ນ້ອງສາວຜູ້ມີອິດທິພົນຂອງຜູ້ນຳເກົາຫຼີເໜືອ ທ່ານ ກິມ ຈົງ ອຶນ ໄດ້ອອກມາເຕືອນກ່ຽວກັບການຕອບໂຕ້ຕໍ່ເກົາຫຼີໃຕ້ຄືນໃໝ່ ຖ້າເກົາຫຼີໃຕ້ຫາກຍັງຄົງສືບຕໍ່ເຜີຍແຜ່ການກະຈາຍສຽງດ້ວຍລໍາໂພງສຽງດັງ ພ້ອມທັງການກະຈາຍໃບປິວ ທ່າມກາງຄວາມເຄັ່ງຕຶງທີ່ກໍາລັງຂຸ້ນຂ້ຽວຂຶ້ນ, ອີງຕາມລາຍງານຂອງອົງການຂ່າວ Reuters.
ທ່ານນາງ ກິມ ໂຢ ຈອງ ກ່າວໃນຖະແຫຼງການສະບັບນຶ່ງ ທີ່ເຜີຍແຜ່ໂດຍອົງການຂ່າວສູນກາງຂອງເກົາຫຼີເໜືອ ຫຼື KCNA ໃນຕອນແລງຂອງວັນອາທິດວານນີ້ ດ້ວຍການນໍາໃຊ້ຊື່ທາງການຂອງເກົາຫຼີໃຕ້ ແລະ ເກົາຫຼີເໜືອ ວ່າ “ຖ້າ ສາທາລະນະລັດເກົາຫຼີ ຫຼື ເກົາຫຼີໃຕ້ (ROK) ດຳເນີນການເກາະຜິດດ້ວຍການແຜ່ກະຈາຍໃບປິວ ແລະກະຈາຍສຽງດ້ວຍລຳໂພງສຽງດັງ ຢູ່ບໍລິເວນຂົງເຂດຊາຍແດນ, ແນ່ນອນວ່າ ຕົນຈະໄດ້ເປັນພະຍານເຖິງການຕອບໂຕ້ຄັ້ງໃໝ່ຂອງ ສ. ປ. ປ. ເກົາຫຼີ ຫຼື ເກົາຫຼີເໜືອ (DPRK).”
ກອງທັບຂອງເກົາຫລີໃຕ້ກ່າວວ່່າ ຕົນໄດ້ດໍາເນີນການກະຈາຍສຽງດ້ວຍລໍາໂພງໂດຍກົງໃສ່ເກົາຫລີເໜືອ ໃນວັນອາທິດວານນີ້, ພາຍຫຼັງການກ່າວເຕືອນວ່າ ຕົນຈະປະຕິບັດການດັ່ງກ່າວນັ້ນ ຖ້າພຽງຢາງ ຫາກຍັງຄົງສືບຕໍ່ສົ່ງບາລລູນທີ່ບັນຈຸຂີ້ເຫຍື້ອເຂົ້າໄປໃນ ເກົາຫຼີໃຕ້.
ເກົາຫຼີເໜືອ, ໃນວັນເສົາແລ້ວນີ້ ໄດ້ດໍາເນີນການປ່ອຍບາລລູນທີ່ບັນຈຸຂີ້ເຫຍື້ອຈໍານວນ 330 ລູກ, ຊຶ່ງກອງທັບຂອງເກົາຫຼີໃຕ້ກ່າວວ່າ ບາລລູນປະມານ 80 ລູກໄດ້ລອຍຂ້າມບໍລິເວນຊາຍແດນເຂົ້າໄປໃນເກົາຫຼີໃຕ້. ໃນວັນຈັນມື້ນີ້, ເກົາຫລີໃຕ້ ກ່າວອີກວ່າ ມີການປ່ອຍບາລລູນເພີ້ມອີກຈໍານວນ 310 ລູກ, ໂດຍມີປະມານ 50 ລູກ ຕົກລົງສູ່ບໍລິເວນຂົງເຂດຂອງ ເກົາຫຼີໃຕ້.
ທ່ານ ກິມ, ເຊິ່ງເປັນຮອງຜູ້ອຳນວຍການກົມຂອງພັກແຮງງານທີ່ປົກຄອງປະເທດໃນປັດຈຸບັນ ໂດຍກ່າວເຖິງການກະຈາຍສຽງດ້ວຍລໍາໂພງຂອງເກົາຫຼີໃຕ້ວ່າ “ນີ້ເປັນການສະແດງອອກແບບຈະແຈ້ງຕໍ່ສະຖານະການທີ່ອັນຕະລາຍທີ່ສຸດ.”
ຟໍຣັມສະແດງຄວາມຄິດເຫັນ