ລິ້ງ ສຳຫລັບເຂົ້າຫາ

ລາງວັນ​ໂນ​ແບລ ​ຂະ​ແໜງ​ການ​ແພດ

  • ວັນນະສອນ ແກ້ວດາຣາ

ທ່ານ Robert Edwards ຜູ້ໄດ້ຮັບລາງວັນໂນ​ແບລ ຂະແໜງການແພດ ຄົນຫຼ້າສຸດ ຫລິ້ນກັບກັບຫຼານໆ.

ນັກວິທະຍາສາດ​ອັງກິດ​ ໄດ້​ຮັບ​ລາງວັນ​ໂນ​ແບລ ​ຂະ​ແໜງ
ການ​ແພດ​ປະ​ຈໍາປີ 2010 ຍ້ອນ​ຜົນງານ​ຂອງ​ຜູ້ກ່ຽວໃນ​ ການ​ພັດທະນາ​ກໍາມະ​ວິທີເຊື້ອ​ສືບ​ພັນ ​ເພື່ອ​ຊ່ວຍ​ໃຫ້​ແມ່
ຍິງສາມາດ​ມີ​ລູກ​ໄດ້ນັ້ນ.

ຄະນະ​ກໍາມະການ​ລາງວັນ​ໂນ​ແບລ ​ທີ່​ປະ​ເທດ Sweden
ກ່າວ​ວ່າ ທ່ານ Robert Edwards ​ໄດ້​ຊ່ອຍ​ໃຫ້​ຜົວ​ເມຍ​
ຫລາຍ​ລ້ານຄູ່ ແກ້​ໄຂ​ບັນຫາ​ການ​ບໍ່​ສາມາດ​ມີ​ລູກ​ໄດ້​ນັ້ນ
ແລະ​ເອີ້ນ​ຜົນ​ງານ​ຂອງ​ທ່ານ​ວ່າ ​ເປັນ​ຫລັກ​ໄຊ​ອັນ​ນຶ່ງ​ໃນ​ການ​ແພດສະ​ໄໝ​ໃໝ່.

ທ່ານ Edwards ​ຊຶ່ງເວລາ​ນີ້​ມີ​ອາຍຸ 85 ປີ​ແລ້ວ ໄດ້​ພັດ ທະນາ​ກໍາະວິທີດັ່ງກ່າວທີ່ອໍາ​ນວຍໃຫ້ເອົາໄຂ່​ຂອງ​ແມ່ຍິງ ອອກ​ມາເພາະເຊື້ອ​ສືບ​ພັນຢູ່ນອກ​ຮ່າງກາຍ​ໄດ້ ​ແລະ​ຫລັງ​ຈາກ​ນັ້ນ​ ກໍ​ສັກ​ໄຂ່​ທີ່ເພາະເຊື້ອ​ສືບ​ພັນແລ້ວ​ນັ້ນ ​ເຂົ້າ​ໃສ່​ໃນ​ມົດ​ລູກ​ຄືນ.

ທ່ານ Edwards ​ໄດ້​ເລີ້ມ​ທໍາ​ການຄົ້ນ​ຄວ້າ​ຂອງ​ທ່ານ​ໃນ​ຊຸມ​ປີ 1950 ແລະ​ໄດ້​ບັນລຸ​ຄວາມ
ສໍາ​ເລັດ​ໃນ​ການ​ເຮັດ​ໃຫ້​ເທັກນິກ​ດັ່ງກ່າວໃຊ້​ໄດ້ຜົນ ໂດຍ​ການ​ຮ່ວມມື​ກັບ​ເພື່ອນ​ຮ່ວມງານ​ຄື
ທ່ານ Patrick Steptoe ທີ່​ໄດ້ເສຍຊີວິດໄປ​ໃນ​ປີ 1988.

ຄະນະ​ກໍາມະການ​ໃຫ້​ລາງວັນ​ໂນ​ແບນ​ກ່າວ​ວ່າ ​ທາລົກ​ຈໍານວນ​ຫລາຍ​ເຖິງ 4 ລ້ານ​ຄົນ ໄດ້​ເກີດ​ມາ​ຍ້ອນ​ວິທີ​ການ​ດັ່ງກ່າວ​ ນັບ​ແຕ່​ທາລົກ​ຄົນ​ທໍາ​ອິດ​ ທີ່ເກີດ​ຈາກ​ວິທີ​ການ​ດັ່ງກ່າວ ທີ່ເອີ້ນ​ວ່າ “test-tube baby” ໃນ​ປີ 1978 ນັ້ນ.

ລາງວັນ​ດັ່ງກ່າວ​ແມ່ນ​ຮວມທັງ​ເງິນສົດ 1 ລ້ານ 5 ​ແສນ​ໂດ​ລາ​ແລະ​ຫລຽນ​ຄໍາຫລຽນ​ນຶ່ງ.

ຄະນະ​ກໍາມະການໂນ​ແບລ​ຂອງ Sweden ມອບ​ລາງວັນ​ໂນ​ແບລ​ຂະ​ແໜງ​ການ​ແພດ​
ເປັນ​ປະ​ຈໍາ​ທຸກໆ​ປີ.

XS
SM
MD
LG