ເກົາຫລີເໜືອເວົ້າວ່າ ຕົນໄດ້ສົ່ງນັກການທູດຂັ້ນສູງຂອງປະເທດໄປຍັງຣັດເຊຍ ຖ້າມກາງຄວາມພະຍາຍາມອັນຮີບເຮັ່ງໃນການຜ່ອນຄາຍຄວາມເຄັ່ງຕຶງໃນ
ແຫລມເກົາຫລີ.
ອົງການສູນກາງຂ່າວທາງການເກົາຫລີເໜືອ ຫລື Korean Central News Agency ເວົ້າໃນປະໂຫຍກນຶ່ງຂອງຂ່າວວ່າ ລັດຖະມົນຕີກະຊວງການຕ່າງປະເທດຂອງເກົາຫລີເໜືອ ທ່ານ Park Ui-Chun ໄດ້ເດີນທາງໄປຍັງນະຄອນຫລວງມົສກູ. ແຕ່ຫົວຂໍ້ຂ່າວນັ້ນ ກໍບໍ່ໄດ້ໃຫ້ລາຍລະອຽດຫຍັງເພີ້ມເຕີມ.
ໃນວັນສຸກວານນີ້ ທ່ານ Park ໄດ້ບອກກັບອົງການຂ່າວຂອງຣັດເຊຍ Interfax ວ່າ ລັດຖະບານນະຄອນພຽງຢາງໄດ້ໃຫ້ເຫດຜົນເພື່ອຢັ້ງຢືນວ່າການທີ່ຕົນໄດ້ສ້າງກຳລັງປ້ອງກັນດ້ວຍອາວຸດນີວເຄລຍ ກໍແມ່ນເພື່ອເປັນການປ້ອງກັນຕົນເອງໃນການຕ້ານກັບໄພຂົ່ມຂູ່ຈາກເກົາຫລີໃຕ້ ແລະ ສະຫະລັດຊຶ່ງທ່ານໄດ້ກ່າວຫາວ່າ ສອງປະເທດນີ້ ໄດ້ດຳເນີນນະໂຍບາຍແບບເປັນປໍລະປັກ ແລະ ລົບລາຮາວີກັນ ຕໍ່ເກົາຫລີເໜືອ.
