ການປະກາດດັ່ງກ່າວນີ້ແມ່ນມີຂຶ້ນ ໃນໄລຍະພຽງສອງເດືອນກວ່າ ຫລັງຈາກການອະສັນ
ຍະກໍາຂອງມື້ລາງ ທ່ານກິມ ຈົງອິລ ຜູ້ນໍາສູງສຸດຂອງປະເທດປິດລັບຄອມມີວນີສເກົາຫລີ
ເໜືອນັ້ນ.
ທ່ານນາງ ຮິລແລຣີ ຄລິນຕັນ ລັດຖະມົນຕີຕ່າງປະເທດສະຫະລັດກ່າວວ່າ ເຖິງແມ່ນຍັງມີ
ຄວາມເປັນຫ່ວງອັນລໍ້າເລິກກ່ຽວກັບພຶດຕິການຂອງເກົາຫລີເໜືອນັ້ນຢູ່ກໍຕາມ ແຕ່ການ
ປະກາດດັ່ງກ່າວນີ້ ກໍສະທ້ອນໃຫ້ເຫັນເຖິງຄວາມກ້າວໜ້າ.
“ໃນໂອກາດການເຖິງແກ່ກໍາຂອງທ່ານກິມຈົງອິລນັ້ນ ຂ້າພະເຈົ້າໄດ້ເວົ້າໄວ້ວ່າ
ມັນເປັນຄວາມຫວັງຂອງພວກເຮົາທີ່ວ່າ ຄະນະນໍາພາຊຸດໃໝ່ຂອງເກົາ ຫລີ
ເໜືອຈະເລືອກທີ່ຈະນໍາພາປະເທດຊາດຂອງເຂົາເຈົ້າ ໄປບົນເສ້ນທາງໄປສູ່ສັນ
ຕິພາບ ໂດຍການປະຕິບັດຕາມພັນທະຕ່າງໆຂອງຕົນ. ຄໍາປະກາດໃນວັນນີ້
ແມ່ນເປັນບາດກ້າວພໍປະມານອັນທໍາອິດ ໄປໃນທິດທາງທີ່ຖືກຕ້ອງ.”
ທໍານຽບຂາວກໍໄດ້ສະແດງຄວາມ
ຍິນດີນໍາຄໍາປະກາດດັ່ງກ່າວເຊ່ນ
ກັນ ໂດຍເອີ້ນວ່າ “ມັນເປັນບາດ
ກ້າວໃນທາງບວກ” ແຕ່ກໍເນັ້ນຍໍ້າ
ວ່າ ສະຫະລັດກໍາລັງລໍຖ້າເບິ່ງວ່າ
ເກົາຫລີເໜືອຈະລົງມືປະຕິບັດ
ຕາມຄໍາປະກາດນັ້ນ.
ວໍຊິງຕັນກ່າວວ່າ ຕົນກໍພ້ອມແລ້ວ
ທີ່ຈະເຄຶ່ອນໄຫວໄປໜ້າກັບແຜນ
ການຕ່າງໆເພື່ອສະໜອງການ
ຊ່ວຍເຫລືອອາຫານໃນປະລິມານ
240,000 ໂຕນ ໃນໄລຍະນຶ່ງປີ
ໃຫ້ແກ່ເກົາຫລີເໜືອ. ທັງສອງ
ປະເທດຍັງຈະຕ້ອງໄດ້ເຮັດລາຍ
ລະອຽດກັນກ່ອນ ກ່ອນທີ່ການ
ຈັດສົ່ງການຊ່ວຍເຫລືອຈະເລີ່ມ
ຂຶ້ນໄດ້.
ໄພນໍ້າຖ້ວມ ແລະຜົນເກັບກ່ຽວທີ່ບໍ່ດີເມື່ອປີຜ່ານມາໄດ້ກໍ່ໃຫ້ເກີດມີຄວາມອຶດຫິວລະບາດ
ໄປທົ່ວເກົາຫລີເໜືອ. ໃນຊຸມປີ 1990 ນັ້ນ ປະເທດທີ່ທຸກຈົນຍາກແຄ້ນປະເທດນີ້ ກໍໄດ້
ປະສົບກັບການອຶດອາຫານຢ່າງໜັກບັ້ນນຶ່ງ ທີ່ເຊື່ອວ່າໄດ້ເອົາຊີວິດຜູ້ຄົນໄປຫລາຍຮ້ອຍ
ພັນຄົນນັ້ນ.
ພວກເຈົ້າໜ້າທີ່ສະຫະລັດແລະເກົາຫລີ
ເໜືອກ່າວວ່າ ນອກເໜືອຈາກການໂຈະ
ການທົດລອງລູກສອນໄຟແລະນີວເຄລຍ
ແລ້ວ ເກົາຫລືເໜືອຍັງໄດ້ຕົກລົງ ທີ່ຈະ
ອະນຸຍາດໃຫ້ເຈົ້າໜ້າທີ່ກວດກາຈາກອົງ
ການພະລັງງານປະລະມະນູສາກົນ ຫລື
IAEA ຂອງສະຫະປະຊາຊາດ ເຂົ້າໄປ
ສໍາຫລວດເບິ່ງໂຮງງານນີວເຄລຍແຫ່ງ
ຕ່າງໆ ເພື່ອໃຫ້ພວກເຂົາເຈົ້າສາມາດ
ພິສູດແລະຕິດຕາມເບິ່ງການໂຈະກິດຈະ
ກໍາເສີມສະມັດຖະພາບທາດຢູເຣນຽມນັ້ນ.
ເມື່ອປີ 2009 ເກົາຫລີເໜືອໄດ້ຂັບໄລ່ເຈົ້າໜ້າທີ່ກວດກາຂອງອົງການ IAEA ອອກຈາກ
ປະເທດ ຫລັງຈາກຖອນຕົວອອກຈາກອັນທີ່ເອີ້ນວ່າ ການເຈລະຈາຫົກຝ່າຍ ເພື່ອຍຸຕິໂຄງ
ການອາວຸດນີວເຄລຍຂອງຕົນນັ້ນ.
ອີງຕາມຂໍ້ຕົກລົງຊຸດໃໝ່ນີ້ ພຽງຢາງຈະອະນຸຍາດໃຫ້ພວກເຈົ້າໜ້າທີ່ກວດກາເຂົ້າໄປເບິ່ງ
ໂຮງງານນີວເຄລຍໃຫຍ່ທີ່ Yongbyon ແລະສະຖານນີວເຄລຍຍ່ອຍອື່ນໆ. ນອກນີ້ ພວກ
ເຈົ້າໜ້າທີ່ສະຫະລັດຍັງກ່າວວ່າ ເຈົ້າໜ້າທີ່ກວດກາຈະໄປພິສູດ ເພື່ອຢືນຢັນການໃຊ້ການ
ບໍ່ໄດ້ແລ້ວຂອງເຕົາແຍກປາລະມະນູ ຄວາມແຮງ 5 ເມກະວັດ ທີ່ Yongbyon ແລະສະຖານ
ທີ່ອື່ນໆ ທີ່ກ່ຽວຂ້ອງກັບກິດຈະກໍານີວເຄລຍຂອງເກົາຫລີເໜືອ.
ເຈົ້າໜ້າທີ່ສະຫະລັດທ່ານນຶ່ງ ທີ່
ຂໍບໍ່ໃຫ້ເປີດເຜີຍຊື່ ເວົ້າວ່າ ບາດ
ກ້າວຕ່າງໆທີ່ເກົາຫຼີເໜືອໄດ້ເຫັນ
ພ້ອມນໍາໃນເວລານີ້ ແມ່ນເປີດປະ
ຕູໃຫ້ມີການເຈລະຈາຢ່າງເອົາຈິງ
ເອົາຈັງ ແລະການໂອ້ລົມກັນໃນ
ວົງກວ້າງຂຶ້ນກວ່າເກົ່າ ກ່ຽວກັບ
ການຍຸຕິໂຄງການນີວເຄລຍຂອງ
ຕົນ.
ພຽງຢາງໄດ້ທົດລອງລະເບີດນີວ
ເຄລຍໃນປີ 2006 ແລະປີ 2009.
ແຕ່ຕໍ່ມາກໍໄດ້ເຮັດໃຫ້ເກີດມີຄວາມ
ເປັນຫ່ວງຂຶ້ນມາອີກໃໝ່ ເວລາເກົາ
ຫລີຢືນຢັນວ່າຕົນມີໂຄງການເສີມ
ສະມັດຖະພາບທາດຢູເຣນຽມ ໃນປີ 2010 ຊຶ່ງໂຄງການເສີມສະມັດຖະທາດຢູເຣນຽມດັ່ງ
ກ່າວນັ້ນ ອາດອໍານວຍໃຫ້ເກົາຫລີເໜືອມີອີກຫົນທາງນຶ່ງ ສໍາລັບຜະລິດອາວຸດນີວເຄລຍໄດ້
ນອກຈາກໂຄງ ການຜະລິດອາວຸດນິວເຄລຍ ທີ່ອິງໃສ່ທາດພລູໂຕນຽມ ທີ່ເກົາຫລີເໜືອໄດ້
ເຮັດມາເປັນເວລາດົນນານແລ້ວນັ້ນ.
ພວກນັກວິເຄາະກ່າວວ່າ ໃນຂະນະທີ່ບາດກ້າວຕ່າງໆ ທີ່ເກົາຫລີເໜືອຕົກລົງຮັບເອົານັ້ນ
ເປັນບາດກ້າວໄປສູ່ທິດທາງທີ່ຖືກຕ້ອງກໍຈິງ ແຕ່ການປະກາດດັ່ງກ່າວກໍຍັງບໍ່ຖືວ່າ ເປັນ
ຜົນສໍາເລັດທີ່ສໍາຄັນໄດ້ເທື່ອ.
ທ່ານ Bruce Klingner ນັກຄົ້ນຄວ້າອາວຸໂສກ່ຽວກັບພາກພື້ນເອເຊຍຕາເວັນອອກສຽງ
ເໜືອ ປະຈໍາມູນນິທີມໍລະດົກ ທີ່ມີສໍານັກງານຢູ່ວໍຊິງຕັນດີຊີ ກ່າວວ່າ:
“ເລື່ອງທີ່ເວົ້າໄດ້ວ່າເປັນການເຍາະເຍີ້ຍກ່ຽວກັບຂໍ້ຕົກລົງນີ້ ກໍຄືວ່າສະຫະລັດ
ກໍາລັງຈະຈ່າຍຜົນປະໂຫຍດທາງເສດຖະກິດໃຫ້ເກົາຫລີເໜືອຕື່ມອີກ ພຽງ
ເພາະວ່າເກົາຫລີເໜືອໄດ້ຕົກລົງ ທີ່ຈະຢືນຢັນແລະປະຕິບັດຕາມຂໍ້ຕົກລົງ ທີ່
ຜ່ານມາ ທີ່ຕົນໄດ້ລົງນາມໄປສາມຄັ້ງແລ້ວໃນການເຈລະຈາຫົກຝ່າຍນັ້ນ."
ແຕ່ຢ່າງໃດກໍຕາມ ມັນກໍເອື້ອອໍານວຍໃຫ້ມີວິທີທາງນຶ່ງ ທີ່ບາງທີອາດຈະເປີດການເຈລະຈາ
ທາງການທູດຄືນໃໝ່ ແຕ່ເວົ້າໂດຍລວມແລ້ວ ກໍແມ່ນມັນມີຄວາມຮູ້ສຶກໃນແງ່ດີນັ້ນໜ້ອຍ
ທີ່ສຸດ ຢູ່ໃນຝ່າຍບໍລິຫານແລະທັງສອງພັກໃນສະພາຄອງແກຣສ ແລະພວກຊ່ຽວຊານທັງ
ໃນແລະນອກວົງການລັດຖະບານ ທີ່ວ່າ ແມ່ນແຕ່ການຮື້ຟື້ນການເຈລະຈາຫົກຝ່າຍຄືນ
ໃໝ່ກໍຈະບໍ່ປະສົບຜົນ ໃນການທີ່ຈະເຮັດໃຫ້ເກົາຫລີເໜືອປະລະໂຄງການສ້າງອາວຸດນີວ
ເຄລຍຂອງຕົນຢ່າງແທ້ຈິງ.”
ການປະກາດກ່ຽວກັບຂໍ້ຕົກລົງ
ຍຸຕິການທົດລອງນີວເຄລຍຂອງ
ເກົາຫລີເໜືອແມ່ນມີຂຶ້ນພຽງບໍ່
ເທົ່າໃດມື້ ຫລັງຈາກພວກຜູ້ຕາງ
ໜ້າສະຫະລັດແລະເກົາຫລີເໜືອ
ໄດ້ພົບປະກັນຢູ່ປະເທດຈີນເພື່ອ
ປຶກສາຫາລືກັນກ່ຽວກັບການຮຶ້
ຟື້ນການເຈລະຈາຫົກຝ່າຍຄືນ
ໃໝ່. ການພົບປະກັນຄັ້ງນີ້ນັບ
ວ່າເປັນເທື່ອທໍາອິດນັບຕັ້ງແຕ່
ລັດຫລືປະເທດຜະເດັດການປະ
ເທດນີ້ ໄດ້ໂອນອໍານາດຈາກ
ທ່ານຄິມ ຈົງອິລ ໄປໃຫ້ລູກຊາຍ
ໄວໜຸ່ມ Kim Jong Un ຜູ້ຂາດ
ປະສົບການ ແລະຍັງບໍ່ເຄີຍຜ່ານການທົດສອບໃນການເປັນຜູ້ນໍາແລະບໍລິຫານປະເທດນັ້ນ.