ກຸ່ມປົກປ້ອງສິດທິມະນຸດ Amnesty International ໄດ້ເປີດເຜີຍຮູບພາບດາວທຽມ ທີ່ສະ
ແດງໃຫ້ເຫັນພວກຄ້າຍກັກຂັງພວກນັກໂທດການເມືອງແຫ່ງຕ່າງໆໃນເກົາຫລີເໜືອຊຶ່ງ
ເຊື່ອກັນວ່າ ມີພວກນັກໂທດການເມືອງຈໍານວນຫລາຍກວ່າ 2 ແສນຄົນຖືກກັກຂັງຢູ່ທີ່ນັ້ນ.
ກຸ່ມປົກປ້ອງສິດທິມະນຸດທີ່ມີຫ້ອງການຕັ້ງຢູ່ໃນກຸງລອນດອນກຸ່ມນີ້ ກ່າວໃນວັນອັງຄານວານນີ້ວ່າຮູບພາບເຫລົ່ານີ້ສະແດງໃຫ້ເຫັນຂະໜາດ ສະຖານທີ່ຕັ້ງແລະສະພາບການຢູ່ໃນເຄືອຂ່າຍຂອງພວກຄ້າຍຄຸມຂັງລັບເຫລົ່ານີ້. ທ່ານ Sam Zarifi ຜູ້ອໍານວຍການຝ່າຍເອເຊຍປາຊີຟິກ ຂອງກຸ່ມປົກປ້ອງສິດທິມະນຸດ Amnesty International ກ່າວວ່າ ເກົາຫຼີເໜືອບໍ່ສາມາດປະຕິເສດ ຕໍ່ສິ່ງທີ່ປະຕິເສດບໍ່ໄດ້ນີ້ອີກແລ້ວ.
ທາງການເກົາຫລີເໜືອປະຕິເສດບໍ່ຍອມຮັບວ່າມີພວກຄ້າຍຄຸມຂັງເຫລົ່ານີ້ມາເປັນເວລາດົນນານ ຊຶ່ງໄດ້ສ້າງຕັ້ງຂຶ້ນມາໃນຊຸມປີ 1950 ເພື່ອກັກຂັງພວກທີ່ຖືກກ່າວຫາວ່າ ທໍາການຕໍາໜິຕິຕຽນຄະນະນໍາພາແລະພວກຍາດຕິພີ່ນ້ອງຂອງພວກຜູ້ນໍານັ້ນ.
ພວກນັກໂທດຈໍານວນບໍ່ເທົ່າໃດຄົນທີ່ຫລົບໜີອອກມາໄດ້ຈາກພວກຄ້າຍຄຸມຂັງເຫລົ່ານີ້ກ່າວວ່າ ພວກນັກໂທດຖືກບັງຄັບໃຫ້ເຮັດວຽກໜັກແລະມັກຖືກທໍລະມານແລະໄດ້ຮັບການປະຕິບັດຕໍ່ຢ່າງໂຫດຫ້ຽມແລະ ຖືກລົງໂທດອື່ນໆ. ມີພວກນັກໂທດຫລາຍຄົນບໍ່ຮູ້ຊໍ້າວ່າເປັນຫຍັງເຂົາເຈົ້າຈຶ່ງຖືກຄຸມຂັງ.
ພວກອະດີດນັກໂທດຈໍານວນນຶ່ງກ່າວຕໍ່ກຸ່ມປົກປ້ອງສິດທິມະນຸດ Amnesty International
ວ່າພວກຜູ້ຄົນທີ່ພະຍາຍາມຫລົບໜີ ຕາມທໍາມະດາຖືກຈັບໄດ້ແລະຖືກປະຫານຊີວິດ. ກ່າວ
ກັນວ່າພວກນັກໂທດຈໍານວນເກືອບເຄິ່ງນຶ່ງ ຢູ່ໃນຄ້າຍຄຸມຂັງຕ່າງໆໄດ້ເສຍຊີວິດ ຍ້ອນສະ
ພາບອາກາດໜາວແລະອຶດຫິວ. ມີການຂາດແຄນເຂົ້າປາອາຫານເປັນປະຈໍາຢູ່ໃນເກົາຫລີ
ເໜືອ ແຕ່ມີການບັນລະຍາຍວ່າ ສະພາບການຍິ່ງຮ້າຍກາດກວ່ານັ້ນຢູ່ໃນຄ້າຍຄຸມຂັງເຫຼົ່ານີ້.
ກຸ່ມປົກປ້ອງສິດທິມະນຸດດັ່ງກ່າວໄດ້ຮຽກຮ້ອງໃຫ້ທ່ານກິມຈົງອີລ ຜູ້ນໍາເກົາຫລີເໜືອຈົ່ງອັດ
ພວກຄ້າຍຄຸມຂັງເຫຼົ່ານີ້ລົງໃນທັນທີ.
