ເກົາຫຼີເໜືອໄດ້ອອກມາປະນາມ ສະຫະລັດ ທີ່ໄດ້ປະກາດໃຊ້
ມາດຕາການລົງໂທດຮອບໃໝ່ ຕໍ່ຕົນ ຊຶ່ງເປັນການລົງໂທດ
ຕໍ່ການທີ່ເກົາຫຼີເໜືອລັກເຈາະຂໍ້ມູນຄອມພິວເຕີ້ ຂອງບໍລິສັດ
Sony Pictures ຕາມທີ່ມີການກ່າວຫານັ້ນ.
ອົງການສູນກາງຂ່າວຂອງເກົາຫຼີເໜືອ ໄດ້ອ້າງເຖິງຄຳເວົ້າຂອງ
ໂຄສົກກະຊວງການຕ່າງປະເທດເກົາຫຼີເໜືອ ທີ່ເອີ້ນມາດຕາ
ການລົງໂທດນັ້ນວ່າ ເປັນການ “ປໍລະປັກ ແລະ ປາບປາມ”
ແລະ ກ່າວຕໍ່ໄປວ່າ ມັນມີແຕ່ຈະເຮັດໃຫ້ຄວາມຕັ້ງໃຈ ແລະ ຄວາມ
ເດັດດ່ຽວ ຂອງພຽງຢາງ ໜັກແໜ້ນຂຶ້ນ ເພື່ອປ້ອງກັນອະທິປະໄຕ
ຂອງປະເທດ.
ປະທານາທິບໍດີສະຫະລັດ ທ່ານລາຣັກ ໂອບາມາ ໃນວັນສຸກຜ່ານມາ ໄດ້ລົງນາມໃນ
ຄຳສັ່ງບໍລິຫານ ທີ່ອະນຸຍາດໃຫ້ນຳໃຊ້ການລົງໂທດຊຸດຫລ້າສຸດນີ້ ຕໍ່ເກົາຫຼີເໜືອ ຊຶ່ງ
ແນໃສ່ 3 ອົງການຈັດຕັ້ງ ແລະ 10 ສ່ວນບຸກຄົນ. ບັນດາເຈົ້າໜ້າທີ່ທຳນຽບຂາວ ກ່າວວ່າ
ການລົງໂທດນັ້ນ ເປັນພຽງບາດກ້າວທຳອິດ ເພື່ອລົງໂທດຕໍ່ເກົາຫຼີເໜືອ ທີ່ໄດ້ທຳການ
ທ້າທາຍເກາະຜິດຈຳນວນນຶ່ງ ຮວມທັງການໂຈມຕີທາງອິນເຕີແນັດ.
ຖະແຫຼງການສະບັບນຶ່ງຂອງກະຊວງການເງິນສະຫະລັດ ກ່າວວ່າ ການລົງໂທດໃໝ່ນີ້ ຈະ
ເຮັດໃຫ້ການລົງໂທດຕໍ່ເກົາຫຼີເໜືອ ທີ່ມີຢູ່ແລ້ວ ນັ້ນ ຮັດເຄັ່ງຂຶ້ນກວ່າເກົ່າ ໂດຍ ປະຕິເສດ
ບໍ່ໃຫ້ພວກທີ່ຖືກລະບຸໂຕ ເຂົ້າເຖິງລະບົບການເງິນຂອງສະຫະລັດ ຕະຫລອດທັງປ້ອງກັນ
ບໍ່ໃຫ້ພົນລະເມືອງສະຫະລັດ ພົວພັນກັບການຕິດຕໍ່ ຄ້າຂາຍກັບເກົາຫຼີເໜືອ.
