ເກົາຫຼີເໜືອ ໄດ້ຍິງລູກສອນໄຟຂີປະນາວຸດ ລະຍະສັ້ນສອງລູກ
ເຂົ້າໄປໃນເຂດທະເລ ໃນອັນທີ່ປາກົດວ່າ ເປັນການປະທ້ວງຕໍ່
ການຊ້ອມລົບ ຮ່ວມກັນລະຫວ່າງສະຫະລັດ ແລະເກົາຫຼີໃຕ້ ທີ່
ໄດ້ເປີດສາກຂຶ້ນໃນວັນຈັນມື້ນີ້. ກ່ອນໜ້ານັ້ນ ພຽງຢາງໄດ້ເຕືອນ
ວ່າຈະ “ທຳການໂຈມຕີຢ່າງບໍ່ປານີ” ຕໍ່ພວກສັດຕູຂອງຕົນ.
ບັນດາເຈົ້າໜ້າທີ່ເກົາຫຼີໃຕ້ ກ່າວວ່າ ລູກສອນໄຟດັ່ງກ່າວໄດ້
ຕົກລົງໃນ ເຂດທະເລຕາເວັນອອກ ຫ່າງຈາກເມືອງທ່າ Nampo
ຂອງເກົາຫຼີເໜືອ 490 ກິໂລແມັດ.
ໂຄສົກກະຊວງປ້ອງກັນປະເທດເກົາຫຼີໃຕ້ ທ່ານ Kim Min-seok
ກ່າວວ່າ ເຫດການດັ່ງກ່າວນັ້ນ ຖືວ່າ “ເປັນການເກາະຜິດໂດຍເຈດຕະນາ ແລະເປັນ
ການປະທ້ວງດ້ວຍອາວຸດ” ເພາະວ່າ ເກົາຫຼີເໜືອໄດ້ຍິງລູກສອນໄຟນັ້ນ ໂດຍບໍ່ໄດ້ກຳນົດ ເຂດຫ້າມແລ່ນເຮືອ.
ທ່ານ Kim ກ່າວຕໍ່ບັນດານັກຂ່າວ ວ່າ “ກອງທັບຂອງພວກເຮົາ ແລະ ຂອງສະຫະລັດ
ໄດ້ເພີ້ມການສອດແນມຂຶ້ນຕື່ມ ແລະ ພວກເຮົາຍັງຢູ່ໃນທ່າທີກຽມພ້ອມເພື່ອຕອບໂຕ້
ໂດຍທັນທີ. ຖ້າເກົາຫຼີເໜືອ ຫາກທຳການຍຸແຍ່ເກາະຜິດຕ່າງໆອີກ ກອງທັບຂອງພວກເຮົາ ຈະເອົາປະຕິກິລິຍາຕອບ ຕໍ່ການກະທຳນັ້ນ ຢ່າງໜັກແໜ້ນ ແລະແຂງຂັນ
ຊຶ່ງເກົາຫຼີເໜືອຈະຕ້ອງເສຍໃຈຢ່າງຂົມຂື່ນ.”
ເກົາຫຼີເໜືອໄດ້ທວງ ມາດົນນານແລ້ວ ໃຫ້ວໍຊິງຕັນ ແລະ ໂຊລ ຢຸດຕິການເຝິກຊ້ອມທາງ
ທະຫານປະຈຳປີ ຊຶ່ງພຽງຢາງເອີ້ນວ່າ ເປັນການ “ເຝິກຊ້ອມແບບເຕັມຍົດ ເພື່ອການ
ບຸກລຸກຂຶ້ນໄປທາງພາກເໜືອ.”
ເກົາຫຼີເໜືອ ເຕືອນ ການຊ້ອມລົບ ອາດພາໃຫ້ເກີດ ສົງຄາມ
