ເກົາຫຼີເໜືອ ໄດ້ໃຊ້ເງິນເກືອບ 100 ລ້ານໂດລາ ໃສ່ການທົດລອງລູກສອນໄຟ ຫຼາຍກວ່າ 30 ເທື່ອ ນັບຕັ້ງແຕ່ ທ່ານ Kim Jong Un ເຂົ້າກຳອຳນາດໃນປີ 2011 ເປັນຕົ້ນມາ, ຊຶ່ງໄດ້ມີການທົດລອງລູກສອນໄຟເພີ້ມຂຶ້ນເປັນເກືອບສອງເທົ່າ ຂອງໄລຍະ 18 ປີ ເວລາທີ່ບິດາ ຂອງທ່ານ Kim Jong Un ກໍຄື ທ່ານ Kim Jong Il ປົກຄອງປະເທດ.
ໜັງສືພິມ Chosun Ilbo ຂອງເກົາຫຼີໃຕ້ ກະປະມານວ່າ ລາຄາຂອງລູກສອນໄຟເກົາຫຼີ ເໜືອ ອີງຕາມໃນອັນທີ່ໜັງສືພິມກ່າວວ່າ ເປັນລາຄາທີ່ບັນດາປະເທດໃນຕາເວັນອອກກາງ ໄດ້ຈ່າຍສຳຫຼັບອາວຸດພວກນີ້.
ໃນໄລຍະຫຼາຍກວ່າ 2 ທົດສະວັດຜ່ານມານີ້ ເກົາຫຼີເໜືອມີລາຍງານວ່າ ໄດ້ຂາຍລູກສອນໄຟເຫຼົ່ານີ້ ຈຳນວນຫຼາຍຮ້ອຍລູກ ພ້ອມທັງອຸບປະກອນແລະເທັກໂນໂລຈີຕ່າງໆ ໃຫ້ແກ່ອີຈິບ, ອີຣ່ານ ລີເບຍ, ປາກິສຖານ ຊິເຣຍ ແລະ ສະຫະລັດອາຣັບ Emirates ແລະ ເຢເມນ.
ກົາຫຼີເໜືອ ແມ່ນສາມາດທຳການຍິງທົດລອງລູກສອນໄຟຫຼາຍຄັ້ງ ທີ່ພາໃຫ້ມີຄຳຖາມກ່ຽວກັບວ່າ ການລົງໂທດຢ່າງແຂງຂັນຂອງອົງການສະຫະປະຊາຊາດທີ່ມີຕໍ່ເກົາຫຼີເໜືອ ໃນເດືອນມີນາຜ່ານມາ ແມ່ນມີປະສິດທິຜົນຫຼາຍປານໃດ ທີ່ຮວມທັງ ການຫ້າມຂາຍອາວຸດຍຸດໂທປະກອນ ແລະການຈຳກັດຮັດແຄບໃນການຂາຍນ້ຳ ມັນເຊື້ອໄຟສຳຫຼັບເຮືອບິນ ຊຶ່ງເປັນພະລັງງານ ທີ່ໃຊ້ໃນຂັບດັນຈະຫລວດ.
ທ່ານ Boo Hyeong-wook ຫົວໜ້າຝ່າຍຄົ້ນຄວ້າຍຸດທະສາດດ້ານປ້ອງກັນປະເທດ ທີ່ສະຖາບັນວິໄຈຂອງເກົາຫຼີໃຕ້ ໄດ້ກ່າວວ່າ ພຽງຢາງ ແມ່ນໄດ້ຮັບສ່ວນປະກອບຕ່າງໆຂອງລູກສອນໄຟ ຜ່ານທາງການລົງໂທດທີ່ບໍ່ເຂັ້ມງວດ ແລະຈາກບັນດາປະເທດພາຄີນາໆຊາດ
ທີ່ພ້ອມທີ່ຈະຊ່ອຍ.
“ດັ່ງທີ່ສື່ມວນຊົນຂອງອິນເດຍ ໄດ້ລາຍງານໃນເດືອນມິຖຸນາຜ່ານມາ ປາກິສຖານ ໄດ້ຈັດສົ່ງຫຼາຍໆຊິ້ນສ່ວນທີ່ຈຳເປັນ ສຳຫຼັບອາວຸດທີ່ມີອະນຸພາບທີ່ຮ້າຍແຮງ ໃຫ້ ເກົາຫຼີເໜືອ ຜ່ານທາງຈີນ ເພາະສະນັ້ນ ໃນສະຖານະການນີ້ ຂ້າພະເຈົ້າສົງໄສວ່າ ຈີນ ຍັງບໍ່ທັນໄດ້ເຂັ້ມງວດການລົງໂທດກ່ຽວກັບການຊື້ຊິ້ນສ່ວນຂອງເກົາຫຼີເໜືອ ທີ່ພະຍາຍາມຈະໄດ້ຮັບມາ ນັ້ນ,” ຊຶ່ງທ່ານ Hyeong-wook ໄດ້ກ່າວໄວ້”
