ອົງການພະລັງງານປະລະມະນູສາກົນ ຫລື IAEA ກ່າວວ່າ ບັດນີ້ເບິ່ງຄືວ່າຕົນຈະບໍ່ສົ່ງ
ຄະນະຕົວແທນ ໄປຍັງເກົາຫລີເໜືອ ຫລັງຈາກພຽງຢາງຖະແຫຼງວ່າຕົນບໍ່ມີຂໍ້ຜູກມັດໃດໆ
ອີກແລ້ວພາຍໃຕ້ຂໍ້ຕົກລົງກັບສະຫະລັດທີ່ຫ້າມບໍ່ໃຫ້ທົດລອງລູກສອນໄຟແລະອຸບປະ
ກອນນີວເຄລຍນັ້ນ.
ນາງ Gill Tudor ໂຄສົກຍິງຂອງອົງການໄອເອອີເອ ໄດ້ປະກາດເມື່ອ ຕອນບ່າຍວັນອັງ
ຄານວານນີ້ ທີ່ເຮັດໃຫ້ຄວາມຫວັງກ່ຽວກັບການສົ່ງຜູ້ ແທນໄປເກົາຫຼີເໜືອສິ້ນສຸດລົງທີ່
ບັນດາເຈົ້າໜ້າທີ່ໄອເອອີເອໄດ້ເລິ່ມການເຈລະຈາຕໍ່ຮອງກັບເກົາຫລີເໜືອ ໃນເດືອນມີນາ
ຜ່ານມາ.
ໃນຕອນເຊົ້າຂອງມື້ດຽວກັນນັ້ນ ພຽງຢາງກ່າວວ່າຕົນໄດ້ຍົກເລີກຂໍ້ຕົກລົງສອງຝ່າຍ ເພື່ອ
ຍຸຕິກິດຈະກໍານີວເຄລຍຕ່າງໆຂອງຕົນລົງ ແລະອະນຸຍາດໃຫ້ຄະນະກວດກາຂອງໄອເອ
ອີເອເຂົ້າໄປຍັງເກົາຫລີເໜືອຫລັງຈາກສະຫະ ລັດໄດ້ໂຈະການຊ່ວຍເຫຼືອດ້ານອາຫານ ທີ່
ຕ້ອງການທີ່ສຸດນັ້ນ. ຝ່າຍວໍຊິງ ຕັນກ່າວວ່າ ເກົາຫລີເໜືອບໍ່ໄດ້ຮັກສາຄຳໝັ້ນສັນຍາຂອງ
ຕົນໄວ້ ກ່ຽວກັບການຕໍ່ຮອງ ເວລາຕົນດໍາເນີນການຍິງລູກສອນໄພຂີປະນາວຸດທີ່ລົ້ມ
ແຫລວ ໃນວັນສຸກສັບປະດາແລ້ວ.
ກະຊວງຕ່າງປະເທດເກົາຫລີເໜືອ ປະຕິຍານທີ່ຈະສືບຕໍ່ພະຍາຍາມຍິງຈະຫລວດໄລຍະໄກ
ຂຶ້ນສູ່ອະວະກາດ ເພື່ອສົ່ງອັນທີ່ເກົາຫຼີເໜືອເອີ້ນວ່າ ດາວທຽມພະຍາກອນອາກາດຂຶ້ນສູ່
ວົງໂຄຈອນນັ້ນ. ນອກນີ້ແລ້ວ ເກົາຫລີເໜືອຍັງປະຕິຍານຊໍ້າອີກ ທີ່ຈະທຳການຕອບໂຕ້
ແບບໃດແບບນຶ່ງ ຊຶ່ງໃນເວລານີ້ຂໍ້ຕົກລົງກັນກັບສະຫະລັດນັ້ນ ແມ່ນບໍ່ມີຜົນບັງຄັບໃຊ້ອີກ
ຕໍ່ໄປແລ້ວ.
ທ່ານ ມາກ ໂທນເນີ ໂຄສົກກະຊວງຕ່າງປະເທດສະຫະລັດກ່າວເມື່ອວັນອັງຄານວານນີ້ວ່າ
ຖະແຫລງການຂອງພຽງຢາງນັ້ນແມ່ນບໍ່ເປັນທີ່ປະຫຼາດ ໃຈແຕ່ຢ່າງໃດ ອີງຕາມພຶດຕິການ
ຂອງເກົາຫລີເໜືອທີ່ເຄີຍເຮັດຜ່ານມາບໍ່ນານນີ້ ຊຶ່ງໂຄສົກໂທນເນີກ່າວອີກວ່າ ທ່ານບໍ່ສາ
ມາດຄາດການໄດ້ວ່າເກົາ ຫລີເໜືອ ກໍາລັງວາງແນວທາງປະຕິບັດສໍາລັບການທົດລອງນີວ
ເຄລຍໃນອະນາຄົດ ດັ່ງທີ່ບາງປະເທດເປັນຫ່ວງກັນນັ້ນຫຼືບໍ່.