ມີລາຍງານວ່າຜູ້ນຳຂອງເກົາຫລີເໜືອ ທ່ານກິມ-ຈົງ-ອິລ
ໄດ້ເດີນທາງໄປເຖິງນະຄອນຫຼວງປັກກິ່ງ ເພື່ອເຈລະຈາ
ຫາລືກັບພວກເຈົ້າໜ້າທີ່ຂັ້ນສູງຂອງຈີນ.
ອົງການຂ່າວຢອນຮັບຂອງເກົາຫລີໃຕ້ລາຍງານວ່າ
ທ່ານກິມໄດ້ເດີນທາງໄປເຖິງນະຄອນຫລວງຂອງຈີນ
ໃນວັນພຸດມື້ນີ້ໂດຍທາງຂະບວນລົດໄຟກັນລູກປືນຂອງທ່ານ
ແລະມີຂະບວນລົດນຳທ່ານໄປພັກຢູ່ທີ່ເຮືອນພັກຮັບຮອງ
ແຂກເມືອງ DIAOYUTAI ຂອງລັດຖະບານຈີນ.
ເປັນທີ່ຄາດກັນວ່າ ຜູ້ນຳທີ່ໂດດດ່ຽວຂອງເກົາຫລີເໜືອ ຈະໄດ້ພົບປະກັບປະທານປະເທດຈີນທ່ານຫູຈີນເທົາໃນວັນພຸດມື້ນີ້.
ມີທ່າທາງວ່າ ການເຈລະຈາຫາລືຂອງພວກທ່ານທັງສອງຈະເພັ່ງເລັງໃສ່ການ
ໃຫ້ຄວາມຊ່ອຍເຫຼືອທາງດ້ານ ການເງິນແລະການປະຕິເສດຂອງເກົາຫລີເໜືອ
ທີ່ຈະປະກອບສ່ວນເຂົ້າຮ່ວມການເຈລະຈາ 6 ຝ່າຍທີ່ຈີນເປັນເຈົ້າພາບ ກ່ຽວກັບໂຄງການນິວເຄລຍຂອງເກົາຫລີເໜືອນັ້ນ.
ປັກກິ່ງໄດ້ພະຍາຍາມແຕ່ບໍ່ສຳເລັດຜົນ ທີ່ຈະຊັກຊວນໃຫ້ທ່ານກິມຮັບເອົາການປະຕິຮູບ
ເພື່ອຕ່າວປີ້ນເສດຖະກິດທີ່ຢູ່ໃນສະພາບບໍ່ໄປບໍ່ມາຂອງເກົາຫຼີເໜືອ ຊຶ່ງໄດ້ຮັບຜົນກະທົບ
ສ່ວນນຶ່ງຈາກການລົງໂທດຂອງອົງການສະຫະປະຊາຊາດ ຫລັງຈາກພຽງຢາງ ຖອນໂຕ
ອອກຈາກການເຈລະຈານິວເຄລຍນັ້ນ ໃຫ້ປະສົບກັບຄວາມກ້າວໜ້າ.
