ເກົາຫຼີເໜືອ ກ່າວວ່າ ຄວາມພະຍາຍາມຂອງຕົນ ໃນການຍິງສົ່ງດາວທຽມ ສອດແນມທາງທະຫານ ໜ່ວຍໃໝ່ ຂຶ້ນສູ່ວົງໂຄຈອນ ກໍໄດ້ຈົບລົງດ້ວຍຄວາມລົ້ມແຫຼວ ໃນວັນຈັນວານນີ້ ເມື່ອເຄື່ອງຈັກຂອງຈະຫຼວດ ທີ່ພັດທະນາຂຶ້ນໃໝ່ ໄດ້ລະເບີດຂຶ້ນ ໃນລະຫວ່າງການບິນຂຶ້ນຢູ່ນັ້ນ, ອີງຕາມອົງການຂ່າວ Reuters.
ຄວາມພະຍາຍາມດັ່ງກ່າວ ໄດ້ມີຂຶ້ນບໍ່ເທົ່າໃດຊົ່ວໂມງ ຫຼັງຈາກພຽງຢາງໄດ້ອອກຄຳເຕືອນວ່າ ຕົນຈະພະຍາຍາມຍິງດາວທຽມຂຶ້ນ ພາຍໃນວັນທີ 4 ມິຖຸນາ ເຊິ່ງຖືເປັນດາວທຽມສອດແນມໜ່ວຍທີສອງຂອງຕົນ ທີ່ຈະຢູ່ໃນວົງໂຄຈອນ.
ໃນທາງກົງກັນຂ້າມ, ການປ່ອຍຂຶ້ນດັ່ງກ່າວ ໄດ້ກາຍເປັນຄວາມລົ້ມແຫຼວຫຼ້າສຸດຂອງຝ່າຍເຫນືອ ທີ່ມີອາວຸດນິວເຄລຍ, ພາຍຫຼັງເກີດອຸບັດຕິເຫດຮ້າຍແຮງອີກສອງຄັ້ງເມື່ອປີກາຍນີ້. ປະເທດດັ່ງກ່າວ ໄດ້ສົ່ງດາວທຽມສອດແນມໜ່ວຍທຳອິດຂອງຕົນ ຂຶ້ນສູ່ວົງໂຄຈອນໄດ້ຢ່າງສຳເລັດຜົນ ໃນເດືອນພະຈິກ.
"ການຍິງຈະຫຼວດບັນທຸກດາວທຽມລຸ້ນໃໝ່ຂຶ້ນ ໄດ້ປະສົບຄວາມລົ້ມແຫຼວ ເມື່ອມັນໄດ້ລະເບີດຂຶ້ນໃນກາງອາກາດ ໃນລະຫວ່າງການບິນຂຶ້ນໄລຍະທຳອິດ", ຮອງຜູ້ອຳນວຍການໃຫຍ່ອົງການເທັກໂນໂລຈີການບິນ ແລະອາວະກາດແຫ່ງຊາດຂອງເກົາຫຼີເໜືອ ກ່າວໃນລາຍງານທີ່ເຜີຍແຜ່ໂດຍສື່ມວນຊົນຂອງລັດ.
ບົດລາຍງານ ໄດ້ລະບຸວ່າ ການວິເຄາະເບື້ອງຕົ້ນສະແດງໃຫ້ເຫັນວ່າ ສາເຫດແມ່ນມາຈາກເຄື່ອງຈັກຂອງລູກສອນໄຟທີ່ໃຊ້ນ້ຳມັນເຊື້ອໄຟແຫຼວທີ່ພັດທະນາຂຶ້ນໃໝ່, ແຕ່ສາເຫດທີ່ເປັນໄປໄດ້ອື່ນໆ ກໍຍັງຢູ່ໃນລະຫວ່າງການສືບສວນ.
ເຈົ້າໜ້າທີ່ເກົາຫຼີໃຕ້ ແລະຍີ່ປຸ່ນ ໄດ້ລາຍງານກ່ອນໜ້ານີ້ວ່າ ການຍິງຂຶ້ນດັ່ງກ່າວເບິ່ງຄືວ່າຈະລົ້ມແຫຼວ.
ເກົາຫຼີເໜືອໄດ້ຍິງສົ່ງລູກສອນໄຟດັ່ງກ່າວຂຶ້ນ ຢູ່ເສັ້ນທາງກ້ຳຝັ່ງຕາເວັນຕົກສຽງຂອງຕົນ ໃນເວລາປະມານ 10 ໂມງ 44 ນາທີ ຕາມເວລາໃນທ້ອງຖິ່ນ, ຫົວໜ້າເສນາທິການຮ່ວມຂອງເກົາຫຼີໃຕ້ ຫຼື JCS ກ່າວ.
ແນວໃດກໍຕາມ, JCS ກ່າວວ່າ ຕົນໄດ້ກວດພົບຊາກຫັກພັງຈຳນວນຫຼາຍຈາກລູກຈະຫຼວດດັ່ງກ່າວ ໃນທະເລ ພຽງສອງນາທີຫຼັງຈາກການຍິງສົ່ງຂຶ້ນ.
ວັດຖຸທີ່ເກົາຫຼີເໜືອຍິງຂຶ້ນນັ້ນ ໄດ້ຫາຍສາບສູນໄປ ໃນທະເລເຫຼືອງ, ຫົວໜ້າຄະນະລັດຖະບານຍີ່ປຸ່ນ ທ່ານ ໂຢຊິມາຊະ ຮາຢາຊິ (Yoshimasa Hayashi) ກ່າວຕໍ່ບັນດານັກຂ່າວ, ໂດຍໄດ້ກ່າວຕື່ມວ່າ ລັດຖະບານ ຄາດການວ່າ ບໍ່ມີຫຍັງໄດ້ເຂົ້າໄປສູ່ອາວະກາດ.
ຟໍຣັມສະແດງຄວາມຄິດເຫັນ