ສື່ມວນຊົນເກົາຫລີໃຕ້ກ່າວວ່າ ເກົາຫລີເໜືອໄດ້ຍິງໃນອັນທີ່ສົງໄສວ່າ ເປັນລູກສອນໄຟຂີ ປະນາວຸດ ຢູ່ນອກຝັ່ງທະເລ ກ້ຳຕາເວັນອອກຂອງປະເທດ ຊຶ່ງເປັນການຍິງເທຶ່ອຫລ້າສຸດ ຂອງການທົດລອງຫລາຍຄັ້ງ ໃນປີນີ້ ທີ່ສະແດງໃຫ້ເຫັນວ່າ ລະດັບຄວາມເຄັ່ງຕືງໄດ້ເພີ້ມ ຂຶ້ນລະຫວ່າງ ພຽງຢາງ ໂຊລ ແລະບັນດາພັນທະມິດຕາເວັນຕົກຂອງເກົາຫລີໃຕ້.
ອົງການຂ່າວ Yonhap ຂອງເກົາຫລີໃຕ້ ກ່າວວ່າ ລູກສອນໄຟ ທີ່ຍິງຈາກໜ້າດິນຫາອາ ກາດ ໄດ້ຍິງອອກສູ່ທະເລຍີ່ປຸ່ນ ໃນຕອນທ່ຽງວັນສຸກມື້ນີ້.
ກະຊວງປ້ອງກັນປະເທດເກົາຫລີໃຕ້ ໄດ້ຢືນຢັນລາຍງານດັ່ງກ່າວກັບອົງການຂ່າວຝຣັ່ງ ແຕ່ໄດ້ກ່າວວ່າ ລັດສະໝີແລະຄວາມແມ່ນຍຳຂອງລູກສອນໄຟນັ້ນບໍ່ສາມາດຢືນຢັນໄດ້. ລາຍງານກ່າວວ່າ ການຍິງນີ້ ແມ່ນມາຈາກເມືອງ Sondok ໃນພາກຕາເວັນອອກຂອງປະ ເທດ.
ເກົາຫລີເໜືອ ໄດ້ຍິງໃນອັນທີ່ປາກົດວ່າ ເປັນການທົດລອງອາວຸດ ຢ່າງຕໍ່ເນື່ອງ ນັບແຕ່ ເດືອນມັງກອນເປັນຕົ້ນມາ. ສະຫະລັດ ແລະເກົາຫລີໃຕ້ກຳລັງຢູ່ໃນລະຫວ່າງການຊ້ອມ ລົບຮ່ວມທາງທະຫານທີ່ໃຫຍ່ສຸດແບບບໍ່ເຄິຍມີມາກ່ອນ. ພຽງຢາງກ່າວວ່າ ຕົນມອງເຫັນ ການຊ້ອມລົບດັ່ງກ່າວ ເປັນການຝຶກຊ້ອມເພື່ອກຽມ ຮຸນຮານຕົນ.
ໃນຂະນະດຽວກັນ ຢູ່ທີ່ນະຄອນຫລວງວໍຊິງຕັນ ປະທານາທິບໍດີສະຫະລັດ ທ່ານ Barack Obama ກຳລັງເປັນເຈົ້າພາບ ຈັດກອງປະຊຸມສຸດຍອດ ວ່າດ້ວຍຄວາມໝັ້ນຄົງ ດ້ານນິວເຄລຍສາກົນ ບ່ອນທີ່ສະຫະລັດ ເກົາຫລີໃຕ້ ຈີນ ແລະຍີ່ປຸ່ນ ໄດ້ເອົາກິດຈະກຳ ດ້ານນິວເຄລຍຂອງເກົາຫຼີເໜືອເປັນຈຸດເພັ່ງເລັງ ໃນການສົນທະນາ.
