ເກົາຫຼີເໜືອ ກ່າວວ່າ ຕົນກຳລັງກະກຽມ ເອົານັກທ່ອງທ່ຽວ
ອາເມຣິກັນ 2 ຄົນຂຶ້ນສານດຳເນີນຄະດີ ໃນຂໍ້ຫາກໍ່ອາຊະ
ຍາກຳ ຕ້ານລັດ.
ເຈົ້າໜ້າທີ່ອົງການສູນກາງຂ່າວຂອງເກົາຫຼີເໜືອ ກ່າວໃນ
ວັນຈັນມື້ນີ້ ວ່າ Jeffrey Fowle ແລະ Matthew Miller
ໄດ້ “ກະທຳການທີ່ເປັນປໍລະປັກຫຼາຍຢ່າງ” ຊຶ່ງໄດ້ຮັບ
ການຢືນຢັນ ຈາກການໃຫ້ປາກຄຳ ຂອງພວກກ່ຽວເອງ
ພ້ອມດ້ວຍຫລັກຖານ.
ສື່ຂ່າວຂອງເກົາຫຼີເໜືອ ກ່າວວ່າ ທ່ານ Fowle ໄວ 56 ປີ
ໄດ້ເຂົ້າມາໃນປະເທດ ເມື່ອວັນທີ 29 ເມສາ ປີນີ້ ແລະ ໄດ້ຖືກຈັບກຸມ ຍ້ອນການກະທຳ
ທີ່ບໍ່ສອດຄ່ອງກັບຖານະນັກທ່ອງທ່ຽວ. ອົງການຂ່າວຂອງຝຣັ່ງ ເວົ້າວ່າ ຜູ້ກ່ຽວຖືກຈັບກຸມ
ຫຼັງຈາກ ຜູ້ກ່ຽວໄດ້ປະປຶ້ມຄຳພີ Bible ຫົວໜຶ່ງ ໄວ້ໃນຫ້ອງນອນໂຮງແຮມ.
Pyongyang ກ່າວວ່າ ທ້າວ Miller ໄວ 24 ປີ ໄດ້ເຂົ້າມາໃນປະເທດເມື່ອວັນທີ 10 ເມສາ
ປີນີ້ ແລະໄດ້ຖືກຈັບກຸມ ຫຼັງຈາກຜູ້ກ່ຽວໄດ້ຈີກໜັງສືວີຊາຂອງຕົນຖິ້ມ ແລ້ວຮ້ອງຂໍລີ້ໄພ.
ບໍ່ມີລາຍລະອຽດອື່ນໃດ ກ່ຽວກັບວັນເວລາການດຳເນີນຄະດີບຸກຄົນທັງສອງ.
ນອກຈາກສອງຄົນນີ້ແລ້ວ ເກົາຫຼີເໜືອຍັງໄດ້ກັກຂັງຕົວນັກສອນສາສະ ໜາ ເຊື້ອສາຍເກົາຫຼີ ສັນຊາດອາເມຣິກັນ ທ່ານ Kenneth Bae ໄວ້ ຕັ້ງແຕ່ເດືອນພະຈິກ ປີ 2012. ລາວກຳລັງຮັບໃຊ້ໂທດ 15 ປີ ໃຫ້ເຮັດວຽກໜັກ ສຳລັບອັນທີ່ Pyonyang ເອີ້ນວ່າ ການກະທຳທີ່ເປັນປໍລະປັກຕໍ່ປະເທດ.
