ເກົາຫຼີເໜືອກ່າວຫາສະຫະລັດວ່າ ເປັນຜູ້ຮັບຜິດຊອບຕໍ່ການທີ່
ອິນເຕີແນັດຂອງຕົນ ໃຊ້ການບໍ່ໄດ້ ໃນໄລຍະສອງສາມມື້ຜ່ານ
ມານີ້ທ່າມກາງທີ່ເກີດບັນຫາຂັດແຍ້ງລະຫວ່າງປະເທດທັງສອງ ກ່ຽວກັບການໂຈມຕີເຈາະຂໍ້ມູນຂອງບໍລິສັດຮູບເງົາໂຊນີ.
ຄະນະກຳມາທິການປ້ອງກັນຊາດທີ່ມີອິດທິພົນຂອງເກົາຫຼີເໜືອ
ຊຶ່ງເປັນອົງການສູງສຸດ ໃນການປົກຄອງປະເທດ ທີ່ນຳພາໂດຍ
ທ່ານ ກິມ ຈົງ ອຸນໄດ້ອອກຖະແຫຼງການສະບັບນຶ່ງກ່າວຫາວໍຊິງ
ຕັນວ່າ ເປັນຜູ້ເຮັດໃຫ້ລະບົບອິນເຕີແນັດຂອງຕົນໃຊ້ການບໍ່ໄດ້ ຢ່າງສິ້ນເຊີງເປັນເວລາປະມານ 9 ຊົ່ວໂມງ ແລະການມອດລົງ ເປັນໄລຍະໆກ່ອນໜ້ານັ້ນ.
ການມອດລົງຫຼືໃຊ້ການບໍ່ໄດ້ຂອງລະບົບອິນເຕີແນັດເກົາຫຼີເໜືອມີຂຶ້ນຫລັງຈາກປະທານາ ທິບໍດີສະຫະລັດ ທ່ານບາຣັກ ໂອບາມາ ກ່າວວ່າ ສະຫະລັດ ຈະທຳການຕອບໂຕ້ ຕໍ່ອັນທີ່ ວໍຊິງຕັນກ່າວວ່າການໂຈມຕີຕໍ່ບໍລິສັດໂຊນີຂອງເກົາຫຼີເໜືອ.
ເກົາຫລີເໜືອປະຕິເສດວ່າ ຕົນບໍ່ມີສ່ວນຮັບຜິດຊອບ ໃນການໂຈມຕີຕາໜ່າງຄອມພິວເຕີ້ ຂອງບໍລິສັດຮູບເງົາໂຊນີແລະນຳເອົາອີແມລທີ່ໜ້າລະອາຍ ແລະຂໍ້ມູນສ່ວນຕົວອອກເຜີຍ
ແຜ່ນັ້ນ.
ລັດຖະບານເກົາຫຼີເໜືອມີຄະນະໂຈມຕີເຈາະຂໍ້ມູນຫຼືແຮັກເກີ້ຊັ້ນແນວໜ້າທີ່ມີການຖິ້ມໂທດ ໃສ່ວ່າ ເປັນຜູ້ຮັບຜິດຊອບຕໍ່ການໂຈມຕີຢ່າງຕໍ່ເນື່ອງໃນໄລຍະສອງສາມປີຜ່ານມານີ້. ແຕ່ ໃນເມື່ອວ່າ ປະເທດດັ່ງກ່າວບໍ່ໄດ້ມີລະບົບອິນເຕີແນັດໃຊ້ຢ່າງກວ້າງຂວາງເທື່ອນັ້ນ ຈຶ່ງບໍ່ມີ ຄວາມຫລໍ່ແຫລມປານໃດຕໍ່ການພະຍາຍາມໂຈມຕີເຈາະຂໍ້ມູນ.
