ເຈົ້າໜ້າທີ່ເກົາຫຼີໃຕ້ ກ່າວໃນວັນສຸກວານນີ້ວ່າ ກອງທັບເກົາຫຼີເໜືອໄດ້ຍິງທົດລອງລູກສອນ
ໄຟໄລຍະໃກ້ 3 ລູກ ໃນເຂດທະເລທາງກໍ້າຕາເວັນອອກຂອງປະເທດໃນຕົ້ນອາທິດນີ້.
ໂຄສົກຄົນນຶ່ງຂອງກອງທັບເກົາຫຼີໃຕ້ກ່າວວ່າ ກຸງໂຊລຮູ້ເລື່ອງດີ ກ່ຽວກັບການຍິງລູກສອນ
ໄຟຂອງເກົາຫຼີເໜືອໃນມື້ວັນພຸດຜ່ານມາ ຊຶ່ງຕົ້ນຕໍນັ້ນໄດ້ລາຍງານໂດຍໜັງສືພິມ Sankei
Shimbun ຂອງຍີ່ປຸ່ນ.
ລາຍງານຂ່າວແຈ້ງວ່າ ລູກສອນໄຟເຫຼົ່ານີ້ເຊື່ອກັນວ່າເປັນລູກສອນໄຟ KN-01 ທີ່ຍິງຈາກ
ພາກພື້ນດິນຫາພາກພື້ນດິນທີ່ມີລັດສະໝີ 120 ກິໂລແມັດ.
ພວກນັກວິເຄາະກ່າວວ່າ ການຍິງທົດລອງທີ່ວ່ານີ້ແມ່ນການສືບຕໍ່ຍິງທົດລອງທີ່ມີຂຶ້ນຕາມ
ປົກກະຕິເພື່ອປັບປຸງລັດສະໝີໃນການຍິງແລະຄວາມແມ່ນຍຳໃຫ້ດີຂຶ້ນຂອງຄັງລູກສອນໄຟ
ໄລຍະສັ້ນຂອງເກົາຫຼີເໜືອ ແລະບາງທີອາດບໍ່ແມ່ນການສົ່ງສັນຍານໃດໆທັງສິ້ນຕໍ່ປະເທດ
ເພື່ອນບ້ານ.
ປະເທດກອມມູນິສ ທີ່ປິດລັບເກົາຫຼີເໜືອ ໄດ້ທຳການຍິງທົດລອງລູກສອນໄຟທີ່ຄ້າຍຄືກັນ
ນີ້ໃນວັນທີ 19 ທັນວາຜ່ານມາ ໃນມື້ດຽວກັນກັບທີ່ເກົາຫຼີເໜືອ ໄດ້ປະກາດໃຫ້ຊາບກ່ຽວ
ກັບການເຖິງແກ່ອະສັນຍະກຳ ຂອງມື້ລາງທ່ານກິມຈົງອິລ ແຕ່ພວກເຈົ້າໜ້າທີ່ເວົ້າວ່າ ການ
ຍິງທົດລອງທີ່ວ່ານີ້ບາງທີອາດໄດ້ມີການວາງແຜນລ່ວງໜ້າໄວ້ແລ້ວ ແລະອາດບໍ່ມີສ່ວນພົວ
ພັນໃດໆກັບການເຖິງແກ່ອະສັນຍະກຳຂອງທ່ານກິມກໍເປັນໄດ້.
ພວກນັກສັງເກດການຄາດຄະເນກັນວ່າ ຜູ້ສືບທອດອຳນາດແລະລູກຊາຍຂອງທ່ານກິມຈົງ
ອິລ ຄືທ່ານກິມຈົງອຸນອາດພະຍາຍາມທີ່ຈະພິສູດໃຫ້ເຫັນ ເຖິງຄວາມສາມາດທາງດ້ານທະ
ຫານແລະໄດ້ຮັບການສະໜັບສະໜຸນຂອງທ່ານໂດຍທຳການຍິງທົດລອງລູກສອນໄຟຫຼືພົວ
ພັນກັບການກະທຳທີ່ເປັນການທ້າທາຍທາງດ້ານທະຫານອື່ນໆ.
