ກຸ່ມປົກປ້ອງສິດທິມະນຸດທີ່ມີສໍານັກງານຢູ່ສະຫະລັດກຸ່ມນຶ່ງ ໄດ້ອອກລາຍງານສະບັບນຶ່ງທີ່ໃຫ້ລາຍລະອຽດກ່ຽວກັບວິທີການທີ່ເກົາຫຼີເໜືອຈັດລໍາດັບຊັ້ນວັນນະຂອງປະຊາຊົນຂອງຕົນທີ່ອິງຕາມຄວາມຈົ່ງຮັກພັກດີຂອງຄອບ ຄົວພວກເຂົາ ຕໍ່ຣາດຊະວົງ Kim ໃນສິ່ງທີ່ກຸ່ມດັ່ງກ່າວເວົ້າວ່າ ທໍ່ກັບເປັນລະບົບຊົນຊັ້ນວັນນະທາງການເມືອງແບບກົດຂີ່ຢ່າງນຶ່ງ.
ຜົນການສຶກສາຄົ້ນຄວ້າດັ່ງກ່າວ ໄດ້ນໍາອອກເຜີຍແຜ່ເມື່ອວັນພຸດມື້ນີ້ ໂດຍຄະນະກໍາມະການຂອງສະຫະລັດກ່ຽວກັບເລື່ອງສິດທິມະນຸດໃນເກົາຫຼີເໜືອ ກ່າວວ່າປະຊາຊົນທັງໝົດຂອງເກົາຫຼີເໜືອ ແມ່ນໄດ້ຖືກແບ່ງແຍກອອກເປັນສາມຊັ້ນວັນນະທີ່ອິງຕາມເຊື້ອສາຍເປັນຫຼັກ ຄື ຈົ່ງຮັກພັກດີ ບໍ່ແນ່ວແນ່ອຽງໄປອຽງມາ ຫລືເປັນປໍລະປັກ.
ລາຍງານໂຕ້ແຍ້ງວ່າ ຄວາມບໍ່ເທົ່າທຽມກັນນັ້ນແມ່ນກຳນົດໃຫ້ມາຕັ້ງແຕ່ເກີດ ແລະວ່າພວກປະຊາຊົນມີການຄວບຄຸມພຽງໜ້ອຍດຽວຕະຫລອດ ຊີວິດຂອງພວກເຂົາເຈົ້າ ກ່ຽວກັບການຈໍາແນກ ດ້ານສັງຄົມ-ການເມືອງຂອງພວກເຂົາເຈົ້າ ທີ່ຮູ້ກັນວ່າ songbun ໃນພາສາເກົາຫຼີ.
ອີງຕາມການສໍາພາດກັບຊາວເກົາຫຼີເໜືອທີ່ໂຕນໜີ 75 ຄົນນັ້ນ ລາຍງານ ເວົ້າວ່າ ລັດຖະບານຈະເກັບກໍາປະວັດຊາວເກົາຫຼີເໜືອ ແຕ່ລະຄົນໄວ້ເລີ້ມ ຈາກອາຍຸ 17 ປີຂຶ້ນໄປ ແລະຕ້ອງແກ້ໄຂດັດແປງທຸກໆສອງປີ.
ລາຍງານເວົ້າຕໍ່ໄປວ່າ ພວກຈົ່ງຮັກພັກດີທັງຫຼາຍມ່ວນຊື່ນກັບຊີວິດທີ່ເຊີດໜ້າຊູຕາ ເຊັ່ນ ສາມາດຈະອາໄສຢູ່ໃນເມືອງຫຼວງພຽງຢາງທີ່ທັນສະໄໝ ແລະສາມາດໄດ້ຮັບອາຫານ ເຮືອນຢູ່ອາໄສ ການຮັກສາພະຍາບານ ການ ສຶກສາ ແລະວຽກເຮັດງານທໍາ ຂ້ອນຂ້າງດີ.
ກົງກັນຂ້າມ ສຳຫຼັບພວກທີ່ຈັດຢູ່ໃນຊົນຊັ້ນເປັນປໍລະປັກ ຈະຖືກບັງຄັບໃຫ້ ອາໄສຢູ່ໃນເຂດແຂວງພາກຕາເວັນອອກສຽງເໜືອທີ່ທຸກຈົນເປັນສ່ວນໃຫຍ່ ແລະມັກຈະຖືກມອບຕໍາແໜ່ງວຽກທີ່ໃຊ້ແຮງງານໜັກ ຢູ່ຕາມບໍ່ແຮ່ ແລະຟາມ ເປັນຕົ້ນ.
ລາຍງານປະເມີນວ່າ ຊາວເກົາຫຼີເໜືອ ປະມານ 28 ເປີເຊັນ ຖືກຈັດວ່າ ເປັນພວກຈົ່ງຮັກພັກດີ, 45 ເປີເຊັນ ແມ່ນພວກທີ່ບໍ່ແນ່ວແນ່ປ່ຽນໄປປ່ຽນ ມາ ແລະ 27 ເປີເຊັນແມ່ນພວກເປັນປໍລະປັກ.
ລາຍງານເວົ້າອີກວ່າ ໂດຍສ່ວນໃຫຍ່ແລ້ວ ລະບົບ songbun ແມ່ນໄດ້ລອດພົ້ນຈາກການສັງ
ເກດເຫັນຂອງບັນດາປະເທດຕາເວັນຕົກ ທີ່ພາກັນເພັ່ງເລັງໃສ່ແຕ່ຄ້າຍສັບພະທຸກຂອງນັກ
ໂທດການເມືອງ ການປະຫັດປະຫານ ການຄວບຄຸມຂໍ້ມູນຢ່າງເຄັ່ງຄັດ ແລະໂຄງການອາວຸດ
ນີວເຄລຍຂອງເກົາຫລີເໜືອ.