ຈະຫຼວດຫຼາຍລູກໄດ້ຕົກໃສ່ຖານທັບ ອີຣັກ ທີ່ມີທະຫານ ອາເມຣິກັນ ພັກອາໄສຢູ່ ໃກ້ກັບສະຖານທູດ ສະຫະລັດ ໃນຕອນເຊົ້າຂອງວັນອາທິດມື້ນີ້, ເປັນການໂຈມຕີໄລຍະສັ້ນຕໍ່ຊັບສິນຂອງ ສະຫະລັດ ໃນປະເທດດັ່ງກ່າວ.
ໂຄສົກພັນທະມິດ ທ່ານ ໄມລສ໌ ແຄກກິນສ໌ ໄດ້ກ່າວວ່າ “ພັນທະມິດໄດ້ຢືນຢັນຈະຫຼວດຂະໜາດນ້ອຍຫຼາຍລູກ ໄດ້ສົ່ງຜົນກະທົບຕໍ່ຖານທັບ ອີຣັກ ທີ່ມີທະຫານ ພັນທະມິດອາໄສຢູ່ໃນເຂດ ສາກົນ. ບໍ່ມີຜູ້ເສຍຊີວິດ ຫຼື ບາດເຈັບ.”
ຖານທັບນັ້ນ, ເປັນທີ່ຮູ້ຈັກດັ່ງກັບ ຢູນຽນ 3 (Union III), ແມ່ນສຳນັກງານໃຫຍ່ຂອງພັນທະມິດນຳໜ້າໂດຍ ສະຫະລັດ, ທີ່ຖືກສົ່ງໄປປະເທດ ອີຣັກ ນັບຕັ້ງແຕ່ປີ 2014 ເປັນຕົ້ນມາ ເພື່ອຊ່ວຍເຫຼືອກອງກຳລັງໃນທ້ອງຖິ່ນຕໍ່ສູ້ກັບກຸ່ມຈີຮາດ ລັດ ອິສລາມ.
ກອງທັບ ອີຣັກ ໄດ້ກ່າວວ່າ ຈະຫຼວດ ຄັດຢູຊາ (Katyusha) ສາມລູກໄດ້ຕົກຢູ່ໃນເຂດສີຂຽວ, ເຊິ່ງແມ່ນເຂດແດນທີ່ມີການຮັກສາຄວາມປອດໄພສູງ ບ່ອນທີ່ໜ່ວຍປະຕິບັດພາລະກິດ ສະຫະລັດ ແລະ ຖານທັບ ຢູນຽນ 3 ຕັ້ງຢູ່, ພ້ອມກັບຕຶກຕ່າງໆຂອງລັດຖະບານ ອີຣັກ, ຫ້ອງການອົງການສະຫະປະຊາຊາດ ແລະ ສະຖານທູດອື່ນໆ.
ຈະຫຼວດລູກທີສີ່ໄດ້ຕົກໃສ່ຖານໜ່ວຍພະລາທິການ ໃນໝູ່ບ້ານທີ່ແຕກຕ່າງ ທີ່ປະຕິບັດການໂດຍເຄືອຂ່າຍ ຮາເຊັດ ອາລ-ຊາບີ (Hashed al-Shaabi) ເຊິ່ງແມ່ນເຄືອຂ່າຍກອງທັບ ທີ່ຖືກລວມເຂົ້າໃນລັດຖະບານ ອີຣັກ ຢ່າງເປັນທາງການ, ອີງຕາມການກ່າວຂອງກອງທັບ ອີຣັກ.
ເຄືອຂ່າຍ ຮາເຊັດ ບໍ່ໄດ້ອອກຖະແຫຼງການໃນທັນທີທັນໃດ.
ການໂຈມຕີໃສ່ຊັບສິນຂອງ ສະຫະລັດ ແລະ ເຄືອຂ່າຍ ຮາເຊັດ ໃນເວລາດຽວກັນແມ່ນຜິດປົກກະຕິ, ໃນຂະນະທີ່ລັດຖະບານ ວໍຊິງຕັນ ໄດ້ຖິ້ມໂທດໃສ່ສະມາຊິກຫົວຈັດທີ່ຢູ່ໃນເຄືອຂ່າຍກອງທັບນັ້ນ ສຳລັບການໂຈມຕີດ້ວຍຈະຫຼວດຢ່າງຊ້ຳແລ້ວຊ້ຳອີກໃສ່ຖານທັບ ອາເມຣິກາ ທົ່ວ ອີຣັກ.
ການໂຈມຕີໃນວັນອາທິດມື້ນີ້ແມ່ນຄັ້ງທີ 19 ນັບຕັ້ງແຕ່ເດືອນຕຸລາປີກາຍນີ້ ທີ່ແນເປົ້າໃສ່ ສະຖານທູດ ຫຼື ກອງທະຫານ ສະຫະລັດ ປະມານ 5,200 ຄົນທີ່ປະຈຳການຢູ່ກັບກອງກຳລັງທ້ອງຖິ່ນໃນທົ່ວອີຣັກ.
ບໍ່ມີກຸ່ມໃດອອກມາອ້າງເອົາຄວາມຮັບຜິດຊອບ ສຳລັບເຫດການຕ່າງໆນັ້ນ.
ອ່ານຂ່າວນີ້ເປັນພາສາອັງກິດ
