ລິ້ງ ສຳຫລັບເຂົ້າຫາ

ເກົາຫຼີເໜືອ ຮຽກຮ້ອງໃຫ້ ສປຊ ເພັ່ງເລັງໃສ່ ການລະເມີດ ສິດທິມະນຸດ ຂອງ ສຫລ


ແຜນທີ່ ປະເທດ ເກົາຫຼີເໜືອ

ເກົາຫລີ​ເໜືອ ​ໄດ້​ຂໍ​ຮ້ອງ​ຕໍ່ສະພາ​ຄວາມ​ໝັ້ນຄົງສະຫະ​ປະຊາ​
ຊາດ ບໍ່ໃຫ້​ສືບສວນ ​ກ່ຽວກັບການລະເມີດສິດທິ​ມະນຸດຂອງ
ຕົນ ​ແຕ່​ໃຫ້​ທຳສືບສວນ​ໃນອັນທີ່​ພຽງຢາງ ຮ້ອງ​ວ່າ ການລ່ວງ
ລະເມີດຢ່າງ “ຮ້າຍ​ແຮງ” ​ແລະ “ຫລ້າ​ສະໄໝ” ຂອງສະຫະລັດ.

ຢູ່​ໃນ​ຈົດໝາຍສະບັບນຶ່ງ ທີ່ສົ່ງເຖິງສະພາຄວາມໝັ້ນຄົງ ໃນ
ຕອນແລງ​ວັນ​ຈັນ​ວານ​ນີ້ ​ເອກ​ອັກຄະ​ລັດຖະທູດເກົາຫລີ​ເໜືອ ປະຈຳອົງການສະຫະປະຊາຊາດ ທ່ານ Ja Song Nam
ກ່າວ​ວ່າ ການ​ກ່າວ​ຫາ​ດ້ານ​ສິດທິ​ມະນຸດຕໍ່​ເກົາຫຼີ​ເໜືອ ນັ້ນ
ເປັນ​ “ການ​ເສກສັນປັ້ນແຕ່ງ” ​ແລະ “ບໍ່​ໄດ້ເຂົ້າປະເດັນເລີຍ” ​
ກັບເລື່ອງສັນ ຕິພາບແລະຄວາມໝັ້ນຄົງຂອງ​ຂົງ​ເຂດ ຫລື
ຂອງນາໆ​ຊາດ.

​ແຕ່ໃນທາງ​ກົງກັນຂ້າມ ທ່ານ​ກ່າວ​ວ່າ “ຄວາ​ມຜິດໃນການທໍລະມານຂອງ​ຊີໄອ​ເອ” ແມ່ນ
ຈຳເປັນຕ້ອງໄດ້ຮັບການແກ້ໄຂຢ່າງ​ຮີບ​ດ່ວນ ຈາກ​ສະພາ​ຄວາມ​ໝັ້ນຄົງ ​ເພື່ອ​ປ້ອງ​ກັນໃນ
ອັນ​ທີ່​ທ່ານຮ້ອງ​ວ່າ “ຜົນ​ສະທ້ອນໃນການສ້າງຄວາມບໍ່ທຸ່ນ ທ່ຽງ” ​ຕໍ່ສັນຕິພາບຂອງ​ນາໆ​
ຊາດ.

ທ່ານ Ja ​ແມ່ນ​ອ້າງ​ເຖິງລາຍ​ງານ​ຂອງສະພາ​ສູງສະຫະລັດ ທີ່ນຳອອກເຜີ​ຍ​ແຜ່ ໃນອາທິດ
​ແລ້ວ​ນີ້ ທີ່ໃຫ້​ລາຍ​ລະ​ອຽດ ກ່ຽວກັບວິ​ທີການ​ສອບ​ສວນ​ແບບໂຫດຮ້າຍ ທີ່​ໄດ້​ໃຊ້​ໂດ​ຍຊີ​ໄອ
​ເອ ຫລັງ​ຈາກ​ການ​ໂຈມ​ຕີສະຫະລັດ​ເມື່ອວັນ​ທີ 11 ​ເດືອນ​ກັນ ຍາ ປີ 2001.

ພຽງ​ຢາງ ​ຊຶ່ງ​ຖືກ​ພິຈາລະ​ນາ​ວ່າ ​ເປັນ​ນຶ່ງ​ໃນປະ​ເທດ​ທີ່​ມີການລ່ວງລະເມີດດ້ານ​ສິດທິ​ມະ
ນຸດ ທີ່ຂີ້​ຮ້າຍສຸດ​ໃນ​ໂລກ ​ໄດ້ຕຳໜິຕິຕຽນ​ກ່ຽວ​ກັບ​ລາຍງານນີ້ ​ໂດຍ​ໂຕ້​ຖຽງ​ວ່າ ສະຫະລັດ
ບໍ່​ມີ​ຄຸນ​ສົມບັດພຽງພໍ ທີ່​ຈະ​ມາຊັ່ງ​ຊາ ກ່ຽວ​ກັບສະພາບການ ດ້ານສິດທິມະນຸດຂອງປະ​ເທດ​ອື່ນ.

ສະພາ​ຄວາມ​ໝັ້ນຄົງ ​ໃນ​ວັນ​ຈັນ​ວານ​ນີ້ ​ໄດ້​ລົງ​ຄະ​ແນນ​ສຽງ​ ໃຫ້ນຳ​ເອົາສະພາບ​ການດ້ານ
ສິດທິ​ມະນຸດ​ເກົາຫລີ​ເໜືອ ເຂົ້າໃນ​ລາຍການ​ປະຊຸມຂອງຕົນ. ​ເຈົ້າໜ້າ​ທີ່​ກ່າວ​ວ່າ ບັນຫາ​ດັ່ງ
ກ່າວນີ້ມີທ່າທາງວ່າ ຈະ​ຖືກ​ນຳ​ມາສົນທະນາ​ກັນ​ໃນ​ວັນ​ຈັນ ຫລື​ວັນ​ອັງຄານ​ໜ້າ.

XS
SM
MD
LG