ໂຄສົກຍິງປະຈໍາໂຮງໝໍແຫ່ງນຶ່ງ ກ່າວໃນວັນພະຫັດວານນີ້ວ່າ ນັກສຶກສາຊາວອາເມຣິ
ກັນທີ່ເກົາຫລີເໜືອປ່ອຍຕົວອອກມາ ພາຍຫລັງທີ່ໄດ້ຕິດຄຸກເປັນເວລາ 17 ເດືອນນັ້ນ ຕ້ອງທົນທຸກ ໃນການ "ບາດເຈັບຕໍ່ສະໝອງຢ່າງສາຫັດ.”
ພາຍຫລັງທີ່ໄດ້ກັບຈາກເກົາຫລີເໜືອ ທ້າວ Otto Warmbier ອາຍຸ 22 ປີ ກໍໄດ້ຖືກນໍາ
ສົ່ງໄປໂຮງໝໍສູນກາງການແພດ ຂອງມະຫາວິທະຍາໄລ Cincinnati ບ່ອນທີ່ເຮັດໃຫ້
ອາການຂອງລາວຢູ່ໃນສະພາວະທີ່ທຸ່ນທ່ຽງ.
ອີງຕາມບັນດາທ່ານໝໍ, ທຸກພາກສ່ວນຂອງສະໝອງຂອງທ້າວ Warmbier ຖືກກະທົບໝົດ.
Dr. Daniel Kanter, ທີ່ປິ່ນປົວທ້າວ Warmbier ກ່າວຢູ່ໃນກອງປະຊຸມນັກຂ່າວໃນວັນ
ພະຫັດວານນີ້ວ່າ "ບໍ່ມີຮອງຮອຍສະແດງໃຫ້ເຫັນເລີຍວ່າ ລາວເຂົ້າໃຈພາສາ, ເຮັດຕາມ
ຄໍາສັ່ງໄດ້ ຫລືຮູ້ຈັກວ່າ ຕົນເອງຢູ່ໃສ. ລາວບໍ່ປາກ, ລາວບໍ່ສົນໃຈໃນການເຄື່ອນເໜັງ ຫລືການປະພຶດທີ່ມີຈຸດປະສົງໃດໆເລີຍ."
ທ່ານໝໍ Kanter ແລະເພື່ອນຮ່ວງານຂອງທ່ານ ເວົ້າເພີ້ມອີກວ່າ ພວກເພິ່ນຍັງບໍ່ມີຂໍ້ມູນທີ່
ສາມາດຢືນຢັນໄດ້ວ່າ ມີຫຍັງເກີດຂຶ້ນກັບທ້າວ Warmbier ກ່ອນລາວຈະອອກຈາກ
ເກົາຫລີເໜືອມາ ແລະຕາມການຮ້ອງຂໍຂອງຄອບຄົວລາວ ຂໍ້ມູນເພີ້ມເຕີມກ່ຽວກັບການ
ປະເມີນພະຍາດຂອງຜູ້ກ່ຽວ ແລະຄວາມຫວັງທີ່ຈະຟື້ນຄືນໄດ້ນັ້ນ ຍັງຈະຮັກສາໄວ້ໃຫ້
ເປັນຄວາມລັບ.
ທ່ານ Rex Tillerson ລັດຖະມົນຕີການຕ່າງປະເທດຂອງສະຫະລັດ ໄດ້ກ່າວໃນຕອນ
ເຂົ້າຮ່ວມກອງປະຊຸມ ກ່ຽວກັບພາກພື້ນອາເມຣິກາກາງ ຢູ່ນະຄອນ Miami ໃນວັນພະ
ຫັດວານນີ້ວ່າ "ພວກເຮົາດີໃຈທີ່ເຫັນລາວໄດ້ກັບຄືນມາບ້ານມາຢູ່ກັບຄອບຄົວຂອງລາວ
ອີກ. ພວກເຮົາຈະບໍ່ມີຄໍາເຫັນຫຍັງກ່ຽວກັບສະພາບການທາງສຸຂະພາບຂອງລາວ, ມັນ
ເປັນເລື້ອງສ່ວນຕົວ ທີ່ຂຶ້ນກັບລາວ ແລະຄອບຄົວຂອງລາວ ທີ່ຈະບອກໃຫ້ຮູ້. ພ້ອມກັນນັ້ນ
ພວກເຮົາກໍຈະບໍ່ໃຫ້ຄໍາເຫັນຫຍັງກ່ຽວກັບສະພາບເຈັບປ່ວຍຂອງລາວ ແລະເຫດຜົນທີ່ວ່າ
ເປັນຫຍັງລາວຈຶ່ງເປັນເຊັ່ນນັ້ນ. ສະນັ້ນ ພວກເຮົາບໍ່ມີຫຍັງອີກ ທີ່ຈະເວົ້າກ່ຽວກັບເລື່ອງນີ້ຕື່ມ."
ພໍ່ແມ່ຂອງທ້າວ Warmbier ເວົ້າວ່າ ລູກຊາຍຂອງເຂົາເຈົ້າຢູ່ໃນສະພາບທີ່ບໍ່ຮູ້ສຶກໂຕມາ
ໄດ້ປີກວ່າແລ້ວ ແລະພວກເຂົາເຈົ້າອະທິບາຍວ່າ ການທີ່ລາວຖືກປ່ອຍຕົວ ກໍແມ່ນຍ້ອນ
ເຫດຜົນ ທາງດ້ານສຸຂະພາບ.
ອ່ານຂ່າວນີ້ເພີ້ມເປັນພາສາອັງກິດ
ເບິ່ງວີດິໂອກ່ຽວກັບຂ່າວນີ້ເປັນພາສາອັງກິດ
