ລັດຖະບານຂອງທ່ານໂອບາມາກຳລັງຟ້ອງລັດ Carolina ເໜືອ ໃນຄະດີທີ່ເອີ້ນວ່າ ກົດ ໝາຍຫ້ອງນ້ຳ ໂດຍກ່າວວ່າ ລັດດັ່ງກ່າວໄດ້ລະເມີດກົດໝາຍຕໍ່ຕ້ານການ ຈຳແນກກີດກັນ ລັດຖະບານກາງ.
ກົດໝາຍທີ່ວ່ານີ້ ອະນຸຍາດໃຫ້ພວກທີ່ແປງເພດ ສາມາດໃຊ້ຫ້ອງນ້ຳ ຕາມເພດຂອງພວກຄົນເຫຼົ່ານີ້ໃນຕອນເກີດໄດ້ ແທນທີ່ຈະແມ່ນເພດທີ່ພວກເຂົາເຈົ້າເປັນຢູ່ໃນປະຈຸບັນນີ້.
ໃນວັນຈັນວານນີ້ ລັດຖະມົນຕີກະຊວງຍຸຕິທຳສະຫະລັດ ທ່ານນາງ Loretta Lynch ໄດ້ກ່າວຫາລັດ Carolina ເໜືອ ວ່າ “ເປັນລັດທີ່ອຸບປະຖຳ ການຈຳ ແນກກີດກັນ” ທີ່ຍ້ຳເຕືອນ ທ່ານນາງເຖິງ ຊ່ວງເວລາທີ່ຊາວຜີວດຳໄດ້ຖືກຫ້າມບໍ່ໃຫ້ປະກົດຕົວສະຖານທີ່ສາທາລະນະຕ່າງໆ ແລະວ່າລັດສາມາດສັ່ງການວ່າ ຜູ້ໃດໄດ້ຮັບອະນຸຍາດໃຫ້ແຕ່ງງານໄດ້.
ລັດຖະບານກາງ ໄດ້ລະບຸຊື່ລັດດັ່ງກ່າວ ຜູ້ປົກຄອງລັດທີ່ສັງກັດພັກຣີພັບບລີກັນທ່ານ Pat McCrory ພະແນກຮັກສາຄວາມປອດໄພສາທະລະນະ ແລະມະຫາວິທະຍາໄລ Carolina ເໜືອ ທີ່ໄດ້ຮັບເງິນຈຳນວນຫຼາຍລ້ານໂດລ່າ ຈາກ ລັດ ຖະບານກາງນັ້ນ ຢູ່ໃນຄະດີຟ້ອງຮ້ອງນີ້.
ວີດີໂອຈາກນັກຂ່າວ VOA - Michael Bowman:
ທ່ານນາງ Lynch ໄດ້ກ່າວວ່າ “ນີ້ແມ່ນກ່ຽວກັບກຽດສັກສີແລະການໃຫ້ກຽດຕໍ່ປະຊາຊົນພວກເຮົາ ແລະກ່າວຢ້ຳວ່າ ກົດໝາຍດັ່ງກ່າວນີ້ ໄດ້ສ້າງຄວາມເສຍຫາຍໃຫ້ແກ່ຄວາມຮູ້ສຶກ ສະພາບຈິດ ຄວາມຄຽດ ຄວາມອັບອາຍແລະຫຍຽດຫຍາມສັກສີ ຂອງພວກແປງເພດ.”
ກ່ອນໜ້ານີ້ ໃນມື້ວັນຈັນ ລັດ Carolina ເໜືອ ໄດ້ຟ້ອງລັດຖະບານກາງສະຫະລັດ ທີ່ຍັງ ຮັກສາກົດໝາຍນີ້ໄວ້.
ຜູ້ປົກຄອງລັດ McCrory ໄດ້ກ່າວວ່າ “ວໍຊີງຕັນ ໄດ້ວາງຕົວແບບນັກເລງ...ໂດຍພະຍາ ຍາມບົ່ງຊີ້ເຖິງເພດແລະມັນຍັງບໍ່ທັນເປັນທີ່ຈະແຈ້ງເຖິງຄຳນິຍາມກ່ຽວກັບການລະບຸທາງເພດຢ່າງແທ້ຈິງເທື່ອ.”
ທ່ານ McCrory ແລະພວກທີ່ສະໜັບສະໜຸນກົດໝາຍນີ້ ກ່າວປ້ອງກັນວ່າມັນມີ ຄວາມຈຳເປັນເພື່ອປົກປ້ອງການເປັນສ່ວນຕົວໃນຫ້ອງນ້ຳສາທາລະນະ ແລະປົກປ້ອງບໍ່ໃຫ້ພວກຜູ້ຊາຍໃຊ້ຫ້ອງນ້ຳແມ່ຍິງ ເພື່ີອລັກເບິ່ງແລະຕາມລ່າເອົາແມ່ຍິງມາ ເປັນເຫຍື່ອນັ້ນ.
ທ່ານນາງ Lynch ໄດ້ກ່າວວ່າ ລັດດັ່ງກ່າວນີ້ ໄດ້ສ້າງບັນຫາທີ່ບໍ່ເຄີຍມີມາກ່ອນ ເພື່ອເປັນຂໍ້ອ້າງ ໃນການຈຳແນກກີດກັນ ແລະຮາວີລົບກວນຜູ້ຄົນນັ້ນ.
ວີດີໂອ: ລັດ Carolina ເໜືອ
