ລິ້ງ ສຳຫລັບເຂົ້າຫາ

ວັນອັງຄານ, ໑໖ ກໍລະກົດ ໒໐໒໔

ເກົາຫຼີເໜືອ ກ່າວວ່າ ຕົນໄດ້ທໍາການທົດລອງລູກສອນໄຟຂີປະນາວຸດແບບໃໝ່ ທີ່ມີຄວາມສາມາດບັນທຸກ 'ຫົວລົບຂະໜາດໃຫຍ່'


ພາບທີ່ໄດ້ຮບການເຜີຍແຜ່ໂດຍອົງການສູນກາງຂ່າວຂອງລັດຖະບານເກົາຫຼີເໜືອ (KCNA) ໂດຍ KNS ໃນວັນທີ 2 ກໍລະກົດ 2024, ສະແດງໃຫ້ເຫັນຜູ້ນໍາເກົາຫຼີເໜືອ ທ່ານກິມ ຈົງ ອຶນ ເຂົ້າຮ່ວມກອງປະຊຸມໃຫຍ່ຄັ້ງທີ 10 ຄະນະສູນກາງພັກຄັ້ງທີ 8 ຂອງພັກແຮງງານເກົາຫຼີ.
ພາບທີ່ໄດ້ຮບການເຜີຍແຜ່ໂດຍອົງການສູນກາງຂ່າວຂອງລັດຖະບານເກົາຫຼີເໜືອ (KCNA) ໂດຍ KNS ໃນວັນທີ 2 ກໍລະກົດ 2024, ສະແດງໃຫ້ເຫັນຜູ້ນໍາເກົາຫຼີເໜືອ ທ່ານກິມ ຈົງ ອຶນ ເຂົ້າຮ່ວມກອງປະຊຸມໃຫຍ່ຄັ້ງທີ 10 ຄະນະສູນກາງພັກຄັ້ງທີ 8 ຂອງພັກແຮງງານເກົາຫຼີ.

ເກົາຫຼີເໜືອກ່າວວ່າ ຕົນໄດ້ທົດລອງຍິງລູກສອນໄຟຂີປະນາວຸດ​ຍຸດ​ທະ​ວິ​ທີ​ລູກໃໝ່ ທີ່ສາມາດບັນທຸກອັນທີ່ເອີ້ນວ່າ “ຫົວລົບທີ່ມີຂະໜາດໃຫຍ່ທີ່ສຸດ.”

ອົງການຂ່າວ KCNA ຂອງລັດຖະບານກ່າວວ່າ ການຍິງລູກສອນໄຟ ຮົວຊອງໂພ-11 ດີເອ-4.5 (Hwasongpho-11 Da-4.5) ໃນວັນຈັນວານນີ້ ແມ່ນເພື່ອພິສູດຄວາມໝັ້ນຄົງ ແລະຄວາມຖືກຕ້ອງກ່ຽວກັບການບິນຂອງ ລູກສອນໄຟ ດ້ວຍການຈໍາລອງການບັນທຸກໜັກ. ບົດ​ລາຍ​ງານ​ກ່າວ​ວ່າ ລູກ​ສອນ​ໄຟ​ດັ່ງກ່າວ​ສາມາດ​ບັນທຸກ​ຫົວ​ລົບໄດ້ໃນນໍ້າໜັກ 4.5 ໂຕນ, ເຊິ່ງບົດລາຍ​ງານ​ບໍ່​ໄດ້​ບອກ​ວ່າ ການ​ທົດ​ລອງດັ່ງກ່າວດຳ​ເນີນ​ຂຶ້ນ​ຢູ່​ໃສ ​ແລະ​ລູກ​ສອນ​ໄຟ​ໄດ້​ຕົກລົງຢູ່​ບໍລິເວນໃດ.

ບົດລາຍ​ງານ​ໃນ​ວັນ​ອັງຄານ​ມື້​ນີ້ ມີ​ຂຶ້ນ​ນຶ່ງ​ມື້​ຫລັງ​ຈາກ​ກອງທັບ​ເກົາຫລີ​ໃຕ້ກ່າວ​ວ່າ ເກົາຫລີ​ເໜືອ​ ໄດ້​ຍິງ​ລູກ​ສອນ​ໄຟ​ຂີ​ປະ​ນາ​ວຸດ, ເຊິ່ງເປັນລູກທີສອງທີ່ບິນ​ຂຶ້ນ​ຢ່າງ​ຜິດ​ປົກກະຕິ​ບໍ່​ດົນ​ຫລັງ​ຈາກ​ໄດ້​ຍິງ​ຂຶ້ນ​ແລ້ວ ​ແລະ​ໄດ້​ຕົກລົງ​ໃສ່​ເຂດ​ທີ່​ບໍ່​ໄກ​ຈາກ​ນະຄອນຫຼວງ​ພຽງ​ຢາງ.

ໂຄສົກ​ກອງທັບ​ເກົາຫຼີ​ໃຕ້​ຄົນ​ນຶ່ງ​ກ່າວ​ຕໍ່​ບັນດາ​ນັກ​ຂ່າວ​ວ່າ ​ການ​ລາຍ​ງານ​ຂອງ ​ເກົາຫຼີ​ເໜືອ​ ກ່ຽວ​ກັບ​ການ​ທົດ​ລອງ​ການບິນຂອງລູກ​ສອນ​ໄຟ​ຄັ້ງ​ໃໝ່​ນັ້ນ ​ແມ່ນ​ມີ​ທ່າທີ​ວ່າເປັນສິ່ງທີ່ສ້າງຂຶ້ນມາ. ເກົາຫຼີເໜືອ ໄດ້ກ່າວອ້າງໃນສິ່ງທີ່ຄ້າຍຄືກັນ ຂອງອາທິດແລ້ວນີ້ ກ່ຽວກັບລູກສອນໄຟອັນໃໝ່ທີ່ສາມາດບັນທຸກຫົວລົບ ໄດ້ຫຼາຍຫົວ, ເຊິ່ງລັດຖະບານໂຊລ ຍັງໄດ້ປະຕິເສດວ່າ ນີ້ເປັນ “ການຫຼອກ ລວງ ແລະ ເກີນຄວາມເປັນຈິງ.”

​ໃນ​ຂະນະ​ດຽວ​ກັນ, ກອງທັບ​ເກົາຫລີ​ໃຕ້ກ່າວ​ວ່າ ຕົນ​ໄດ້​ທໍາ​ການ​ຊ້ອມ​ລົບ​ຍິງ​ລູກ​ປືນ​ແທ້​ໃນ​ວັນ​ອັງຄານ​ມື້​ນີ້ ໃກ້ຊາຍ​ແດນ​ທີ່​ມີ​ປ້ອມ​ປ້ອງ​ກັນ​ຢ່າງແໜ້ນໜາ​ກັບ​ເກົາຫລີ​ເໜືອ. ການ​ຊ້ອມ​ຮົບ​ຄັ້ງ​ນີ້ ​ເປັນ​ຄັ້ງ​ທຳ​ອິດ​ນັບ​ແຕ່​ນະຄອນຫຼວງໂຊ​ລ​ໄດ້ທໍາການ​ໂຈະ​ຂໍ້​ຕົກລົງ​ປີ 2018 ກັບ​ພຽງ​ຢາງ ​ເພື່ອ​ແນເປົ້າໝາຍ​ໃສ່ການ​ຫຼຸດຜ່ອນ​ຄວາມ​ເຄັ່ງ​ຕຶງ​ທາງ​ທະຫານ​ຢູ່​ຕາມຂົງເຂດ​ຊາຍ​ແດນ.

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG