ຕໍາຫລວດເກົາຫລີໃຕ້ກ່າວວ່າ ເຂົາເຈົ້າໄດ້ຈັບກຸມຜູ້ຄົນ 5 ຄົນທີ່ສົງໄສວ່າ ເຮັດວຽກຮ່ວມກັບພວກແກ້ງເກົາຫລີເໜືອທີ່ລັກເອົາຂໍ້ມູນຈາກເຄື່ອງຄອມພິວເຕີ ທີ່ໄດ້ລັກຂະໂມຍເງິນຈໍານວນຫລາຍລ້ານໂດລາຈາກເວັບໄຊ້ຫລິ້ນເກມທາງຄອມພີວເຕີຂອງເກົາຫລີໃຕ້.
ພວກຜູ້ຕ້ອງສົງໄສ 5 ຄົນນີ້ຖືກເກນໂດຍກຸ່ມອາຊະຍາກອນເກົາຫລີໃຕ້ ກຸ່ມນຶ່ງທີ່ເຮັດວຽກຢູ່ໃນຈີນ ຮ່ວມກັບພວກລັກເອົາຂໍ້ມູນທາງຄອມພີວເຕີ 30 ກວ່າຄົນຈາກເກົາຫລີເໜືອ. ພວກລັກເອົາຂໍ້ມູນລັບເຫລົ່ານີ້ໄດ້ລັກເຂົ້າໄປໃນເວັບໄຊ້ຫລິ້ນເກມແລະໄດ້ລັກເອົາຂໍ້ມູນສ່ວນຕົວຂອງຜູ້ຫລີ້ນ ຊຶ່ງພວກເຂົານໍາໄປໃຊ້ເພື່ອສ້າງໂຕຫລິ້ນເກມປອມຂຶ້ນມາ. ຫລັງຈາກນັ້ນຊື່ຂອງພວກຫລິ້ນເກມເຫລົ່ານີ້ ຈະຖືກນໍາໄປຂາຍໃຫ້ພວກຫລິ້ນເກມແທ້ໆ ທາງເຄື່ອງຄອມພີວເຕີນັ້ນ.
ຕໍາຫລວດກ່າວວ່າ ພວກລັກເອົາຂໍ້ມູນເກົາຫລີເໜືອເຫລົ່ານີ້ ແມ່ນຮຽນຈົບມາຈາກມະຫາ
ວິທະຍາໄລທີ່ມີຊື່ສຽງຂອງອໍານາດປົກຄອງທີ່ໂດດດ່ຽວຂອງເກົາຫລີເໜືອ ແລະພວກຄົນ
ເຫລົ່ານີ້ສົ່ງເງິນທີ່ພວກເຂົາໄດ້ມານັ້ນໄປຍັງກຸງພຽງຢ້າງ.
ລັດຖະບານກຸງໂຊນກ່າວວ່າ ເກົາຫລີເໜືອໄດ້ທໍາການໂຈມຕີທາງຄອມພີວເຕີຕໍ່ເກົາຫລີໃຕ້
ຫລາຍໆຄັ້ງໃນຫວ່າງບໍ່ເທົ່າໃດປີຜ່ານມາ ຮວມທັງການໂຈມຕີເຄື່ອຂ່າຍທະນາຄານທີ່ດໍາ
ເນີນການໂດຍສະຫະກອນກະເສດແຫ່ງນຶ່ງ ເມື່ອເດືອນເມສາຜ່ານມານັ້ນ.
ເກົາຫລີເໜືອເອີ້ນການກ່າວຫານີ້ວ່າ ເປັນການເສກສັນປັ້ນແຕ່ງຂຶ້ນມາ ທີ່ແນໃສ່ເພື່ອເຮັດ
ໃຫ້ຄວາມເຄັ່ງຕຶງທາງດ້ານການເມືອງລະຫວ່າງເກົາຫລີເໜືອແລະເກົາຫລີໃຕ້ ມີຢູ່ຕໍ່ໄປ.
