ຜູ້ນຳຂອງເກົາຫຼີເໜືອ ໄດ້ເຊື້ອເຊີນຄູ່ຕຳແໜ່ງຝ່າຍເກົາຫຼີໃຕ້ ໃຫ້ໄປຢ້ຽມຢາມເກົາຫຼີ
ເໜືອ ໃນເວລາທີ່ພວກຜູ້ນຳ ຂອງທັງສອງປະເທດ ເຫັນວ່າ ມີຄວາມສະດວກ.
ຍານາງກິມ ໂຢ ຈົງ ນ້ອງສາວ ຂອງທ່ານກິມ ຈົງ ອຶນ ໄດ້ທຳການເຊື້ອເຊີນດັ່ງກ່າວ ດ້ວຍຕົວຍານາງເອງ ລະຫວ່າງການພົບປະໃນວັນເສົາມື້ນີ້ ກັບປະທານາທິບໍດີມູນ
ແຈ ອິນ ຂອງເກົາຫຼີໃຕ້ ທີ່ທຳນຽບສີຟ້າ.
ທ່ານມູນ ແຈ ອິນ ປະທານາທິບໍດີເກົາຫຼີໃຕ້ກ່າວຕອບຕໍ່ການເຊື້ອເຊີນດັ່ງກ່າວນີ້ວ່າ “ຂໍໃຫ້ພວກເຮົາ ຈົ່ງເຮັດໃຫ້ການຢ້ຽມຢາມນີ້ເກີດຂຶ້ນ ໂດຍສ້າງເງື່ອນໄຂ ທີ່ຈຳເປັນ ໃນອະນາຄົດ.”
ພັກການເມືອງຕ່າງໆ ໃນເກົາຫຼີໃຕ້ ມີປະຕິກິລິຍາແບບປະສົມປະສານ ຕໍ່ການເຊື້ອ
ເຊີນຂອງເກົາຫຼີເໜືອ. ໂຄສົກຂອງພັກປະຊາທິປະໄຕຊຶ່ງເປັນພັກລັດຖະບານກ່າວ
ວ່າ ການພົບປະກັບເກົາຫຼີເໜືອ ຈະສ້າງແຮງກະຕຸ້ນທີ່ສຳຄັນຕໍ່ການສ້າງສັນຕິພາບ ໃນແຫຼມເກົາຫຼີ.
ແຕ່ບັນດາພັກຝ່າຍຄ້ານຮຽກຮ້ອງໃຫ້ລະມັດລະວັງແລະຍັງມີຄວາມສົງໄສກ່ຽວກັບ
ຄວາມຕັ້ງໃຈອັນແທ້ຈິງຂອງພຽງຢາງ ໃນການເຊື້ອເຊີນຜູ້ນຳເກົາຫຼີໃຕ້.
ໃນທາງການແລ້ວ ນ້ອງສາວຂອງກິມ ຈົງ ອຶນ ເດີນທາງໄປເກົາຫຼີໃຕ້ ໃນຖານະທີ່
ເປັນສ່ວນນຶ່ງຂອງຄະນະຜູ້ແທນລະດັບສູງເກົາຫຼີເໜືອເພື່ອເຂົ້າຮ່ວມພິທີເປີດການ
ແຂ່ງຂັນກິລາໂອລິມປິກ.
ແຕ່ແນວໃດກໍຕາມ ລາຍງານຂ່າວຂອງອົງການຂ່າວຢອນຮັບແຈ້ງວ່າ ຍານາງໄດ້
ເດີນທາງໄປເກົາຫຼີໃຕ້ ໃນຖານະ “ທູດພິເສດຂອງຜູ້ນຳເກົາຫຼີເໜືອ.”
ຍານາງກິມ ໂຢ ຈົງ ຊຶ່ງເປັນສະມາຊິກໃນຄອບຄົວຄົນທຳອິດຂອງລະບອບທີ່ປົກ
ຄອງເກົາຫຼີເໜືອ ມາເປັນເວລາດົນນານ ໄດ້ເດີນທາງໄປຢ້ຽມຢາມເກົາຫຼີໃຕ້ ນັບ
ແຕ່ສົງຄາມເກົາຫຼີ ແຕ່ປີ 1950 ຫາ 1953 ໄດ້ສິ້ນສຸດລົງ.
ຍານາງ ແລະຄະນະຜູ້ຕິດຕາມ ຮວມທັງທ່ານກິມ ຢົງ ນຳ ປະມຸກໃນທາງພິທີການ
ຂອງເກົາຫຼີເໜືອ ໄດ້ເຂົ້າຮ່ວມພິທີເປີດການແຂ່ງຂັນກິລາໂອລິມປິກໃນວັນສຸກມື້ນີ້
ແລະຄາດວ່າ ຈະຢູ່ທີ່ເກົາຫຼີໃຕ້ ໄປຈົນຮອດວັນອາທິດ.
ຍານາງກິມ ໂຢ ຈົງ ເປັນສະມາຊິກຂັ້ນສູງ ພັກກຳມະກອນເກົາຫຼີເໜືອ ຊຶ່ງເປັນພັກ
ລັດຖະບານ ແລະເປັນທີ່ປຶກສາຄົນສຳຄັນ ໃຫ້ແກ່ອ້າຍຂອງຍານາງ.
