ຮູບພາບດາວທຽມໃໝ່ຂອງຖານຍິງຈະຫຼວດຂອງເກົາຫຼີເໜືອແຫ່ງນຶ່ງ ສະແດງໃຫ້ເຫັນ
ຫຼັກຖານຂອງການກະກຽມທີ່ເພີ່ມທະວີຂຶ້ນ ສໍາລັບການສົ່ງຈະຫຼວດຂຶ້ນສູ່ອະວະກາດ
ທີ່ທາງກຸງວໍຊິງຕັນເບິ່ງເຫັນວ່າ ເປັນການປົກປິດສໍາລັບການທົດສອບລູກສອນໄຟທີ່ຍິງ
ໄດ້ໃນໄລຍະໄກນັ້ນ.
ສະຖາບັນສະຫະລັດ-ເກົາຫຼີ ທີ່ສະຖາບັນການສຶກສາຂັ້ນສູງລະຫວ່າງຊາດຂອງມະຫາ
ວິທະຍາໄລ John Hopkins ກ່າວໃນວັນອາທິດວານນີ້ວ່າ ຮູບພາບຈາກດາວທຽມທີ່
ຖ່າຍໃນວັນພຸດສັບປະດາຜ່ານມາ ສະແດງໃຫ້ເຫັນເຄື່ອງ radar ເຄື່ອນທີ່ໃນລົດພ່ວງ
ຄັນນຶ່ງ ຊຶ່ງແຕ່ກ່ອນບໍ່ເຫັນມີ ຢູ່ສະຖານທີ່ຍິງຈະຫຼວດ Tong-Changri ແລະເຫັນຖັງ
ລຽນກັນເປັນແຖວຫຼາຍແຖວ ຊຶ່ງປາກົດວ່າເປັນຖັງເຊື້ອໄຟ ແລະທາດ oxidizer ເປົ່າ.
ສະຖາບັນດັ່ງກ່າວເວົ້າວ່າ ຮູບພາບເຫຼົ່ານີ້ຍັງສະແດງໃຫ້ເຫັນອັນທີ່ປາກົດວ່າ ເປັນການ
ເຄື່ອນໄຫວຢູ່ໃກ້ໆກັບຕຶກອາຄານປະກອບເຄື່ອງຍິງລູກສອນໄຟ ບ່ອນທີ່ລາຍງານຂ່າວ
ຊີ້ບອກວ່າ ເປັນບ່ອນເກັບມ້ຽນຂັ້ນຕ່າງໆຂອງຈະຫຼວດ Unha-3 ນັ້ນ.
ກຸງພຽງຢ້າງກ່າວວ່າ ການຍິງຈະຫຼວດຂຶ້ນນີ້ຈະສົ່ງດາວທຽມທີ່ດໍາເນີນການໄດ້ດວງນຶ່ງ
ຂຶ້ນສູ່ວົງໂຄຈອນ ອັນເປັນພາກສ່ວນນຶ່ງຂອງການສະເຫຼີມສະຫຼອງວັນຄ້າຍວັນເກີດຄົບ
ຮອບ 100 ປີຂອງມື້ລາງຜູ້ນໍາ ກິມອີລຊຸງ ຜູ້ກໍ່ຕັ້ງຄອມມີວນິດເກົາຫຼີເໜືອ ແລະເປັນພໍ່ປູ່
ຂອງທ່ານກິມ ຈົງ ອຸນ ຜູ້ນໍາຄົນໃໝ່ຂອງເກົາຫຼີເໜືອນັ້ນ.
ສະຫະລັດ ຣັດເຊຍ ເກົາຫຼີໃຕ້ ແລະຍີ່ປຸ່ນ ທັງໝົດໄດ້ປະນາມແຜນການຈະຍິງຈະຫຼວດ
ນີ້. ແມ່ນແຕ່ຈີນ ຊຶ່ງເປັນພັນທະມິດຂອງກຸງພຽງຢ້າງ ມາຕັ້ງແຕ່ດົນນານ ກໍໄດ້ສະແດງ
ຄວາມບໍ່ເຫັນດີນໍາ ຊຶ່ງບໍ່ສູ້ມີມາກ່ອນ ຂະນະທີ່ທ່ານພັນກິມູນ ເລຂາທິການໃຫຍ່ສະຫະ
ປະຊາຊາດກ່າວວ່າ ທ່ານມີຄວາມເປັນຫ່ວງຢ່າງເລິກເຊິ່ງກ່ຽວກັບເລື້ອງນີ້.
ຄວາມເຫັນຂອງທ່ານ
ສະແດງຄວາມເຫັນໃຫ້ເບິ່ງ