ຜູ້ນຳ ເກົາຫຼີເໜືອ ທ່ານ ກິມ ຈົງ ອຶນ ໄດ້ຂົ່ມຂູ່ທີ່ຈະໃຊ້ອາວຸດນິວເຄລຍ ແລະ ທຳລາຍ ເກົາຫຼີໃຕ້ ຢ່າງຖາວອນ ຖ້າຖືກຍຸແຍ່, ສື່ມວນຊົນລັດຖະບານໄດ້ລາຍ ງານໃນວັນສຸກມື້ນີ້, ຫຼັງຈາກຜູ້ນຳ ເກົາຫຼີໃຕ້ ໄດ້ເຕືອນວ່າ ລະບອບການປົກ ຄອງຂອງທ່ານ ກິມ ຈະພັງທະລາຍລົງຖ້າທ່ານພະຍາຍາມທີ່ຈະໃຊ້ອາວຸດນິວ ເຄລຍ.
ການໃຊ້ຄຳເວົ້າຕອບໂຕ້ກັນລະຫວ່າງຄູ່ແຂ່ງສອງເກົາຫຼີນັ້ນບໍ່ແມ່ນສິ່ງທີ່ໃໝ່, ແຕ່ຄຳເຫັນຫຼ້າສຸດນີ້ໄດ້ມີຂຶ້ນໃນລະຫວ່າງທີ່ມີຄວາມຂັດແຍ້ງກັນຫຼາຍຂຶ້ນ ກ່ຽວກັບ ການເປີດເຜີຍຂໍ້ມູນໂຮງງານນິວເຄລຍຂອງ ເກົາຫຼີເໜືອ ແລະ ການທົດລອງລູກສອນໄຟຂີປະນາວຸດຢ່າງຕໍ່ເນື່ອງ. ໃນອາທິດໜ້າ, ບັນດາ ນັກສັງເກດການເວົ້າວ່າ ສະພາກາຢາງຂອງ ເກົາຫຼີເໜືອ ແມ່ນຄາດວ່າຈະປະ ກາດໃຊ້ລະບົບ “ສອງລັດ“ ທີ່ບໍ່ເປັນມິດຕາມລັດຖະທໍາມະນູນຕໍ່ແຫຼມເກົາຫຼີ ເພື່ອປະຕິເສດການປອງດອງກັນຢ່າງເປັນທາງການກັບ ເກົາຫຼີໃຕ້ ແລະ ກຳນົດເຂດຊາຍແດນຂອງປະເທດໃໝ່.
ໃນລະຫວ່າງການຢ້ຽມຢາມກອງກຳລັງປະຕິບັດການພິເສດໃນວັນພຸດທີ່ຜ່ານມາ, ທ່ານ ກິມ ໄດ້ກ່າວວ່າກອງທັບຂອງທ່ານ “ຈະໃຊ້ກໍາລັງໂຈມຕີທັງໝົດທີ່ເຂົາ ເຈົ້າມີໂດຍບໍ່ລັງເລໃຈ, ລວມທັງອາວຸດນິວເຄລຍ,” ຖ້າ ເກົາຫຼີໃຕ້ ພະຍາຍາມ ທີ່ຈະໃຊ້ກຳລັງອາວຸດລ່ວງລໍ້າອຳນາດອະທິປະໄຕຂອງ ເກົາຫຼີເໜືອ, ອີງຕາມ ອົງການຂ່າວສູນກາງຂອງທາງການ ເກົາຫຼີເໜືອ.
ທ່ານ ກິມ ໄດ້ກ່າວ ໂດຍໃຊ້ຊື່ທາງການຂອງ ເກົາຫຼີໃຕ້ວ່າ “ຖ້າສະຖານະ ການດັ່ງກ່າວເກີດຂຶ້ນ, ການມີຢູ່ຢ່າງຖາວອນຂອງລັດຖະບານ ໂຊລ ແລະ ສາທາລະນະລັດ ເກົາຫຼີ ແມ່ນຈະເປັນໄປບໍ່ໄດ້.”
ຄຳຖະແຫຼງຂອງທ່ານ ກິມ ແມ່ນການຕອບໂຕ້ຕໍ່ຄຳປາໄສຂອງປະທານາທິບໍດີ ເກົາຫຼີໃຕ້ ທ່ານ ຢູນ ຊຸກ ຢອລ ຢູ່ວັນກອງກຳລັງຕິດອາວຸດຂອງປະເທດທ່ານ ໃນວັນອັງຄານທີ່ຜ່ານມາ. ການເປີດຕົວລູກສອນໄຟຂີປະນາວຸດ Hyunmoo-5 ທີ່ມີພະລັງທີ່ສຸດ ແລະ ອາວຸດທຳມະດາອື່ນໆທີ່ອາດແນເປົ້າໃສ່ ເກົາຫຼີເໜືອ, ທ່ານ ຢູນ ໄດ້ກ່າວວ່າວັນທີ່ ເກົາຫຼີເໜືອ ພະຍາຍາມຈະໃຊ້ອາວຸດນິວເຄລຍ ຈະເປັນການສິ້ນສຸດຂອງລັດຖະບານທ່ານ ກິມ ເພາະວ່າທ່ານ ກິມ ຈະປະ ເຊີນກັບ “ການຕອບໂຕ້ທີ່ເດັດດ່ຽວ ແລະ ຖ້ວມລົ້ນ” ຈາກ ເກົາຫຼີໃຕ້ ແລະ ພັນທະມິດ ສະຫະລັດ.
ຟໍຣັມສະແດງຄວາມຄິດເຫັນ