ລິ້ງ ສຳຫລັບເຂົ້າຫາ

ເກົາຫຼີ​ເໜືອ ​ສະ​ເໜີ​ ໃຫ້ເຈົ້າໜ້າທີ່ ສິດທິມະນຸດ ສປຊ ໄປ​ຢ້ຽມ​ຢາມ


ທ່ານ Marzuki Darusman ນັກສືບສວນ​ພິເສດ ຂອງສະຫະປະຊາຊາດ ກ່ຽວກັບການລະເມີດສິດທິ​ມະ​ນຸດ ໃນເກົາຫຼີເໜືອ.

ບັນດາ​ເຈົ້າໜ້າ​ທີ່ສະຫະ​ປະຊາ​ຊາດ ກ່າວ​ວ່າ ​ເກົາຫຼີ​ເໜືອ ​ໄດ້​
ສະ​ເໜີ​ອະນຸຍາດ​ ໃຫ້​ພະນັກງານ​ສືບສວນ​ສອບ​ສວນ ດ້ານສິດທິ
​ມະ​ນຸດຂອງ​ສະຫະ​ປະຊາ​ຊາດ ​ໄປ​ຢ້ຽມ​ຢາມ ປະ​ເທດ​ຄອມ​ມິ​ວນິສ
ທີ່​ໂດດດ່ຽວດັ່ງກ່າວ.

​ການສະ​ເໜີ​ດັ່ງກ່າວ ໄດ້ມີ​ຂຶ້ນໃນການພົບປະລະຫວ່າງບັນດາ​
ເຈົ້າໜ້າ​ທີ່ພຽງ​ຢາງ ​ແລະ ທ່ານ Marzuki Darusman ນັກສືບ
ສວນ​ພິເສດ ກ່ຽວກັບການລະເມີດສິດທິ​ມະ​ນຸດ ໃນເກົາຫຼີເໜືອ
ຂອງ​ສະຫະ​ປະຊາ​ຊາດ ໃນ​ວັນ​ຈັນ​ວານ​ນີ້.

ທ່ານ Darusman ມີ​ກຳນົດ​ ທີ່​ຈະ​ເປີດ​ເຜີຍ​ລາຍ​ງານ​ສະບັບນຶ່ງ
ໃນ ທ້າຍອາທິດນີ້ ເພື່ອສະເໜີແນະຕໍ່ສະພາ​ຄວາມ​ໝັ້ນຄົງ ໃຫ້​ສົ່ງປະຫວັດ​ ການລະເມີດ​
ສິດທິ​ມະນຸດ​ຂອງເກົາຫຼີ​ເໜືອ ​ໄປ​ຍັງ​ສານ​ອາ​ຍາສາກົນ ຫຼື ICC. ​

ບັນດາ​ເຈົ້າໜ້າ​ທີ່​ສະຫະປະຊາ​ຊາດ​ ກ່າວ​ວ່າ ໃນ​ວັນ​ຈັນ​ວານ​ນີ້ ພວກ​ເຈົ້າໜ້າ​ທີ່ເກົາຫຼີ​ເໜືອ
ຮຽກຮ້ອງໃຫ້ທ່ານ Darusman ​ລຶບ​ຂໍ້ຄວາມ​ກ່ຽວ​ກັບ​ການທີ່ຈະສົ່ງປະຫວັດເກົາຫຼີເໜືອໄປ
ຍັງ ICC ນັ້ນອອກ ​ແຕ່​ບໍ່​ໄດ້​ລະບຸ​ຢ່າງ​ຊັດ​ເຈນວ່າ​ ມີ​ສ່ວນກ່ຽວ​ພັນ​ກັບ​ການ​ໄປຢ້ຽມ​ຢາມ
​ທີ່​ອາດ​ມີຂຶ້ນນັ້ນ​ ແຕ່​ຢ່າງ​ໃດ.

ສະພາ​ຄວາມ​ໝັ້ນຄົງ​ສະຫະ​ປະຊາ​ຊາດຄາດ​ວ່າຈະທຳ​ການ​ລົງຄະແນນ ສຽງ​ກ່ຽວ​ກັບ
ເລື້ອງນີ້​ ໃນ​ທ້າ​ຍ​ເດືອນ​ພະຈິກ​. ຈີນຊຶ່ງ​ເປັນ​ພັນທະ​ມິດ​ຂອງ​ເກົາຫຼີ​ເໜືອ ​ໄດ້ສະ​ແດງ​
ເຈດ​ຕະນາ​ວ່າ ​ຕົນ​ອາດຈະໃຊ້ສິດຢັບຢັ້ງຕໍ່ຍັດຕິດັ່ງກ່າວ.

​ເກົາຫຼີ​ເໜືອ ​ແມ່ນ​ເຊື່ອກັນ​ວ່າ​ ມີ​ປະຫວັດ ​ກ່ຽວກັບການນັບຖື​ສິດທິ​ມະນຸດ​ ທີ່​ຂີ້ລ້າຍ​ທີ່​ສຸດ
ໃນ​ໂລກ.

​ໃນ​ເດືອນ​ກຸມພາ​ຕົ້ນປີ​ນີ້ ຄະນະ​ສືບ​ສວນ​ອົງການ​ສະຫະ​ປະຊາ​ຊາດ ​ໄດ້​ຍື່ນ​ສະເໜີລາຍ
​ງານສະບັບນຶ່ງທີ່​ສະ​ລຸ​ບວ່າ ພຽງ​ຢາງ​ມີ​ຄວາມ​ຜິດ​ກ່ຽວ​ກັບ ການ​ກໍ່ໂທດກຳຕ້ານມະນຸດຊາດ
ລວມທັງ​ການ​ຄາດ​ຕະກຳ ການ​ທໍລະມານ ການ​ບັງ​ຄັບ​ໃຊ້ແຮງງານແບບ​ຂ້າ​ທາດ​ ແລະ
ການຂົ່ມ​ຂືນສຳ​ເລົາ.

ພຽງ​ຢາງ ໄດ້​ປະຕິ​ເສດ​ຕໍ່​ລາຍ​ງານ​ດັ່ງກ່າວວ່າ​ ບໍ່​ມີ​ມູນ​ຄວາມ​ຈິງ ​ແລະ ມີຈຸດປະສົງທາງ
ການເມືອງ ​ແຕ່​ໃນລະຫວ່າງສອງສາມອາທິດ​ຜ່ານມານີ້ ພຽງ​ຢາງໄດ້​ສະ​ແດງ​ຮ່ອງຮອຍ
ໃຫ້ເຫັນວ່າ ຕົນພ້ອມແລ້ວ​ທີ່​ຈະ​ທຳ​ການ​ເຈລະຈາ​ກັບ​ບັນດາເຈົ້າໜ້າ​ທີ່ສະຫະ​ປະຊາ​ຊາດ
​ເພື່ອ​ຫລີກ​ເວັ້ນບໍ່ ໃຫ້ສະເໜີເລື່ອງຂອງຕົນ ​ຕໍ່ ICC ທີ່​ອາດເປັນ​ໄປ​ໄດ້​ນັ້ນ.

XS
SM
MD
LG