ລັດຖະບານເກົາຫຼີເໜືອ ໄດ້ທຳການໂຮມຊຸມນຸມຄັ້ງໃຫຍ່
ທີ່ກຸງພຽງຢາງ ເພື່ອສະແດງການສະໜັບສະໜຸນ ຕໍ່ເປົ້າ
ໝາຍຂອງນະໂຍບາຍ ທີ່ໄດ້ແຈ້ງໃຫ້ຊາບ ຢູ່ໃນຄຳອວຍ
ພອນເນື່ອງໃນໂອກາດວັນຂຶ້ນປີໃໝ່ສາກົນປະຈຳປີນັ້ນ.
ຊາວເກົາຫຼີເໜືອປະມານ 100,000 ຄົນທີ່ເຂົ້າຮ່ວມໃນ
ການໂຮມຊຸມນຸມໃນມື້ວັນຈັນວານນີ້ໄດ້ພາກັນຖືທຸງຊາດ
ແລະຮ້ອງຄຳຂວັນ ຊົມເຊີຍຜູ້ນຳສູງສຸດ ຂອງປະເທດຄື
ທ່ານກິມຈົງອິລແລະມື້ລາງບິດາຂອງທ່ານຄືທ່ານກິມອິລ
ຊຸງ.
ນອກນັ້ນ ພວກທີ່ໄປຮ່ວມການໂຮມຊຸມນຸມ ຍັງໄດ້ໃຫ້ຄຳໝັ້ນສັນຍາທີ່ຈະຈັດຕັ້ງປະຕິບັດ
ເປົ້າໝາຍວັນຂຶ້ນປີໃໝ່ຂອງລັດຖະບານເກົາຫຼີເໜືອທີ່ໄດ້ພິມເຜີຍແຜ່ໂດຍສື່ມວນຊົນ ຂອງ
ທາງການເກົາຫຼີເໜືອໃນມື້ວັນເສົາແລ້ວ. ເປົ້າໝາຍເຫຼົ່ານີ້ແມ່ນຮວມທັງທຳການພັດທະນາ
ເກົາຫຼີເໜືອ ຊຶ່ງເປັນປະເທດທີ່ມີເສດຖະກິດທຸກຍາກນັ້ນດ້ວຍການຟື້ນຟູອຸດສາຫະກຳເບົາ ແລະປັບປຸງຄວາມສຳພັນກັບເກົາຫຼີໃຕ້ ໂດຍຜ່ານການເຈລະຈາຫາລື.
ເກົາຫຼີເໜືອໄດ້ປະກາດວ່າ ຈະພັດທະນາຕົນໃຫ້ກາຍເປັນປະເທດທີ່ຍິ່ງໃຫຍ່ ມີອິດທິພົນ
ແລະອຸດົມຮັ່ງມີ ພາຍໃນປີ 2012 ຊຶ່ງເປັນໂອກາດຂີດໝາຍວັນເກີດຄົບຮອບ 100 ປີ
ຂອງທ່ານກິມອິລຊຸງ ຊຶ່ງມີການນັບຖືກັນວ່າ ເປັນປະທານາທິບໍດີ ຕະຫຼອດໄປຂອງເກົາ
ຫຼີເໜືອນັ້ນ. ທ່ານກິມຈິງອິລຜູ້ນຳຄົນປັດຈຸບັນໄວ 68 ປີຂອງເກົາຫຼີເໜືອ ພວມທຳການ
ກະກຽມ ໃນການມອບໂອນ ການສືບທອດຕຳແໜ່ງ ຫຼືໂອນອຳນາດຕາມສາຍເລືອດອີກ
ຄັ້ງນຶ່ງໃຫ້ແກ່ລູກຊາຍຫຼ້າຂອງທ່ານ ຄືທ້າວກິມຈົງອຸນ.
