ລິ້ງ ສຳຫລັບເຂົ້າຫາ

ວັນຈັນ, ໑໕ ກໍລະກົດ ໒໐໒໔

ລູກ​ສອນ​ໄຟ​ຂອງ ເກົາຫຼີ​ເໜືອ ລະ​ເບີດ​ກາງ​ອາ​ກາດ ຫຼັງ​ຈາກ​ການ​ຍິງ​ທົດ​ລອງ


ແມ່​ຍິງ​ຄົນ​ນຶ່ງ​ເບິ່ງ​ຈໍ​ໂທ​ລະ​ພາບ ທີ່​ສະ​ແດງ​ໃຫ້​ເຫັນ​ລາຍ​ງານ​ຂ່າວ​ພ້ອມ​ກັບ​ພາບ​ຂອງ​ການ​ທົດ​ລອງ​ລູກ​ສອນ​ໄຟ ເກົາຫຼີ​ເໜືອ, ຢູ່​ສະ​ຖາ​ນີ​ລົດ​ໄຟ​ໃນ​ນະ​ຄອນຫຼວງ ໂຊ​ລ໌, ເກົາຫຼີ​ໃຕ້, 26 ມິ​ຖຸ​ນາ 2024.
ແມ່​ຍິງ​ຄົນ​ນຶ່ງ​ເບິ່ງ​ຈໍ​ໂທ​ລະ​ພາບ ທີ່​ສະ​ແດງ​ໃຫ້​ເຫັນ​ລາຍ​ງານ​ຂ່າວ​ພ້ອມ​ກັບ​ພາບ​ຂອງ​ການ​ທົດ​ລອງ​ລູກ​ສອນ​ໄຟ ເກົາຫຼີ​ເໜືອ, ຢູ່​ສະ​ຖາ​ນີ​ລົດ​ໄຟ​ໃນ​ນະ​ຄອນຫຼວງ ໂຊ​ລ໌, ເກົາຫຼີ​ໃຕ້, 26 ມິ​ຖຸ​ນາ 2024.

ເກົາຫຼີ​ເໜືອ ໄດ້​ຍິງ​ທົດ​ລອງ​ສິ່ງ​ທີ່​ປາ​ກົດ​ວ່າ​ເປັນ​ລູກ​ສອນ​ໄຟ​ຄວາມ​ໄວ​ສູງ​ອອກ​ຈາກ​ຊາຍ​ຝັ່ງ​ພາກ​ຕາ​ເວັນ​ອອກ​ຂອງ​ເຂົາ​ເຈົ້າ​ໃນ​ວັນ​ພຸດມື້ນີ້, ແຕ່​ໄດ້​ລະ​ເບີດ​ຢູ່​ກາງ​ອາ​ກາດ, ອີງ​ຕາມ​ການ​ກ່າວ​ຂອງກອ​ງ​ທັບ ເກົາຫຼີ​ໃຕ້.

ລູກ​ສອນ​ໄຟ​ດັ່ງ​ກ່າວ​ຖືກ​ຍິງ​ອອກ​ໃກ້​ກັບ​ນະ​ຄອນຫຼວງ ພຽງ​ຢາງ, ເສ​ນາ​ທິ​ການ​ຮ່ວມ​ຂອງ​ເກົາຫຼີ​ໃຕ້​ໄດ້​ກ່າວ. ກະ​ຊວງ​ປ້ອງ​ກັນ​ປະ​ເທດ​ຂອງ ຍີ່​ປຸ່ນ ໄດ້​ກ່າວ​ວ່າ​ລູກ​ສອນ​ໄຟ​ນັ້ນ​ໄດ້​ບິນ​ໃນ​ລະ​ດັບ​ປະ​ມານ 100 ກິ​ໂລ​ແມັດ ແລະ ໄກ​ກວ່າ 200 ກິ​ໂລ​ແມັດ.

ບັນ​ດາ​ເຈົ້າ​ໜ້າ​ທີ່ອາ​ວຸ​ໂສ​ຂອງ ເກົາຫຼີ​ໃຕ້, ສະ​ຫະ​ລັດ ແລະ ຍີ່​ປຸ່ນ ໄດ້​ຈັດ​ການ​ໂອ້ລົມທາງ​ໂທ​ລະ​ສັບ​ ແລະ ໄດ້​ກ່າວ​ປະ​ນາມ​ການ​ຍິງດັ່ງກ່າວວ່າ ເປັນການ​ລ່ວງ​ລະ​ເມີດ​ມະ​ຕິ​ສະ​ພາ​ຄວາມ​ໝັ້ນ​ຄົງ​ສະ​ຫະ​ປະ​ຊາ​ຊາດຫຼາຍ​ຂໍ້ ແລະ ເປັນ​ໄພ​ຂົ່ມ​ຂູ່​ທີ່​ຮ້າຍ​ແຮງ​ຕໍ່​ສັນ​ຕິ​ພາບ ແລະ ສະ​ຖຽນ​ລະ​ພາບ​ຂອງ​ພາກ​ພື້ນ ແລະ ໄກ​ອອກ​ໄປ.

ກອງ​ທັບ​ນາ​ວິ​ກະ​ໂຍ​ທິນ​ຂອງ ເກົາຫຼີ​ໃຕ້ ໄດ້​ກ່າວ​ວ່າ​ກອງ​ທະ​ຫານ​ຂອງ​ເຂົາ​ເຈົ້າ​ໄດ້​ຈັດ​ການ​ຊ້ອມ​ຍິງ​ຢູ່​ໃກ້​ເຂດ​ຊາຍ​ແດນ​ທາງ​ທະ​ເລ​ຕິດ​ກັບ​ ເກົາຫຼີ​ເໜືອ ເປັນ​ຄັ້ງ​ທຳ​ອິດ​ນັບ​ຕັ້ງ​ແຕ່​ລັດ​ຖະ​ບານ ໂຊ​ລ ໄດ້​ຍົກ​ເລີກ​ຂໍ້​ຕົກ​ລົງ​ທະ​ຫານ​ລະ​ຫວ່າງ ເກົາຫຼີ ໃນ​ຕົ້ນ​ເດືອນນີ້. ການ​ຝຶກ​ຊ້ອ​ມດັ່ງ​ກ່າວ​ຖືກ​ປະ​ກາດ​ໃນ​ຕົ້ນ​ເດືອນ​ມິ​ຖຸ​ນາ.

ກອງ​ບັນ​ຊາ​ການ​ປະ​ຈຳ​ເຂດ​ອິນ​ໂດ​ປາ​ຊີ​ຟິກ​ຂອງ ສະ​ຫະ​ລັດ ຍັງ​ໄດ້​ປະ​ກາດ​ການ​ປະ​ນາມ ແລະ ໄດ້​ຮຽກ​ຮ້ອງ ພຽງ​ຢາງ ໃຫ້​ຢຸດ​ການ​ກະ​ທຳ​ທີ່​ບໍ່ຖືກ​ກົດ​ໝາຍ ແລະ ເຮັດໃຫ້ເກີດຄວາມບໍ່​ໝັ້ນ​ຄົງອີກ​ຕໍ່​ໄປ.

ເຂົາ​ເຈົ້າ​ໄດ້​ກ່າວ​ໃນ​ຖະ​ແຫຼງ​ການ​ສະ​ບັບ​ນຶ່ງວ່າ “ໃນ​ຂະ​ນະ​ທີ່​ພວກ​ເຮົາ​ໄດ້​ປະ​ເມີນ​ວ່າ​ເຫດ​ການນີ້​ບໍ່​ໄດ້​ສ້າງ​ໄພ​ຂົ່ມ​ຂູ່​ໃນ​ທັນ​ທີ​ຕໍ່ເຈົ້າ​ໜ້າ​ທີ່, ຫຼື ເຂດ​ແດນຂອງສະ​ຫະ​ລັດຫຼື ຕໍ່​ພັນ​ທະ​ມິດ​ຂອງ​ພວກ​ເຮົານັ້ນ, ພວກ​ເຮົາ​ຈະ​ສືບ​ຕໍ່​ຕິດ​ຕາມ​ສະ​ຖາ​ນະ​ການ​ດັ່ງ​ກ່າວ.”

ການ​ຍິງ​ລູກ​ສອນ​ໄຟ​ຄັ້ງ​ສຸດ​ທ້າຍ​ຂອງ ເກົາຫຼີ​ເໜືອ ແມ່ນ​ໃນ​ວັນ​ທີ 30 ພຶດ​ສະ​ພາ​ທີ່​ຜ່ານ​ມາ.

ໃນ​ອາ​ທິດ​ແລ້ວນີ້ ເກົາຫຼີ​ເໜືອ ໄດ້​ຕຳ​ໜິ​ຕິ​ຕຽນ​ການ​ສົ່ງ​ກຳ​ປັ່ນ​ບັນ​ທຸກ​ເຮືອ​ບິນ ສະ​ຫະ​ລັດ ໄປ​ຮ່ວມ​ຊ້ອມ​ລົບ​ກັບ ເກົາຫຼີ​ໃຕ້ ແລະ ຍີ່​ປຸ່ນ, ແລະ ໄດ້​ເຕືອນ ກ່ຽວ​ກັບ ການ​ສະ​ແດງ​ການ​ຍັບ​ຢັ້ງ​ຄັ້ງ​ໃໝ່​ຢ່າງ​ເຕັມ​ທີ.”

ອ່ານ​ຂ່າວນີ້​ຕື່ມ​ເປັນ​ພາ​ສາ​ອັງ​ກິດ

ຟໍຣັມສະແດງຄວາມຄິດເຫັນ

ສົດ ລາຍການວິທະຍຸ-ໂທລະພາບ ພາກພາສາລາວ

XS
SM
MD
LG