ສື່ມວນຊົນ KCNA ຂອງທາງການເກົາຫຼີເໜືອ ລາຍງານໃນວັນສຸກມື້ນີ້ ວ່າ ທ່ານນາງ ກິມ ໂຢ ຈອງ (Kim Yo Jong), ນ້ອງສາວຜູ້ມີອໍານາດຂອງຜູ້ນໍາເກົາຫຼີເໜືອ ທ່ານ ກິມ ຈອງ ອຶນ, ໄດ້ປະຕິເສດອີກຄັ້ງນຶ່ງ ຕໍ່ການແລກປ່ຽນອາວຸດກັບ ຣັດເຊຍ, ອີງຕາມລາຍງານຂອງອົງການຂ່າວ Reuters.
ສະຫະລັດ ແລະ ເກົາຫຼີໃຕ້ ກ່າວຫາເກົາຫຼີເໜືອວ່າ ດໍາເນີນການຂົນສົ່ງອາວຸດຍຸດໂທປະກອນໄປໃຫ້ຣັດເຊຍ ເພື່ອໃຊ້ຕໍ່ສູ້ກັບ ຢູເຄຣນ, ທີ່ປະເທດດັ່ງກ່າວໄດ້ບຸກລຸກເຂົ້າໄປ ເມື່ອເດືອນກຸມພາ ປີ 2022. ທັງ ມົສກູ ແລະ ພຽງຢາງ ໄດ້ພາກັນປະຕິເສດຕໍ່ຂໍ້ກ່າວຫາດັ່ງກ່າວນັ້ນ, ແຕ່ໄດ້ປະຕິຍານໃນປີກາຍນີ້ວ່າ ຈະຮັດແໜ້ນສາຍພົວພັນທາງທະຫານໃຫ້ເລິກເຊິ່ງຂຶ້ນກວ່າເກົ່າ.
ການພົວພັນລະຫວ່າງສອງປະເທດ ໄດ້ເພີ້ມທະວີຂຶ້ນຢ່າງບໍ່ຢຸດຢັ້ງພາຍຫຼັງການຢ້ຽມຢາມຂົງເຂດທາງທິດຕາເວັນອອກຂອງຣັດເຊຍ ແລະການພົບປະກັບປະທານາທິບໍດີ ທ່ານວລາດີເມຍ ປູຕິນ ໂດຍ ທ່ານ ກິມ ຈອງ ອຶນ ໃນເດືອນກັນຍາທີ່ຜ່ານມາ.
ແຕ່, ທ່ານນາງ ກິມ ໂຢ ຈອງ ກ່າວວ່າ ຂໍ້ຕົກລົງດ້ານອາວຸດລະຫວ່າງ ເກົາຫລີເໜືອ ແລະ ຣັດເຊຍ ແມ່ນ “ທິດສະດີ” ທີ່ປະກອບດ້ວຍອະຄະຕິ ແລະເລື້ອງທີ່ແຕ່ງຂຶ້ນ, ອັນເປັນ “ທິດສະດີທີ່ບໍ່ມີສາລະທີ່ສຸດ” ເຊິ່ງບໍ່ສົມຄວນໄດ້ຮັບການຕີລາຄາ ຫຼືການຕີຄວາມໝາຍຂອງຜູ້ໃດຜູ້ນຶ່ງ, ອີງຕາມອົງການຂ່າວ KCNA ທີ່ໄດ້ອ້າງຈາກຖະແຫຼງການຂອງທ່ານນາງ, ໂດຍຮ້ອງສິ່ງດັ່ງກ່າວວ່າ ບໍ່ເປັນຄວາມຈິງ ເຊິ່ງເປັນຂ່າວລື ທີ່ບິດເບືອນຄວາມຈິງ ທີ່ໄດ້ເຜີຍແຜ່ອອກໄປໂດຍກອງກໍາລັງທີ່ເປັນສັດຕູຂອງຕົນ.
ທ່ານນາງ ກິມ ໂຢ ຈອງ ກ່າວຕື່ມວ່າ ອາວຸດຍຸດໂທປະກອນທີ່ເກົາຫຼີເໜືອກຳລັງພັດທະນາຢູ່ນີ້ ບໍ່ແມ່ນເພື່ອສົ່ງອອກ ແຕ່ເພື່ອປ້ອງກັນປະເທດຈາກເກົາຫຼີໃຕ້.
ໃນຄວາມເປັນຈິງແລ້ວ, ເກົາຫຼີເໜືອ ແລະເກົາຫຼີໃຕ້ ຍັງຄົງຢູ່ໃນພາວະສົງຄາມກັນຢູ່ ເນື່ອງຈາກຄວາມຂັດແຍ້ງຂອງພວກເຂົາເຈົ້າໃນຊ່ວງປີ 1950 ຫາປີ 1953 ສິ້ນສຸດລົງດ້ວຍການຢຸດຍິງ, ແຕ່ບໍ່ແມ່ນສົນທິສັນຍາ.
ໃນຂະນະດຽວກັນ, ສະຫະລັດ ກໍໄດ້ປະກາດການລົງໂທດຄັ້ງໃໝ່ ໃນວັນພະຫັດວານນີ້ ຕໍ່ບຸກຄົນຂອງຣັດເຊຍ 2 ຄົນ ແລະບໍລິສັດຂອງຣັດເຊຍອີກ 3 ບໍລິສັດ ສໍາລັບການອຳນວຍຄວາມສະດວກໃຫ້ແກ່ການຂົນສົ່ງອາວຸດລະຫວ່າງ ຣັດເຊຍ ແລະ ເກົາຫຼີເໜືອ, ໃນນັ້ນລວມມີລູກສອນໄຟນຳວິຖີເພື່ອໃຊ້ຢູ່ໃນ ຢູເຄຣນ.
ຟໍຣັມສະແດງຄວາມຄິດເຫັນ