ລິ້ງ ສຳຫລັບເຂົ້າຫາ

ວັນອັງຄານ, ໒໗ ກຸມພາ ໒໐໒໔

ເກົາຫຼີເໜືອ ຍິງລູກສອນໄຟ ແລະສົ່ງເຮືອບິນລົບ ບິນໄປໃກ້ຊາຍແດນ ຂອງເກົາຫຼີໃຕ້


ກໍາປັ່ນບັນທຸກເຮືອບິນ USS Ronald Reagan ໄດ້ຮັບການຄຸ້ມຄອງ ໃນຂະນະທີ່ແລ່ນມາຮອດເມືອງບູຊານ, ປະເທດເກົາຫຼີໃຕ້, ວັນທີ 23 ກັນຍາ 2022.
ກໍາປັ່ນບັນທຸກເຮືອບິນ USS Ronald Reagan ໄດ້ຮັບການຄຸ້ມຄອງ ໃນຂະນະທີ່ແລ່ນມາຮອດເມືອງບູຊານ, ປະເທດເກົາຫຼີໃຕ້, ວັນທີ 23 ກັນຍາ 2022.

ໃນຕອນເຊົ້າຂອງມື້ວັນສຸກນີ້ ເກົາຫຼີເໜືອ ໄດ້ຍິງລູກສອນໄຟຂີປະນາວຸດໄລຍະໃກ້ ອອກໄປສູ່ທະ​ເລຕາເວັນອອກ ແລະສົ່ງເຮືອບິນລົບ ໃຫ້ບິນໄປໃກ້ຊາຍແດນຂອງ ເກົາຫຼີໃຕ້, ນັ້ນ​ຄື​ຄຳ​ເວົ້າ​ຂອງກອງທັບເກົາຫຼີໃຕ້ ​ຊຶ່ງ​ພາ​ໃຫ້​ເກີດ​ຄວາມ​ເປັນ​ປໍ​ລະ​ປັກເພີ້ມຂຶ້ນ ຈາກການທົດລອງ​ຍິງອາວຸດເມື່ອ​ໄວໆ​ມານີ້ ຂອງເກົາຫຼີເໜືອ, ອີງຕາມລາຍ​ງານ​ຂອງອົງການຂ່າວ AP

ເສນາທິການຮ່ວມຂອງກອງ​ທັບເກົາຫຼີໃຕ້ ກ່າວຢູ່ໃນຖະແຫຼງການວ່າ ລູກສອນໄຟດັ່ງກ່າວໄດ້ຖືກຍິງອອກຈາກເຂດນະຄອນຫຼວງຂອງເກົາຫຼີເໜືອ ໃນເວລາ 1:49 ຕອນເຊົ້າ ອີງຕາມເວລາຢູ່ໃນທ້ອງຖິ່ນ.

ຖະແຫຼງການເປີດເຜີຍວ່າ ເກົາຫຼີໃຕ້ ໄດ້ເພີ້ມການຕິດຕາມເຝົ້າລະວັງຂອງພວກເຂົາເຈົ້າແລະຮັກສາຄວາມພ້ອມທາງທະຫານໃນການປະສານງານແບບໃກ້ຊິດກັບສະຫະລັດ.

ກະຊວງປ້ອງກັນ​ປະ​ເທດ ແລະສໍານັກງານນາຍົກລັດຖະມົນຕີຂອງຍີ່ປຸ່ນ ກໍໄດ້ຂຽນລົງໃນທວິດເຕີ້ເຊັ່ນກັນວ່າ ມີຄວາມເປັນໄປໄດ້ທີ່ເກົາຫຼີເໜືອໄດ້ຍິງລູກສອນໄຟ.

ນີ້ແມ່ນການຍິງລູກສອນໄຟຄັ້ງຫຼ້າສຸດຂອງເກົາຫຼີເໜືອໃນບໍ່ເທົ່າໃດອາທິດທີ່ຜ່ານມາ. ເກົາຫຼີເໜືອ ເປີດເຜີຍໃນວັນພະຫັດວານນີ້ວ່າ ທ່ານຜູ້ນໍາກິມ ຈົງ ອຶນ ໃຫ້ຄໍາແນະນໍາ ໃນການຍິງທົດລອງລູກສອນໄຟນໍາວິຖີໄລຍະໄກ ໂດຍທ່ານກິມກ່າວວ່າ ມັນໄດ້ສະແດງໃຫ້ເຫັນ ເຖິງຄວາມສໍາເລັດທີ່ສົມບູນ ໃນການຂະຫຍາຍຄວາມສາມາດໃນການໂຈມຕີດ້ວຍນິວເຄລຍ ໂດຍກອງທັບຂອງທ່ານ.

ເກົາຫຼີເໜືອ ກ່າວໃນວັນຈັນທີ່ຜ່ານມາວ່າ ການທົດລອງຍິງລູກສອນໄຟຂອງພວກເຂົາ​ເຈົ້າ ເມື່ອສອງອາທິດທີ່ຜ່ານມາ ເປັນການຈໍາລອງການໂຈມຕີທາງອາວຸດນິວເຄລຍໃສ່ເກົາຫຼີໃຕ້ ແລະສະຫະລັດ ທີ່ເປັນເປົ້າໝາຍສໍາຄັນຂອງພວກເຂົາ. ເກົາຫຼີ ເໜືອກ່າວວ່າ ການທົດລອງອາວຸດໝາຍເຖິງການອອກຄຳເຕືອນ​ຕໍ່ລັດຖະບານໂຊລ ແລະວໍຊິງຕັນ ​ທີ່ໄດ້​ທຳ​ການ​ຊ້ອມ​ລົບຮ່ວມທາງ​ທະ​ເລທີ່​ມີກໍາປັ່ນບັນທຸກເຮືອບິນ​ເຂົ້າຮ່ວມ​ນຳ​ນັ້ນ ເປັນການ​ຊ້ອມ​ລົບທີ່ “ອັນຕະລາຍ.”

ການຍິງລູກສອນໄຟຂອງເກົາຫຼີເໜືອ ແມ່ນສ່ວນນຶ່ງໃນການທົດລອງເປັນປະຫວັດການຂອງປະເທດພາຍໃນປີນີ້, ໂດຍມອງວ່າ ເປັນຄວາມພະຍາຍາມຂອງທ່ານກິມ ໃນການຈັດຫາຄັງແສງ ສໍາລັບທຳການຂົ່ມຂູ່ຫຼາຍ​ຂຶ້ນກວ່າເກົ່າ ເພື່ອກົດດັນ ​ໃຫ້​ຄູ່ແຂ່ງຂອງເກົາຫຼີເໜືອ ຍອມຮັບວ່າ ປະເທດຂອງທ່ານ ເປັນປະເທດທີ​ມີນິວເຄລຍຢ່າງຖືກຕ້ອງຕາມກົດໝາຍ ແລະຍົກເລີກການລົງໂທດທາງດ້ານເສດຖະກິດ.

ອ່ານຂ່າວນີ້ເປັນພາສາອັງກິດ

XS
SM
MD
LG