ເຈົ້າໜ້າທີ່ຍີ່ປຸ່ນກ່າວວ່າ ຈີນໄດ້ລະເມີດຂໍ້ຫ້າມຂາຍອາວຸດໃຫ້ເກົາຫລີເໜືອ ຂອງອົງການສະຫະປະຊາຊາດ ໂດຍໄດ້ຈັດສົ່ງໄປໃຫ້ເກົາຫລີເໜືອ ລົດບັນທຸກທີ່ສາມາດ ລໍາລຽງແລະຍິງລູກສອນໄຟຂີປະນາວຸດໄດ້.
ສື່ມວນຊົນທ້ອງຖິ່ນລາຍງານຂ່າວ ໃນວັນພຸດມື້ນີ້ ໂດຍອ້າງແຫລ່ງຂ່າວຂອງລັດຖະບານຍີ່ປຸ່ນທີ່ເວົ້າວ່າ ບໍລິສັດຈີນແຫ່ງນຶ່ງໄດ້ສົ່ງລົດບັນທຸກ ຂະໜາດໃຫຍ່ 16 ລໍ້ ສີ່ຄັນ ສໍາລັບບັນທຸກແລະຍິງລູກສອນໄຟຂີປະນາວຸດ ໄປໃຫ້ເກົາຫຼີເໜືອ ເມື່ອເດືອນສິງຫາປີຜ່ານມາ.
ໜັງສືພິມ Asahi Shimbun ຊຶ່ງເປັນສະບັບທໍາອິດທີ່ລາຍງານຂ່າວນີ້ ເວົ້າວ່າ ສະຫະລັດບໍ່ໄດ້ກ່າວຕິຕຽນຈີນຢ່າງເປີດເຜີຍກ່ຽວກັບເລຶ່ອງດັ່ງນີ້ ຍ້ອນບໍ່ຢາກເຮັດໃຫ້ຈີນອັບອາຍ ແລະຍ້ອນວ່າສະຫະລັດຍັງຕ້ອງການ ການສະໜັບສະໜຸນຈາກຈີນຢູ່ ເພື່ອໃຫ້ຊ່ວຍຍັບຍັ້ງຄວາມທະເຍີທະຍານດ້ານນີວເຄຼຍຂອງພຽງຢາງນັ້ນ.
ທ່ານ ຫຼິວ ເວ້ມິນ ໂຄສົກກະຊວງຕ່າງປະເທດຈີນ ປະຕິເສດຂໍ້ກ່າວຫາດັ່ງກ່າວໃນວັນພຸດມື້ນີ້ ໂດຍກ່າວວ່າ ປັກກິ່ງບໍ່ໄດ້ລະເມີດມະຕິໃດໆຂອງ ອົງການສະຫະປະຊາຊາດ ທີ່ຫ້າມຂາຍອາວຸດຍຸດໂທປະກອນ ຫ້າມເຝິກແອບ ແລະໃຫ້ການຊ່ວຍເຫຼືອດ້ານອື່ນໆ ແກ່ພຽງຢາງນັ້ນ.
ເມື່ອເດືອນເມສາຜ່ານມານີ້ ທ່ານ ລີອອນ ພາແນດຕ້າ ລັດຖະມົນຕີປ້ອງ ກັນປະເທດສະຫະລັດ ໄດ້ຮັບຮູ້ວ່າ ຈີນໄດ້ໃຫ້ການຊ່ວຍເຫຼືອບາງປະການແກ່ເກົາຫຼີເໜືອ ກ່ຽວກັບໂຄງການລູກສອນໄຟຂີປະນາວຸດຂອງພຽງຢາງນັ້ນ ໂດຍຜ່ານການແລກປ່ຽນດ້ານການຄ້າ ແລະເທັກໂນໂລຈີ.
ຄວາມເຫັນຂອງທ່ານພາແນດຕ້ານີ້ ໄດ້ມີຂຶ້ນຫຼັງຈາກບັນດາຜູ້ຊ່ຽວຊານຝ່າຍຕາເວັນຕົກ ໄດ້ເຫັນອັນທີ່ປະກົດວ່າ ເປັນລົດສໍາລັບຍິງລູກສອນໄຟຂີປະນາວຸດທີ່ເຮັດໃນຈີນ ທີ່ນໍາອອກສະແດງຢ່າງໂຈ່ງແຈ້ງໃນພິທີສວນສະ ໜາມທະຫານບັ້ນນຶ່ງໃນເກົາຫຼີເໜືອ ຊຶ່ງເກົາຫຼີເໜືອຍັງບໍ່ມີເທັກໂນໂລຈີ ທີ່ ສາມາດຜະລິດລົດປະເພດນີ້ໄດ້ເທື່ອ.
ໜັງສືພິມ Asahi Shimbun ກ່າວວ່າ ພວກລົດທີ່ເຫັນຢູ່ໃນງານສວນສະໜາມຄັ້ງນັ້ນ ຄົງແມ່ນລົດທີ່ຈີນສົ່ງໄປໃຫ້ .
ລາຍງານເວົ້າອີກວ່າ ລົດບັນທຸກດັ່ງກ່າວໄດ້ຂົນສົ່ງໄປໂດຍກໍາປັ່ນທີ່ລົງທະບຽນກໍາປູເຈຍ ທີ່ດາວທຽມສອດແນມຂອງສະຫະລັດ ຍີ່ປຸ່ນ ແລະເກົາຫຼີໃຕ້ ຈັບໄດ້ ເວລາເດີນທາງໄປເຖິງເກົາຫຼີເໜືອ ເມື່ອວັນທີ 4 ເດືອນສິງຫາ ປີຜ່ານມາ. ເຈົ້າໜ້າທີ່ຍາມຝັ່ງຍີ່ປຸ່ນໄດ້ກວດກາເບິ່ງລົດດັ່ງກ່າວໃນເວລາຕໍ່ມາ ແລະພົບເຫັນເອກະສານທີ່ແຈ້ງລາຍລະອຽດຂອງການສົ່ງອອກລົດດັ່ງກ່າວ.