ຜູ້ນຳເກົາຫຼີເໜືອ ທ່ານ Kim Jong Un ໄດ້ເປັນປະທານໃນການເດີນສວນສະໜາມທີ່ຍິ່ງໃຫຍ່ໃນເຂດໃຈກາງນະຄອນຫຼວງພຽງຢາງ ໃນວັນອັງຄານມື້ນີ້ ຊຶ່ງເປັນຂີດໝາຍຂອງການ ສິ້ນສຸດລົງ ຂອງກອງປະຊຸມໃຫຍ່ພັກລັດຖະບານ ທີ່ປົກຄອງປະເທດຢູ່ໃນຂະນະນີ້ ຊຶ່ງໃນລະຫວ່າງນັ້ນ ທ່ານໄດ້ຮວບຮວມເອົາອຳນາດທັງໝົດເຂົ້າມາຢູ່ໃນກຳມືຂອງທ່ານແລ້ວນັ້ນ.
ມີຜູ້ຄົນຫຼວງຫຼາຍຈຳນວນຫຼາຍຮ້ອຍພັນຄົນ ໄດ້ພາກັນໃສ່ຊຸດສີເຈີດຈ້າເດີນສວນສະໜາມ ຜ່ານຈະຕຸລັດທີ່ໃສ່ຊື່ປູ່ຂອງທ່ານ Kim ຊຶ່ງເປັນຜູ້ກໍ່ຕັ້ງອຳນາດການປົກຄອງນີ້ຂຶ້ນມາ ນັ້ນກໍແມ່ນທ່ານ Kim Il Sung. ບຸກຄົນອື່ນໆໄດ້ຂີ່ລົດທີ່ປະດັບປະດາດ້ວຍຄຳຂັວນແລະປ້າຍຕ່າງໆທີ່ສະແດງອອກເຖິງຄວາມຮັກຊາດ ໃນຂະນະທີ່ທ່ານ Kim Jung Un ຢືນຊົມການສວນສະໜາມທີ່ວ່ານີ້ ແລະໂບກມືໄປມາ ຕໍ່ປະຊາຊົນ ທີ່ມອງລົງມາຈາກລະບຽງທີ່ທ່ານຢືນຢູ່ເທິງຈະຕຸລັດນັ້ນ.
ກອງປະຊຸມໃຫຍ່ເປັນເວລາ 4 ມື້ຂອງພັກແຮງງານ ຊຶ່ງໄຂຂຶ້ນເປັນຄັ້ງທຳອິດໃນຮອບ 36 ປີຂອງປະເທດ ໄດ້ສິ້ນສຸດລົງໃນວັນຈັນວານນີ້ ຫຼັງຈາກກອງປະຊຸມໄດ້ຮັບຮອງເອົາ ນະໂຍ ບາຍ “Byonging” ຂອງທ່ານ Kim ເພື່ອສືບຕໍ່ໃນນະໂຍບາຍການພັດທະນາເສດຖະກິດຂອງປະເທດ ໄປພ້ອມໆກັນກັບການເສີມຂະຫຍາຍຄັງອາວຸດນິວເຄລຍຂອງເກົາຫຼີເໜືອ ນັ້ນ. ກອງປະຊຸມໃຫຍ່ຂອງພັກ ຍັງໄດ້ມອບຕຳແໜ່ງປະທານພັກ ໃຫ້ແກ່ທ່ານ Kim ຜູ້ຊຶ່ງຢູ່ໃນໄວ 33 ປີ ໂດຍປະກາດວ່າທ່ານເປັນຜູ້ສືບທອດຕຳແໜ່ງທີ່ຖືກຕ້ອງຊອບທຳ ຈາກປູ່ ສູ່ ພໍ່ ອະດີດຜູ້ນຳ Kim Jong Il.
ນອກນັ້ນກອງປະຊຸມໃຫຍ່ ຍັງໄດ້ແຕ່ງຕັ້ງໃຫ້ທ່ານ Ri Yong-Gil ອະດີດຜູ້ນັບຊາການທະຫານຂອງເກົາຫຼີເໜືອ ເຂົ້າຮັບຕຳແໜ່ງເປັນເຈົ້າໜ້າທີອະວຸໂສກຳກັບໜ້າທີ່ສຳຄັນ ພຽງບໍ່ເທົ່າໃດເດືອນຫຼັງຈາກທີ່ເຈົ້າໜ້າທີ່ສືບລັບຂອງເກົາຫຼີໃຕ້ ໄດ້ກ່າວວ່າ ທ່ານໄດ້ຖືກປະຫານ ຊີວິດ ໃນຂໍ້ຫາສໍ້ລາດບັງຫຼວງ ແລະຂໍ້ຫາອື່ນໆນຳ.
