້ອງການກົງສຸນ ບ່ອນທີ່ເຂົາເຈົ້າໄດ້ ຖືກໄລ່ອອກໄປໂດຍພວກເຈົ້າໜ້າທີ່ນອກເຄື່ອງແບບ. ກົງສຸນໄດ້ຍົກເລີກການອອກວີຊ່າ ແລະການບໍລິການຕ່າງໆ.
ພວກນັກຂ່າວຈຳນວນນຶ່ງໄດ້ພາກັນນອນຢູ່ນອກຕຶກທາງເຂົ້າ. ນັກຂ່າວສອງສາມຄົນກ່າວວ່າສະພາບຂອງຜູ້ໂຕນໜີຍັງບໍ່ເປັນທີ່ແຈ້ງຂາວ ແລະພວກເຈົ້າໜ້າທີ່ຮົງກົງ ຫລືຄະນະກຳມະການກະຊວງຕ່າງປະເທດຈີນ ຢູ່ໃນຮົງກົງ ຍັງບໍ່ໄດ້ຕອບຮັບ ຕໍ່ຄຳຮ້ອງຂໍຂອງພວກນັກຂ່າວ.
ອີງຕາມນະໂຍບາຍ “ປະເທດນຶ່ງທີ່ມີສອງລະບົບ” ລະຫວ່າງຈີນແຜ່ນດິນໃຫຍ່ ແລະຮົງກົງ ເຫດການທັງໝົດທີ່ພົວພັນກັບບັນຫາທາງການທູດ ຕ້ອງຮັບມືໂດຍ ກະຊວງຕ່າງປະເທດ ຢູ່ທີ່ປັກກິ່ງ.
ຈີນ ແລະເກົາຫລີໃຕ້ໄດ້ປະຕິເສດທີ່ຈະໃຫ້ຄວາມເຫັນໃດໆກ່ຽວກັບສະຖານະການ. ປັກກິ່ງເທົ່າທີ່ຜ່ານມາໄດ້ຢູ່ພາຍໃຕ້ການຖືກໂຈມຕີຈາກບັນດາກຸ່ມສິດທິມະນຸດທີ່ສົ່ງຜູ້ຖືກກ່າວຫາໂຕນໜີຈາກເກົາຫລີເໜືອ ກັບຄືນໄປປະເທດຂອງເຂົາເຈົ້າ ບ່່ອນທີ່ເຊື່ອກັນຢ່າງກວ້າງຂວາງວ່າ ເຂົາເຈົ້າປະເຊີນໜ້າກັບການລົງໂທດຢ່າງຮ້າຍແຮງນັ້ນ.
