ເກົາຫຼີເໜືອໄດ້ທ້າທາຍຕໍ່ການປະທ້ວງຂອງປະຊາຄົມນາໆຊາດໂດຍທຳການຍິງຈະຫຼວດໄລ
ຍະໄກໃນວັນສຸກມື້ນີ້ ແຕ່ລູກຈະຫຼວດໄດ້ແຕກອອກຈາກກັນ ແລະຕົກລົງໃສ່ທະເລ ໂດຍບໍ່
ໄດ້ສ້າງຄວາມເສຍຫາຍໃດໆ ບໍ່ດົນຫຼັງຈາກທີ່ໄດ້ຍິງຂຶ້ນ.
ອົງການຂ່າວຂອງທາງການເກົາຫຼີເໜືອຮັບຮູ້ວ່າ ຈະຫຼວດທີ່ມີທັງໝົດ 3 ທ່ອນບໍ່ ສາມາດທີ່
ຈະສົ່ງໃນອັນທີ່ເກົາຫຼີເໜືອເອີ້ນວ່າ ດາວທຽມພະຍາກອນອາກາດຂຶ້ນສູ່ວົງໂຄຈອນໄດ້. ລາຍ
ງານສັ້ນໆແຈ້ງວ່າ ພວກນັກວິທະຍາສາດກຳລັງສຶກສາເບິ່ງວ່າ ແມ່ນຫຍັງຄືສາເຫດທີ່ພາໃຫ້
ເກີດຄວາມລົ້ມແຫຼວໃນຄັ້ງນີ້ແຕ່ບໍ່ໄດ້ໃຫ້ລາຍລະ ອຽດຫຍັງຫຼາຍໄປກວ່ານີ້.
ກອງບັນຊາການໃນເຂດພາກເໜືອ ຂອງກອງທັບສະຫະລັດກ່າວວ່າ ຮ່ອງຮອຍໃນຂັ້ນຕົ້ນ
ສະແດງໃຫ້ເຫັນວ່າ ຈະຫຼວດທ່ອນທຳອິດ ໄດ້ຕົກລົງໃສ່ທະເລເຫຼືອງປະມານ 165 ກິໂລ
ແມັດ ຫ່າງຈາກແຄມຝັ່ງຂອງເກົາຫຼີໃຕ້ ແລະເວົ້າຕໍ່ໄປວ່າ ສຳລັບຈະຫຼວດສອງທ່ອນທີ່ຍັງ
ເຫຼືອ ກໍໄດ້ປະສົບກັບຄວາມລົ້ມແຫຼວ ກ່ອນທີ່ຈະຕົກລົງໃສ່ທະເລ.
ລັດຖະມົນຕີກະຊວງປ້ອງກັນ
ປະເທດຍີ່ປຸ່ນ ທ່ານ Naoki
Tanaka ກ່າວວ່າ ເປັນທີ່ປະ
ກົດວ່າ ຈະຫຼວດໄດ້ພຸ່ງຂຶ້ນປະ
ມານ 1 ນາທີເຖິງໄລຍະ 120
ກິໂລແມັດໃນອະວະກາດກ່ອນ
ທີ່ຈະແຕກອອກຈາກກັນ.
ເຈົ້າໜ້າທີ່ປ້ອງກັນປະເທດເກົາຫຼີ
ໃຕ້ກ່າວວ່າກອງທັບເຮືອຂອງຕົນ
ພ້ອມທັງເຮືອລົບຂອງສະຫະລັດ
ຣັດເຊຍ ແລະຈີນກຳລັງຢູ່ໃນບໍລິ
ເວນດັ່ງກ່າວ ເພື່ອຊອກຄົ້ນຫາ
ຊາກຂອງຈະຫຼວດທີ່ຕົກລົງມາ.
ການຍິງລູກຈະຫຼວດຂອງເກົາຫຼີເໜືອໄດ້ຖືກປະນາມໃນທັນທີໂດຍສະຫະລັດແລະບັນດາປະ
ເທດພັນທະມິດ ທີ່ເຊື່ອກັນວ່າການຍິງຈະຫຼວດໃນຄັ້ງນີ້ ແມ່ນເພື່ອເປັນການປິດບັງການທົດ
ລອງລູກສອນໄຟຂີປະນາວຸດ ທີ່ຖືກຫ້າມພາຍໃຕ້ມະຕິຂອງອົງການສະຫະປະຊາຊາດນັ້ນ.
ທ່ານ Ban Ki-moon ເລຂາທິການໃຫຍ່ອົງການສະຫະປະຊາຊາດ ເອີ້ນການຍິງລູກສອນ
ໄຟຂອງເກົາຫຼີເໜືອວ່າເປັນການກະທຳທີ່ໜ້າເສຍໃຈແລະເປັນການທ້າທາຍເກາະຜິດ.
ລັດຖະມົນຕີການຕ່າງປະເທດເກົາຫຼີໃຕ້ ທ່ານ Kim Sung-Hwan ກ່າວວ່າ ກຸງໂຊລຈະໃຊ້
ມາດຕະການຕອບໂຕ້ ທີ່ບໍ່ໄດ້ລະບຸຊື່ ຕໍ່ການຍິງຈະຫຼວດຂອງເກົາຫຼີເໜືອໂດຍເວົ້າວ່າ ເກົາຫຼີ
ເໜືອຕ້ອງຮັບເອົາຄວາມຮັບຜິດຊອບໂດຍເຕັມໃນການກະທຳຂອງຕົນ.
ຫ້ອງການຂອງທ່ານ Kim ຍັງແຈ້ງໃຫ້ຊາບວ່າ ທ່ານໄດ້ໂອ້ລົມກັບລັດຖະມົນຕີການຕ່າງປະ
ເທດສະຫະລັດທ່ານນາງ Hillary Clinton ແລະໃຫ້ຄຳໝັ້ນສັນຍາວ່າຈະເອົາມາດຕະການ
ແບບເດັດຂາດ ໂດຍເຫັນພ້ອມນຳກັນວ່າຈະສົ່ງບັນຫາດັ່ງກ່າວນີ້ໄປຍັງອົງການສະຫະປະຊາ
ຊາດ.
ໃນຖະແຫຼງການສະບັບນຶ່ງທີ່ນຳອອກເຜີຍແຜ່ບໍ່ດົນຫຼັງຈາກໄດ້ມີການຍິງຈະຫຼວດຂອງເກົາຫຼີ
ເໜືອແລ້ວ ໂຄສົກຂອງທຳນຽບຂາວໄດ້ປະນາມໃນອັນທີ່ທ່ານເອີ້ນວ່າ ການທ້າທາຍເກາະຜິດ
ຂອງເກົາຫຼີເໜືອໂດຍເວົ້າວ່າ ມັນຂົ່ມຂູ່ຕໍ່ຄວາມໝັ້ນຄົງພູ ມີພາກແລະເປັນການລ່ວງລະເມີດ
ຕໍ່ກົດໝາຍນາໆຊາດ.
ສຳລັບກຸ່ມແປດປະເທດທີ່ຈະເລີນທາງດ້ານອຸສາຫະກຳກໍໄດ້ປະນາມການຍິງຈະຫຼວດດັ່ງກ່າວ
ແລະຮຽກຮ້ອງໃຫ້ເກົາຫຼີເໜືອ ບໍ່ໃຫ້ທຳການທົດລອງໃດໆຕື່ມອີກ ໂດຍໃຊ້ເທັກໂນໂລຈີລູກ
ສອນໄຟຂີປະນາວຸດ. ນອກນັ້ນກຸ່ມແປດປະເທດຍັງໄດ້ເຕືອນວ່າຕົນອາດຈະພິຈາລະຈາເພື່ອ
ເອົາມາດທີ່ເໝາະສົມຕໍ່ເກົາຫຼີເໜືອ.
ສະພາຄວາມໝັ້ນຄົງອົງການສະຫະປະຊາຊາດຈະພົບປະກັນໃນວັນສຸກມື້ນີ້ເພື່ອປຶກສາຫາລື
ກ່ຽວກັບບັນຫາດັ່ງກ່າວ ແຕ່ມີທ່າທາງວ່າ ຈະບໍ່ສາມາດຮັບຜ່ານມາດຕະການລົງໂທດໃໝ່ຕໍ່
ເກົາຫຼີເໜືອໄດ້.
ລັດຖະມົນຕີການຕ່າງປະເທດຣັດເຊຍທ່ານ Sergei Lavrov ກ່າວຕໍ່ພວກນັກຂ່າວວ່າມົສກູ
ຈະບໍ່ໃຫ້ການສະໜັບສະໜຸນຄັ້ງໃໝ່ໃນການລົງໂທດຕໍ່ພຽງຢາງໂດຍເວົ້າວ່າ ມັນຈະບໍ່ຊ່ອຍ
ຫຍັງຫຼາຍໃນການແກ້ໄຂສະຖານະການ. ຈີນຊຶ່ງເປັນພັນທະມິດທີ່ສຳຄັນສຸດຂອງເກົາຫຼີເໜືອ
ບໍ່ໄດ້ໃຫ້ຄວາມເຫັນໃດກ່ຽວກັບການຍິງຈະຫຼວດຂອງເກົາຫຼີເໜືອໂດຍຮຽກຮ້ອງໃຫ້ທຸກຝ່າຍ
ໃຊ້ຄວາມຢັບຢັ້ງ.