ໃນວັນສຸກມື້ນີ້ ເກົາຫຼີເໜືອກ່າວຫາເກົາຫຼີໃຕ້ວ່າ ໄດ້ຕອບຮັບແບບບໍ່ໃຫ້ການເຄົາລົບກ່ຽວກັບ
ການເຖິງແກ່ມໍລະນະກຳຂອງຜູ້ນຳສູງສຸດເກົາຫຼີເໜືອທ່ານກິມຈົງອິລ ໂດຍໄດ້ສະແດງຄວາມ
ເຫັນອົກເຫັນໃຈ ຕໍ່ປະຊາຊົນຊາວເກົາຫຼີເໜືອ ແຕ່ໄດ້ຕັດສິນໃຈ ບໍ່ຍອມສົ່ງຄະນະຜູ້ຕາງໜ້າ
ຂອງລັດຖະບານໄປຮ່ວມພິທິສົ່ງສະການຂອງທ່ານກິມ ຊຶ່ງຈະມີຂຶ້ນໃນອາທິດໜ້າ.
ໃນຖະແຫຼງການສະບັບນຶ່ງ ທີ່ພິມເຜີຍແຜ່ທາງເວັບໄຊທ໌ຂອງທາງການເກົາຫຼີເໜືອນັ້ນພຽງ
ຢາງເຕືອນກຸງໂຊລວ່າ ການຕັດສິນໃຈທີ່ວ່ານັ້ນອາດຈະມີຜົນກະທົບຫຼາຍສົມຄວນຕໍ່ຄວາມ
ສຳພັນລະຫວ່າງເກົາຫຼີເໜືອແລະເກົາຫຼີໃຕ້. ເກົາຫຼີເໜືອກ່າວວ່າຕົນຈະເປີດຊາຍແດນຂອງ
ຕົນຮັບເອົາຄະນະຜູ້ຕາງໜ້າໃດໆກໍຕາມຈາກເກົາຫຼີໃຕ້ ທີ່ຕ້ອງການໄປຮ່ວມສະແດງຄວາມ
ເສົ້າເສຍໃຈນຳ.
ແຕ່ເກົາຫຼີໃຕ້ກ່າວວ່າ ຕົນຈະອະນຸຍາດໃຫ້ແຕ່ພຽງ 2 ກຸ່ມທໍ່ນັ້ນ ຄືຄອບຄົວຂອງອະດີດປະ
ທານາທິບໍດີ Kim Dae Jung ແລະຂອງອະດີດປະທານກຸ່ມຮຸນໄດທ່ານ Chung Mong
Hun ໄປຮ່ວມ.
ເກົາຫຼີເໜືອໄດ້ປະກາດກ່ຽວກັບການເລີ່ມຕົ້ນ ຂອງຍຸກສະໄໝທ່ານກິມຈົງອຸນໃນມື້ວັນພະຫັດ
ວານນີ້ໂດຍກ່າວເຖິງລູກຊາຍຂອງທ່ານກິມຈົງອິລວ່າເປັນຜູ້ສືບທອດພາລະກິດການປະຕິວັດ
ຂອງປະເທດແລະເປັນຜູ້ນຳຂອງປະຊາຊົນຊາວເກົາຫຼີເໜືອ.
ບົດບັນນາທິການຂອງໜັງສືພິມ Rodong Sinmun ຂອງທາງການເກົາຫຼີເໜືອກ່າວວ່າ
ທ່ານກິມຈົງອຸນຄວນດຳເນີນການກ້າວໄປຂ້າງໜ້າຕາມເສັ້ນທາງແບບກຸ້ມຕົນເອງ ໃນຂະ
ນະທີ່ສືບຕໍ່ ຄຳສັ່ງສອນຂອງທ່ານກິມຈົງອິລ ຊຶ່ງການເຖິງແກ່ມໍລະນະກຳຂອງທ່ານ ໄດ້ມີ
ການປະກາດໃຫ້ຊາບໃນອາທິດນີ້. ໜັງສືພິມດັ່ງກ່າວຍັງຮຽກຮ້ອງໃຫ້ເກົາຫຼີເໜືອ ສາມັກ
ຄີປຸ້ມລຸມກັນຢູ່ເບື້ອງຫຼັງຜູ້ນຳທີ່ຍັງໜຸ່ມນ້ອຍຄົນນີ້ ແລະຍຶດໝັ້ນຈົງຮັກພັກດີໃນການນຳພາ
ຂອງທ່ານ.
