ພັກຄອມມິວນິສຕ໌ທີ່ປົກຄອງເກົາຫລີເໜືອ ໄດ້ຮຽກກອງປະຊຸມພັກ ທີ່ບໍ່ຄ່ອຍມີຂຶ້ນນັ້ນ ເພື່ອເລືອກເອົາຄະນະນຳພາໃໝ່.
ກົມການເມືອງຂອງສູນກາງພັກພັກຄອມມິວນິສຕ໌ເກົາຫລີເໜືອປະກາດ ໃນວັນເສົາວານນີ້ວ່າ ກອງປະຊຸມດັ່ງກ່າວ ຊຶ່ງຈະຈັດຂຶ້ນໃນເດືອນກັນຍານັ້ນ ແມ່ນຈະເລືອກເອົາ “ຄະນະນຳພາສູງສຸດ” ຂອງພັກ ແລະຈະເປັນກອງປະຊຸມຫລວງຄັ້ງທຳອິດຂອງພັກຄົນງານແຫ່ງເກົາຫລີ ນັບແຕ່ປີ 1966 ມາ. ກອງປະຊຸມຂະໜາດໃຫຍ່ຂອງພັກເທື່ອຫລ້າສຸດ ຊຶ່ງມີຂຶ້ນໃນປີ 1980 ໄດ້ມອບບົດບາດນຳພາໃຫ້ທ່ານ Kim Jong-Il ທີ່ໄດ້ສືບທອດອຳນາດຕໍ່ຈາກ ບິດາ ຄືທ່ານ Kim Il-Sung ທີ່ໄດ້ເສຍຊີວິດໄປໃນປີ 1994.
ນັກວິເຄາະຂ່າວບາງຄົນເຊື່ອວ່າ ກອງປະຊຸມພັກຄັ້ງນີ້ ຈະໃຫ້ການຢືນຢັນແກ່ສະຖານະພາບຂອງ Kim Jong-Un ລູກຊາຍຫລ້າຂອງທ່ານ Kim Jong-Il ໃນຖານະເປັນຜູ້ສືບທອດອຳນາດຕໍ່ຈາກບິດາ.
