ຫົວໜ້າອົງການ NATO ກ່າວວ່າ ທ່ານບໍ່ເຫັນຮ່ອງຮອຍໃດໆ
ວ່າ ຣັດເຊຍ ໃຫ້ການເຄົາລົບ ຕໍ່ພັນທະນາໆຊາດຂອງຕົນ ກ່ຽວ
ກັບເລື່ອງ ຢູເຄຣນ ແລະກ່າວຕື່ມອີກວ່າ ການປະຊຸມໃນວັນພຸດ
ມື້ນີ້ລະຫວ່າງ ບັນດາລັດຖະມົນຕີການຕ່າງປະເທດ ຂອງອົງການ
NATO ຈະເວົ້າເຖິງ ການສ້າງສະມັດຖະພາບທາງທະຫານຂອງ
ຢູເຄຣນ.
ທ່ານ Anders Fogh Rasmussen ກ່າວໃນວັນພຸດມື້ນີ້ ທີ່ນະ
ຄອນບຣັສເຊີລສ໌ວ່າ ບັນດາລັດຖະມົນຕີຕ່າງປະເທດ ຮວມທັງ
ລັດຖະມົນຕີຕ່າງປະເທດ ສະຫະລັດທ່ານ John Kerry ຈະ
“ທົບທວນຄືນ” ຄວາມສຳພັນກັບຣັດເຊຍ ແລະຕັດສິນໃຈວ່າ
ຈະເຮັດຢ່າງໃດໃນຂັ້ນຕໍ່ໄປ.
ພາບຫຼ້າສຸດ ຈາກ ຢູເຄຣນ
ຣັດເຊຍອາດຈະປະເຊີນໜ້າກັບການຖືກລົງໂທດໜັກຂື້ນ ຈາກບັນດາປະເທດ ສະມາຊິກ
NATO ຖ້າຫາກບໍ່ສາມາດປະຕິບັດຕາມຄວາມຮຽກຮ້ອງ ເພື່ອຊ່ວຍຍຸດຕິຄວາມຮຸນແຮງ
ລະຫວ່າງພວກຈົງຮັກພັກດີຕໍ່ຢູເຄຣນແລະພວກແບ່ງແຍກ ດິນແດນຊາວຣັດເຊຍ ທີ່ຢູ່
ໃນເຂດຊາຍແດນຂອງຢູເຄຣນນັ້ນ.
ຢູ່ທີ່ນະຄອນຫຼວງມົສກູ ໃນວັນພຸດມື້ນີ້ ສະພາສູງຣັດເຊຍ ໄດ້ລົງຄະແນນເພື່ອຖອນອະນຸ
ຍາດໃຫ້ທະຫານຣັດເຊຍເຂົ້າໄປໃນຢູເຄຣນ ເພື່ອເປັນການປະຕິບັດ ຕາມຄຳຮ້ອງຂໍຂອງ
ປະທານາທິບໍດີ Vladimir Putin ໃນວັນອັງຄານວານນີ້ທີ່ໃຫ້ຍົກເລີກການອະນຸຍາດດັ່ງກ່າວ.
ອົງການ NATO ໄດ້ກ່າວຫາຣັດເຊຍວ່າ ໃຫ້ການສະໜັບສະໜູນພວກແບ່ງແຍກດິນແດນ
ໃນຢູເຄຣນ ແຕ່ວ່າຣັດເຊຍໄດ້ປະຕິເສດກ່ຽວກັບເລື່ອງນີ້.
ໃນວັນອັງຄານວານນີ້ ຢູເຄຣນກ່າວວ່າ ພວກແບ່ງແຍກດິນແດນ ທີ່ສະໜັບສະ ໜູນຣັດເຊຍ
ຢູ່ໃກ້ກັບຊາຍແດນຣັດເຊຍ ໄດ້ຍິງເຮືອບິນເຮລີຄອບເຕີ້ລຳນຶ່ງຂອງ ຢູເຄຣນຕົກ ເຮັດໃຫ້ທະຫານຢ່າງໜ້ອຍເກົ້າຄົນເສຍຊີວິດ.