ສື່ມວນຊົນເກົາຫລີໃຕ້ລາຍງານວ່າ ທ່ານກິມອີລຊຸງ ຜູ້ນໍາເກົາຫລີເໜືອໄດ້ເດີນທາງມຸ່ງໜ້າ
ໄປສູ່ພາກຕາເວັນອອກຂອງຈີນໂດຍທາງລົດໄຟໃນວັນອາທິດມື້ນີ້ ຊຶ່ງເປັນມື້ທີ 3 ຂອງການ
ຢ້ຽມຢາມແບບລັບໆ ທີ່ປະເທດພັນທະມິດທີ່ສໍາຄັນທີ່ສຸດ ທັງເປັນແຫລ່ງການຊ່ອຍເຫລືອ
ທີ່ໃຫຍ່ທີ່ສຸດຂອງປະເທດທ່ານ.
ອົງການຂ່າວ Yonhap ຂອງເກົາຫລີໃຕ້ ທີ່ອ້າງອິງແຫລ່ງຂ່າວທາງການທູດ ກ່າວວ່າ ປາ
ກົດວ່າທ່ານກິມພວມມຸ້ງໜ້າໄປທາງທິດຕາເວັນອອກສຽງໃຕ້ສູ່ເມືອງຢາງໂຈ (Yangzhou)
ຕິດກັບຊຽງໄຮ້ ເມືອງຫລວງເສດຖະກິດຂອງຈີນ. ກ່ອນໜ້ານັ້ນ ຜູ້ນໍາເກົາຫລີເໜືອໄດ້ຢຸດ
ແວ່ທີ່ເມືອງ Changchun ສູນກາງອຸດສາຫະກໍາໃນພາກຕາເວັນອອກສຽງເໜືອຂອງຈີນ.
ນັບແຕ່ມີລາຍງານວ່າ ທ່ານກິມໄດ້ເດີນທາງເຂົ້າໄປໃນຈີນໃນວັນສຸກຜ່ານມານີ້ ທັງຈີນແລະ
ເກົາຫລີເໜືອ ຕ່າງກໍບໍ່ໄດ້ເປີດເຜີຍຂ່າວໃດໆໃຫ້ຮູ້ກ່ຽວກັບການເດີນທາງຮວມທັງຈຸດປະສົງ
ຂອງການຢ້ຽມຢາມ ຫລືວ່າທ່ານກິມຈະໄປພົບກັບຜູ້ໃດ ຫລືມີໃຜຕິດຕາມໄປນໍາທ່ານແດ່.
ການຢ້ຽມຢາມຕ່າງປະເທດຂອງຜູ້ນໍາເກົາຫລີເໜືອ ແມ່ນປົກປິດເປັນຄວາມລັບສະເໝີ ແລະ
ສື່ມວນຊົນທີ່ລັດຄວມຄຸມ ກໍມັກຈະລາຍງານໃຫ້ຮູ້ກ່ຽວກັບການຢ້ຽມຢາມ ຫລັງຈາກທີ່ທ່ານ
ກິມເດີນທາງກັບຄືນປະເທດແລ້ວເທົ່ານັ້ນ.
ການຢ້ຽມຢາມຈີນໃນຄັ້ງນີ້ຂອງທ່ານກິມ ນັບເປັນຄັ້ງທີສາມໃນເວລາພຽງນຶ່ງປີປາຍ.
