ສະຫະປະຊາຊາດກໍາລັງລົງໂທດ 3 ບໍລິສັດເກົາຫຼີເໜືອທີ່ພົວພັນໃນໂຄງການລູກສອນໄຟແລະນີວເຄລຍຂອງເກົາຫຼີເໜືອນັ້ນ.
ທ່ານນາງ Susan Rice ເອກອັກຄະລັດຖະທູດສະຫະລັດປະຈໍາສະ ຫະປະຊາຊາດກ່າວວ່າ ການລົງໂທດຂອງສະພາຄວາມໝັ້ນຄົງແມ່ນຮວມທັງການກັກຊັບສິນຂອງພວກ 3 ບໍລິສັດເກົາຫຼີເໜືອຊຶ່ງທ່ານນາງ ກ່າວວ່າ: “ການລົງໂທດໃໝ່ນີ້ຮວມທັງການລະບຸຊື່ແລະການກັກຊັບສິນຂອງ 3 ບໍລິສັດເກົາຫຼີເໜືອທີ່ພົວພັນຢ່າງຫຼວງຫຼາຍໃນໂຄງການລູກສອນໄຟແລະນີວເຄລຍທີ່ຜິດກົດໝາຍນີ້.”
ເອກອັກຄະລັດຖະທູດ Rice ກ່າວວ່າ ຄະນະກໍາມາທິການຍັງໄດ້ຂະ ຫຍາຍບັນຊີລາຍຊື່ຂອງສິນຄ້າເກົາຫຼີເໜືອເຊ່ນກັນທີ່ຈະບໍ່ອະນຸມັດໃຫ້ນໍາເຂົ້າປະເທດ ແລະທ່ານນາງກ່າວຕໍ່ໄປວ່າ ເວົ້າລວມແລ້ວສະພາຄວາມໝັ້ນຄົງມອງເບິ່ງການລົງໂທດໃໝ່ນີ້ວ່າ ແຂງແຮງແລະໜ້າເຊື່ອຖືໄດ້ ເພາະວ່າການລົງໂທດທີ່ວ່ານີ້ ຈະເຮັດໃຫ້ເກົາຫຼີເໜືອໂດດດ່ຽວຕື່ມຂຶ້ນອີກ ແລະເຮັດໃຫ້ເປັນການຍາກຂຶ້ນສໍາລັບກຸງພຽງຢ້າງຈະເດີນໜ້າຕໍ່ໄປກັບໂຄງການທີ່ຕ້ອງຫ້າມນີ້.
ເກົາຫຼີເໜືອໄດ້ທົດລອງຍິງລູກສອນໄຟທີ່ຍິງໄດ້ໃນໄລຍະໄກຂອງຕົນໃນເດືອນແລ້ວນີ້ ເຖິງແມ່ນຫຼາຍປະເທດໃນໂລກຮຽກຮ້ອງບໍ່ໃຫ້ທໍາການທົດລອງກໍຕາມ ແຕ່ລູກສອນໄຟດັ່ງກ່າວໄດ້ປະສົບກັບຄວາມລົ້ມແຫຼວແລະຕົກລົງໃສ່ທະເລເຫຼືອງໃນເວລາປະມານ 1 ນາທີຫຼັງຈາກຍິງຂຶ້ນແລ້ວ.
ໃນເວລານັ້ນ ພວກສະມຊິກ 15 ປະເທດຂອງສະພາຄວາມໝັ້ນຄົງສະ ຫະປະຊາຊາດໄດ້ປະນາມການຍິງລູກສອນໄຟທີ່ລົ້ມແຫຼວນີ້ ແລະທ່ານພັນ ຄີມູນ ເລຂາທິການໃຫຍ່ສະຫະປະຊາຊາດເອີ້ນການເຄື່ອນໄຫວຂອງເກົາຫຼີເໜືອນີ້ວ່າ ເປັນເລື້ອງທີ່ໜ້າເສຍໃຈທີ່ສຸດ.
ເກົາຫຼີເໜືອກ່າວວ່າ ການຍິງລູກສອນໄຟຂອງຕົນແມ່ນມີວັດຖຸປະສົງເພື່ອສົ່ງດາວທຽມພະຍາກອນອາກາດຂຶ້ນສູ່ວົງໂຄຈອນ. ແຕ່ມີການເຊື່ອກັນຢ່າງກວ້າງຂວາງວ່າ ການຍິງລູກສອນໄຟນີ້ແມ່ນເປັນການທົດລອງ ຍິງລູກສອນໄຟຂີປະນາວຸດ ທີ່ສາມາດບັນທຸກຫົວລະເບີດນິວເຄລຍໄດ້ຢ່າງງ່າຍໆຄືກັບດາວທຽມນັ້ນ.
ບັນດານັກການທູດກ່າວໃນສັບປະດານີ້ວ່າ ສະຫະລັດ ສະຫະພາບຢູໂຣບ ຍີ່ປຸ່ນ ແລະເກົາຫຼີໃຕ້ໄດ້ສະເໜີບັນຊີລາຍຊື່ຂອງບໍລິສັດແລະສິນ ຄ້າປະມານ 40 ຊື່ ສຳຫຼັບການລົງໂທດຄັ້ງນີ້ ແຕ່ຈີນໄດ້ເຫັນພ້ອມນຳແຕ່ 3 ບໍລິສັດເທົ່ານັ້ນ.