ຊາວເກົາຫລີທີ່ລີ້ໄພໃນຕ່າງປະເທດແລະບັນດານັກວິເຄາະຂ່າວ ພາກັນ ກ່າວວ່າ ບຸນປະຈໍາປີທີ່ພົວພັນກັບການສະຫລອງວັນຄ້າຍວັນເກີດຂອງທ່ານກິມຈົງອິລ ຜູ້ນໍາເກົາຫລີເໜືອ ໃນວັນພຸດມື້ນີ້ ອາດໄດ້ຖືກຕັດລົງຍ້ອນການຂາດເຂີນຢ່າງແຜ່ຫລາຍໃນຫລາຍໆດ້ານໃນປີນີ້.
ກໍຄືຕາມປົກກະຕິທີ່ເຄີຍປະຕິບັດມານັ້ນ ລັດຖະບານໄດ້ວາງແຜນຈັດການສະແດງສິນລະປະຫລາຍໆຢ່າງ ການສາຍຮູບເງົາ ການສະແດງລອຍນໍ້າສອດຄ້ອງກັນໃນຮູບແບບຕ່າງໆ ແລະງານອື່ນໆອີກ ເພື່ອສະຫລອງວັນເກີດຄົບຮອບ 69 ປີຂອງທ່ານກິມ. ອົງການຂ່າວ KCNA ຂອງທາງການເກົາຫລີເໜືອກ່າວວ່າ ປະເທດຊາດທັງໝົດແມ່ນຖ້ວມທົ້ນໄປດ້ວຍຄວາມພາກພູມໃຈແລະເບີກບານມ່ວນຊື່ນຢ່າງໃຫຍ່ຫລວງ.
ແຕ່ມີລາຍງານຂ່າວຫລາຍກະແສທີ່ແນະວ່າລັດຖະບານຕ້ອງໄດ້ຕັດການຢາຍຂອງຂວັນໃຫ້ປະຊາຊົນທີ່ເຄີຍເຮັດມາເປັນປະເພນີນັ້ນອອກຊຶ່ງຂອງຂວັນທີ່ເຄີຍໃຫ້ໃນໂອກາດນີ້ ແມ່ນມີຕັ້ງແຕ່ການເພີ່ມອັດຕາອາຫານໃຫ້ປະຊາຊົນທໍາມະດາສາມັນ ໄປຈົນຮອດການເອົາລົດແລະໂມງ ຍີ່ຫໍ້ Rolex ລາຄາແພງໃຫ້ພວກລະດັບຜູ້ນໍາ.
