ລັດຖະມົນຕີກະຊວງການຕ່າງປະເທດສະຫະລັດ ທ່ານ John
Kerry ຕ້ອນຮັບປະທານາ ທິບໍດີໄນເຈີເຣຍ ທ່ານ Muhammadu
Buhani ທີ່ກະຊວງການຕ່າງປະເທດ ໃນວັນອັງ ຄານມື້ນີ້
ໃນຂະນະທີ່ີທ່ານສືບຕໍ່ການຢ້ຽມຢາມສະຫະລັດເປັນເວລາ 4 ມື້.
ໃນວັນຈັນວານນີ້ ຜູ້ນຳຂອງໄນເຈີເຣຍ ໄດ້ພົບປະກັບປະທານາ
ທິບໍດີສະຫະລັດ ທ່ານບາຣັກ ໂອບາມາ ທີ່ທຳນຽບຂາວ ເພື່ອປຶກສາຫາລືເລື້ອງໄພຂົ່ມຂູ່ຈາກກຸ່ມຫົວຮຸນແຮງ Boko Haram ແລະບັນຫາສຳຄັນອື່ນໆນຳ.
ທ່ານ ໂອບາມາ ໄດ້ກ່າວຍ້ອງຍໍສັນລະເສີນການເລືອກຕັ້ງ ຫວ່າງໄວໆມານີ້ຂອງໄນເຈີເຣຍ ຊຶ່ງເປັນຂີດໝາຍການມອບໂອນອຳນາດແບບປະຊາທິປະໄຕຄັ້ງທຳອິດ ນັບຕັ້ງແຕ່ການປົກ ຄອງໂດຍທະຫານ ສິ້ນສຸດລົງໃນປີ 1999 ເປັນຕົ້ນມາ.
ທ່ານ ໂອບາມາ ໄດ້ກ່າວວ່າ: “ພວກເຮົາໄດ້ເຫັນການເລືອກຕັ້ງ ຊຶ່ງມັນເປັນການມອບໂອນອຳນາດຢ່າງສັນຕິ ໃຫ້ແກ່ທາງລັດຖະບານຊຸດໃໝ່. ມັນເປັນການຢັ້ງຢືນເຖິງການທີ່ໄນຈີເຣຍ ມຸ້ງໝັ້ນຕໍ່ການມີປະຊາທິປະໄຕ.”
ທ່ານໄດ້ກ່າວເພີ້ມຕື່ມວ່າ ທ່ານເປັນຫວ່ງເປັນໃຍເຖິງການໂຈມຕີ ຂອງກຸ່ມ Boko Haramພ້ອມນີ້ ທ່ານຍັງເຊື່ອໝັ້ນວ່າປະທານາທິບໍດີ Buhani ມີແຜນການທີ່ຈະແຈ້ງໃນການເອົາຊະນະກຸ່ມດັ່ງກ່າວນີ້ ແລະການກຳຈັດການສໍ້ລາດບັງຫຼວງ ທີ່ເຮັດໃຫ້ເສດຖະກິດຂອງປະເທດຖອຍຫຼັງນັ້ນ.
ທ່ານໂອບາມາ ໄດ້ກ່າວວ່າ ທ່ານຍິນດີທີ່ຈະປຶກສາຫາລື ເລື້ອງທີ່ສະຫະລັດແລະໄນເຈີເຣຍ
ຈະຮ່ວມມືກັນຢ່າງໃດ ໃນການຮັບມືກັບພວກກໍ່ການຮ້າຍນັ້ນ.
ການມາຢ້ຽມຢາມສະຫະລັດເປັນເວລາ 4 ມື້ນີ້ ແມ່ນການຢ້ຽມຢາມວໍຊິງຕັນຄັ້ງທຳອິດຂອງທ່ານ Buhari. ນັບຕັ້ງແຕ່ທ່ານເຂົ້າຮັບຕຳແໜ່ງ ໃນເດືອນພຶດສະພາ ຜ່ານມານີ້ ຊຶ່ງເປັນ ການມອບໂອນອຳນາດຢ່າງສັນຕິ ທີ່ບໍ່ຄ່ອຍໄດ້ເຫັນກັນນັ້ນ.
