ເກົາຫຼີໃຕ້ກ່າວວ່າ ຕົນຈະເປັນເຈົ້າພາບຈັດການໂອ້ລົມສົນທະນາທາງການ ທູດລະດັບສູງຂຶ້ນກັບຍີ່ປຸ່ນແລະສະຫະລັດໃນສັບປະດາໜ້າກ່ຽວກັບເກົາຫຼີເໜືອ.
ທ່ານ Cho Byung-je ໂຄສົກປະຈໍາກະຊວງການຕ່າງປະເທດເກົາຫຼີ ໃຕ້ ກ່າວວ່າ ພວກນັກການທູດທີ່ມາປະຊຸມກັນໃນກຸງໂຊລ ຈະທໍາການໂອ້ລົມສົນທະນາກັນ ເລື້ອງການເຄື່ອນໄຫວຕ່າງໆກ່ຽວກັບແຫຼມເກົາຫຼີຫຼັງຈາກການຍິງລູກສອນໄຟຂອງກຸງພຽງຢ້າງປະສົບກັບຄວາມລົ້ມແຫຼວໃນວັນທີ 13 ເມສາຜ່ານມານີ້.
ທ່ານ Lim Sung-nam ເອກອັກຄະລັດຖະທູດຂອງເກົາຫຼີໃຕ້ຮັບຜິດຊອບກ່ຽວກັບເລື້ອງນີວເຄລຍຈະເປັນເຈົ້າພາບຈັດການພົບປະຫາລືກັນລະຫວ່າງ 3 ຝ່າຍຂຶ້ນ. ທ່ານ Shinsuke Sugiyama ທູດພິເສດວ່າດ້ວຍນີວເຄລຍ ຂອງຍີ່ປຸ່ນ ແລະທ່ານ Glyn Davies ທູດພິເສດຂອງສະຫະລັດ ຮັບຜິດ ຊອບກ່ຽວກັບເລື້ອງເກົາຫຼີເໜືອ ຈະໃຫ້ລາຍລະອຽດເພີ່ມເຕີມກ່ຽວກັບການໂອ້ລົມສົນທະນາກັນຄັ້ງນີ້.
ໂຄສົກປະຈໍາກະຊວງການຕ່າງປະເທດເກົາຫຼີໃຕ້ກ່າວວ່າ ພວກນັກການທູດທັງສາມຈະໂອ້ລົມສົນທະນາກັນເລື້ອງອື່ນໆອີກກ່ຽວກັບເກົາຫຼີເໜືອ ທີ່ຮວມ ທັງເລື້ອງໂຄງການນີວເຄລຍຂອງເກົາຫຼີເໜືອນໍາ. ປະເທດທັງ 3 ເປັນພາກສ່ວນທີ່ຮ່ວມຢູ່ໃນການພົບປະເຈລະຈາ 6 ຝ່າຍ ພ້ອມກັບຈີນແລະຣັດເຊຍ ທີ່ມີພາລະກິດໃນການເຈລະຈາກັບເກົາຫຼີເໜືອເພື່ອໃຫ້ທັບມ້າງໂຄງການນີວເຄລຍຂອງຕົນເພື່ອແລກປ່ຽນເອົາການຊ່ອຍເຫຼືອທາງດ້ານເສດຖະກິດແລະ ດ້ານມະນຸດສະທໍານັ້ນ.