ຜູ້ນໍາເກົາຫລີເໜືອ ທ່ານ ກິມ ຈົງ ອິລ ກ່າວວ່າ ຄວາມສໍາພັນຂອງເກົາຫລີ ເໜືອກັບຈີນ ນັ້ນຈະຍັງຄົງເຂັ້ມແຂງຢູ່ຕໍ່ໄປ ບໍ່ວ່າຄົນລຸ້ນນຶ່ງຈະຖືກແທນທີ່ໂດຍອີກລຸ້ນນຶ່ງ ເລື້ອຍປານໃດ ກໍຕາມ.
ຄວາມເຫັນດັ່ງກ່າວທີ່ທ່ານກິມໄດ້ສະແດງອອກມາ ໃນຄືນວັນອັງຄານວານນີ້ ຢູ່ໃນງານລ້ຽງອາຫານຄໍ່າສໍາລັບນັກການທູດລະດັບສູງຂອງຈີນ ທີ່ນະຄອນ ຫລວງພຽງຢາງນັ້ນ ປາກົດວ່າເປັນການເອີ່ຍເຕື້ອງເຖິງແຜນການຂອງທ່ານກິມ ທີ່ຈະໂອນອໍານາດໄປໃຫ້ ກິມ ຈົງ ອຸນ ລູກຊາຍຫລ້າຂອງທ່ານ ຕາມທີ່ມີລາຍງານຂ່າວນັ້ນ.
ໜຸ່ມ ກິມ ຈົງ ອຸນ ໄດ້ເປັນຕົວເດັ່ນຢູ່ໃນງານລ້ຽງອາຫານຄໍ່າດັ່ງກ່າວ ອັນ ເປັນພາກສ່ວນ ນຶ່ງຂອງພິທີສະຫລອງຂີດໝາຍຄົບຮອບ 50 ປີ ຂອງສົນທິ ສັນຍາມິດຕະພາບລະຫວ່າງ ເກົາຫລີເໜືອແລະຈີນ. ໃນຮູບພາບຕ່າງໆຈາກ ງານລ້ຽງດັ່ງກ່າວ ທີ່ລົງພິມໃນສື່ຂອງທາງ ການເກົາຫລີເໜືອ ແມ່ນຈະປາກົດ ມີຊື່ຂອງໜຸ່ມ ກິມ ຈົງ ອຸນ ກ່ອນໝູ່ໃນບັນດາແຂກ ຮັບເຊີນທັງຫລາຍ ອັນເປັນຮ່ອງຮອຍຂອງສະຖານະພາບທີ່ສໍາຄັນຂຶ້ນຂອງຜູ້ກ່ຽວ.
ພວກນັກວິຈານພາກັນເຊື່ອວ່າ ການໄປຢ້ຽມຢາມຈີນຂອງທ່ານ ກິມຈົງອິລ ຫລາຍໆບັ້ນ ເມື່ອໝໍ່ໆມານີ້ ສ່ວນນຶ່ງແມ່ນມີເປົ້າໝາຍແນໃສ່ການໃຫ້ໄດ້ຮັບ ຄວາມສະໜັບສະໜຸນຈາກ ປັກກິ່ງ ສໍາລັບການໂອນອໍານາດໄປໃຫ້ ກິມ ຈົງ ອຸນ ໃນທີ່ສຸດນັ້ນ ເຊື່ອກັນວ່າ ເວລານີ້ ທ່ານກິມ ຜູ້ພໍ່ ກໍາລັງມີສຸຂະພາບ ເຊື່ອມໂຊມຫລາຍ ນັບຕັ້ງແຕ່ ທ່ານເປັນໂຣກລົມ ສາລະບາດ ໃນປີ 2008 ເປັນຕົ້ນມາ.
