ບັນດາເຈົ້າໜ້າທີ່ເກົາຫຼີໃຕ້ ກ່າວວ່າ ເກົາຫຼີເໜືອ ໄດ້ຍິງລູກສອນໄຟ
ລະຍະສັ້ນ ຈາກພາກພື້ນດິນຫາອາກາດ 7 ລູກ ລົງສູ່ທະເລ ໃນວັນ
ພະຫັດວານນີ້.
ຄະນະເສນາທິການຮ່ວມຂອງເກົາຫຼີໃຕ້ ໄດ້ເປີດເຜີຍໃຫ້ຊາບ ໃນ
ຖະແຫລງການສັ້ນໆ ສະບັບນຶ່ງ ໃນວັນສຸກມື້ນີ້ວ່າ ລູກສອນໄຟ
ດັ່ງກ່າວໄດ້ຍິງຈາກເຂດແຄມຝັ່ງທະເລ ກ້ຳຕາເວັນຕົກ ຂອງ
ເກົາຫຼີເໜືອ ເມື່ອຕອນເດີກຂອງວັນພະຫັດວານນີ້ ແລະ ໄດ້ຕົກລົງ
ໃສ່ທະເລຢູ່ນອກແຄມຝັ່ງ ທາງພາກຕາເວັນອອກ ຂອງປະເທດ
ດັ່ງກ່າວ.
ເຈົ້າໜ້າທີ່ ຜູ້ປະສົງບໍ່ບອກຊື່ຄົນນຶ່ງ ກ່າວວ່າ ຄະນະເສນາທິການຮ່ວມເຊື່ອວ່າ ຜູ້ນຳ
ເກົາຫຼີເໜືອ ທ່ານ Kim Jong Un ໄດ້ເຂົ້າຊົມການຍິງທົດລອງດັ່ງກ່າວນີ້.
ພຽງຢາງ ທຳການຍິງທົດລອງ ລູກສອນໄຟ ຈະຫລວດ ແລະປືນໃຫຍ່ ຢູ່ເປັນປະຈຳ ເພື່ອ
ປະທ້ວງຕໍ່ການຊ້ອມລົບຮ່ວມປະຈຳປີທາງທະຫານ ລະຫວ່າງ ສະຫະລັດ ແລະ ເກົາຫຼີໃຕ້.
ນຶ່ງໃນການຊ້ອມລົບທີ່ມີຊື່ວ່າ Key Resolve ນັ້ນ ໄດ້ມ້ວນທ້າຍລົງໃນວັນສຸກມື້ນີ້ ແຕ່ການຊ້ອມລົບອີກບັ້ນນຶ່ງ ທີ່ມີຊື່ວ່າ Foal Eagle ແມ່ນມີກຳນົດ ຈະດຳເນີນຕໍ່ໄປຈົນ
ຮອດວັນທີ 24 ເມສາ.
ພຽງຢາງໄດ້ຮຽກຮ້ອງເປັນເວລາດົນນານມາແລ້ວ ໃຫ້ສະຫະລັດ ແລະ ເກົາຫຼີໃຕ້ ຍຸດຕິ
ການຊ້ອມລົບຮ່ວມປະຈຳປີ ທີ່ເກົາຫຼີເໜືອເອີ້ນມັນວ່າ“ເປັນການເຝິກຊ້ອມເຕັມອັດຕາ
ຂັ້ນສຸດທ້າຍ ເພື່ອບຸກຂຶ້ນໄປທາງພາກເໜືອ.” ໂຊລ ແລະ ວໍຊິງຕັນຢືນຢັດວ່າ ການຊ້ອມ ລົບເຫຼົ່ານີ້ ແມ່ນຢູ່ໃນລັກສະນະ ເປັນການປ້ອງກັນຫຼືຍັບຍັ້ງເທົ່ານັ້ນ.
