ເກົາຫລີເໜືອ ກ່າວໃນວັນເສົາມື້ນີ້ວ່າ ຕົນໄດ້ທົດລອງຍິງລູກ
ສອນໄຟຂີປະນາວຸດ ຈາກເຮືອດຳນຳ້ຢ່າງສຳເລັດຜົນ ອັນເປັນ
ການຊີ້ບອກໃຫ້ເຫັນເຖິງຄວາມກ້າວໜ້າດ້ານເທັກໂນໂລຈີ
ທາງທະຫານ ຂອງປະເທດ.
ເຈົ້າໜ້າທີ່ ອົງການຂ່າວສູນກາງຂອງທາງການເກົາຫລີເໜືອ
ຫລື KCNA ກ່າວວ່າ ຜູ້ນຳເກົາຫລີເໜືອ ທ່ານ Kim Jong
Un ໄດ້ໄປຮ່ວມນຳ ແລະໄດ້ອອກຄຳສັ່ງດ້ວຍຕົນເອງ ໃຫ້ເລີ້ມ
ການທົດລອງຍິງ. ທ່ານ Kim ກ່າວວ່າ ການຍິງລູກສອນໄຟ
ດັ່ງກ່າວໄດ້ “ເປັນຄວາມສຳເລັດທີ່ເປີດຫູເປີດຕາ” ແລະ “ໄດ້
ກ່າວຄຳຍ້ອງຍໍເປັນຢ່າງສູງ” ຕໍ່ບັນດານັກວິທະຍາສາດ ແລະພວກນາຍຊ່າງ “ທີ່ໄດ້ສ້າງເທັກໂນໂລຈີ ຂອງການຍິງລູກສອນໄຟຂີປະນາວຸດ ຈາກເຮືອດຳນໍ້າ ໃຫ້ປະສົບຄວາມສຳເລັດ
ຢ່າງດີເລີດ.”
ລາຍງານຂອງອົງການຂ່າວ KCNA ບໍ່ໄດ້ເປີດເຜີຍເຖິງ ເວລາ ວັນທີ ແລະສະຖານທີ່ ອັນແທ້ຈິງຂອງການທົດລອງ ຫລືໄລຍະທີ່ຍິງໄດ້ຂອງ ລູກສອນໄຟ.
ບັນດານັກວິເຄາະ ມີຄວາມເຫັນຂັດແຍ້ງກັນ ກ່ຽວກັບວ່າ ເກົາຫລີເໜືອ ໄດ້ພັດທະນາ ໂຄງ
ການລູກສອນໄຟຂີປະນາວຸດຈາກເຮືອດຳນ້ຳ ໄປ ກ້າວໜ້າໜ້ອຍຫລາຍສ່ຳໃດແລ້ວ ໂດຍ
ອ້າງເຫດຜົນເຖິງຄວາມເກົ່າແກ່ລ້າສະໄໝຂອງເຮືອດຳນໍ້າ ທີ່ເກົາຫລີເໜືອມີຢູ່.
ເກົາຫລີເໜືອ ຍັງຢູ່ພາຍໃຕ້ການລົງໂທດຂອງສະຫະປະຊາຊາດ ທີ່ ຫ້າມບໍ່ໃຫ້ພັດທະນາ
ຫລືໃຊ້ ເທັກໂນໂລຈີລູກສອນໄຟຂີປະນາວຸດ.
