ອີງຕາມລາຍງານຂອງອົງການຂ່າວຣອຍເຕີ ຜູ້ນຳເກົາຫຼີເໜືອ ກິມ ຈົງ ອຶນ ໄດ້ກ່າວວ່າ ປະເທດຊາດຕ້ອງກຽມພ້ອມສຳລັບ “ການຕໍ່ສູ້ທີ່ຍິ່ງໃຫຍ່” ໃນປີໜ້າເພື່ອສືບຕໍ່ທຳຄວາມກ້າວໜ້າ ໃນຫຼາຍດ້ານທີ່ລວມມີ ການປ້ອງກັນ ກະສິກຳ ແລະການກໍ່ສ້າງ ດັ່ງທີ່ສື່ມວນຊົນຂອງທາງການ ໄດ້ລາຍງານ ໃນວັນພະຫັດມື້ນີ້.
ທ່ານກິມ ໄດ້ໃຫ້ຄຳເຫັນດັ່ງກ່າວເມື່ອວັນພຸດວານນີ້ ຢູ່ທີ່ກອງປະຊຸມຄະນະກຳ ມະການສູນກາງພັກກຳມະກອນ ທີ່ປົກຄອງປະເທດໃນປັດຈຸບັນ ຊຶ່ງທ່ານໄດ້ຕັດສິນໃຈ ທີ່ຈະຈັດກອງປະຊຸມຄົບຄະນະຂອງຄະນະກຳມະການໃນເດືອນໜ້າ.
ທ່ານກິມ ໄດ້ກ່າວວ່າ ໃນຂະນະທີ່ປະເທດຊາດຍັງປະເຊີນກັບຄວາມຫຍຸ້ງຍາກດ້ານເສດຖະກິດ ພັກກໍໄດ້ປະສົບຜົນສຳເລັດໃນການຊຸກຍູ້ໃຫ້ບັນລຸຕາມເປົ້າໝາຍນະໂຍບາຍທີ່ວາງໄວ້ ແລະຈັດຕັ້ງປະຕິບັດ ແຜນເສດຖະກິດໄລຍະຫ້າປີ ທີ່ທ່ານໄດ້ເປີດເຜີຍເມື່ອຕົ້ນປີນີ້ ອີງຕາມການກ່າວຂອງອົງການຂ່າວ KCNA ຂອງທາງການ.
ທ່ານກິມເວົ້າວ່າ “ມັນເປັນເລື້ອງທີ່ໜ້າຍິນດີຢ່າງຍິ່ງທີ່ການປ່ຽນແປງທັງຫຼາຍໃນທາງບວກ ໄດ້ເກີດຂຶ້ນໃນທົ່ວທຸກດ້ານຂອງປະເທດ ລວມມີ ດ້ານການເມືອງ ເສດຖະກິດ ວັດທະນະທຳ ແລະການປ້ອງກັນຊາດ ອັນເປັນຫຼັກຖານຈາກການຄຸ້ມຄອງທີ່ສົມດຸນໃນເສດຖະກິດຂອງປະເທດ ແລະຄວາມສຳເລັດຂະໜາດໃຫຍ່ໃນພາກສ່ວນຂອງກະສິກຳ ແລະການກໍ່ສ້າງ.”
ທ່ານກ່າວຕື່ມວ່າ “ໃນປີໜ້າ ຈະເປັນປີທີ່ສຳຄັນອັນນຶ່ງ ຂະນະທີ່ພວກເຮົາຄວນຕໍ່ສູ້ດິ້ນຮົນຢ່າງໃຫຍ່ຫຼວງເທົ່າທີ່ພວກເຮົາເຮັດໄດ້ໃນປີນີ້.”
ທ່ານກິມ ໄດ້ຫາທາງເພື່ອເສີມຂະຫຍາຍເສດຖະກິດ ແລະໃນການສະໜອງພະລັງງານ ດ້ວຍແຜນການຂອງທ່ານ ແຕ່ອົງການສະຫະປະຊາຊາດ ໄດ້ກ່າວວ່າ ອາຫານແລະໄຟຟ້າ ແມ່ນຍັງຂາດແຄນຢູ່, ບັນຫານີ້ໜັກຂຶ້ນຍ້ອນການວາງມາດຕະການລົງໂທດຕໍ່ໂຄງການນິວເຄລຍແລະລູກສອນໄຟຂອງເກົາຫຼີເໜືອ ພ້ອມທັງ ໂຣກລະຍາດຂອງພະຍາດໂຄວິດ-19 ແລະໄພພິບັດດ້ານທຳມະຊາດ.
ເກົາຫຼີເໜືອ ບໍ່ໄດ້ໃຫ້ການຢືນຢັນໃດໆກ່ຽວກັບກໍລິນີຂອງໄວຣັສໂຄໂຣນາ ແຕ່ໄດ້ປິດຊາດແດນທັງຫຼາຍ ແລະໄດ້ວາງມາດຕະການຈຳກັດການເດີນທາງພາຍໃນປະເທດ ແລະມາດຕະການອື່ນໆ ຊຶ່ງປາກົດວ່າ ເປັນການຄວບຄຸມ ຫຼື ປ້ອງກັນການແຜ່ລະບາດ.
