ບາລລູນຂອງເກົາຫຼີເໜືອໄດ້ຖິ້ມອາຈົມ ແລະຂີ້ເຫຍື້ອອື່ນໆ ລົງຕາມຖະໜົນຫົນທາງທີ່ແອອັດ, ຢູ່ຕໍ່ໜ້າບ່ອນຢູ່ອາໄສ, ແລະໃນບໍລິເວນອື່ນໆ ທົ່ວ ເກົາຫຼີໃຕ້ ໃນວັນພຸດມື້ນີ້, ອີງຕາມການລາຍງານຂອງສື່ທ້ອງຖິ່ນ ແລະກອງທັບເກົາຫຼີໃຕ້, ທ່າມກາງຄວາມເຄັ່ງຕຶງທີ່ເພີ້ມຂຶ້ນ ຄັ້ງຫຼ້າສຸດຂອງພຽງຢາງ ກັບເພື່ອນບ້ານທາງພາກໃຕ້ຂອງຕົນ.
ຫົວໜ້າເສນາທິການຮ່ວມຂອງເກົາຫລີໃຕ້ ກ່າວວ່າ ຕົນໄດ້ກວດພົບບາລລູນ ປະມານ 260 ລູກ, ເຊິ່ງຢ່າງໜ້ອຍ ບາງໜ່ວຍຂອງພວກມັນ ມີສິ່ງເປິະເປື້ອນ ແລະຂີ້ເຫຍື້ອ, ໂດຍກ່າວຫາວ່າ ເປັນການກະທຳທີ່ "ໄຮ້ມະນຸດສະທຳ ແລະລະດັບຕ່ຳ" ຂອງເກົາຫລີເໜືອ.
ອົງການຂ່າວ ຢອນຮັບ (Yonhap) ຂອງເກົາຫຼີໃຕ້ ໄດ້ລາຍງານວ່າ ບາລລູນບາງໜ່ວຍບັນຈຸສານໃດນຶ່ງ, “ເຊິ່ງເຖິງແມ່ນວ່າ ຍາກທີ່ຈະຢືນຢັນໄດ້ກໍຕາມ, ແຕ່ສັນນິຖານວ່າ ເປັນອາຈົມ ຍ້ອນມີສີເຂັ້ມ ແລະ ມີກິ່ນເໝັນ”.
ສື່ມວນຊົນອື່ນໆລາຍງານວ່າ ມີການພົບເຫັນບາລລູນດັ່ງກ່າວ ໄກອອກໄປທາງໃຕ້ ຈົນຮອດແຂວງ ແຈວລາ (Jeolla) ໃກ້ກັບພາກໃຕ້ສຸດຂອງແຜ່ນດິນໃຫຍ່ຂອງເກົາຫລີໃຕ້ ໂດຍສະແດງໃຫ້ເຫັນວ່າ ບາລລູນໄດ້ແຜ່ກະຈາຍອອກໄປທົ່ວປະເທດ.
ຮູບພາບທີ່ເຜີຍແຜ່ໂດຍກອງທັບເກົາຫຼີໃຕ້ ໄດ້ສະແດງໃຫ້ເຫັນ ຂີ້ເຫຍື້ອຫຼາຍປະເພດ, ບາງສ່ວນປະສົມກັບສານສີນ້ຳຕານທີ່ບໍ່ໄດ້ຖືກລະບຸ, ວາງຢູ່ທົ່ວຖະໜົນຫົນທາງ ແລະ ຢູ່ທາງໜ້າລະບຽງ, ລວມທັງໃນນະຄອນຫຼວງ ໂຊລ. ຮູບພາບນຶ່ງ ສະແດງໃຫ້ເຫັນອຸປະກອນເອເລັກໂຕຣນິກ, ເຊິ່ງກອງທັບກ່າວວ່າ ໄດ້ຖືກອອກແບບມາເພື່ອເຮັດໃຫ້ບາລລູນພລາສຕິກທີ່ບາງ ແຕກ.
ຟໍຣັມສະແດງຄວາມຄິດເຫັນ